Aira a Jehova magaga kwĩingĩria maũndũ-inĩ ma gĩũteti nĩ ũndũ wa itũmi cia kĩndini ciĩhocetie harĩ ũrĩa Bibilia ĩrutanaga. Tũtirũagĩra mogarũrũku, tũgathuurana, tũkarũgama nĩguo tũthuurũo thirikari-inĩ, kana tũkanyitanĩra harĩ ũndũ o wothe wa kũgarũra thirikari. Twĩtĩkĩtie atĩ Bibilia nĩ ĩheanĩte itũmi njega biũ cia gũkorũo na mũrũgamo ũcio.

•   Tũrũmagĩrĩra kĩonereria kĩa Jesu, ũrĩa waregire gwĩtĩkĩra gaturũa ga gĩũteti. (Johana 6:15) Aarutire arutwo ake atĩ “o ti a thĩ ĩno” na akĩmonia wega biũ atĩ matiagĩrĩirũo kũnyitanĩra o na hanini na maũndũ ma gĩũteti.—Johana 17:14, 16; 18:36; Mariko 12:13-17.

•   Tũkoragwo tũrĩ ehokeku harĩ Ũthamaki wa Ngai ũrĩa Jesu aaragia ũhoro waguo rĩrĩa aaugire ũũ: “Ũhoro ũyũ mwega wa Ũthamaki nĩ ũkaahunjio thĩ yothe.” (Mathayo 24:14) Tondũ tũhaana ta mabarũthi a Ũthamaki wa Ngai, na tũtũmĩtwo twaragie ũhoro wa gũka kwaguo, tũtiĩingĩragia maũndũ-inĩ ma gĩũteti ma bũrũri o wothe o na nginya bũrũri-inĩ ũrĩa tũikaraga.—2 Akorintho 5:20; Aefeso 6:20.

•   Nĩ ũndũ wa kwaga kũnyita mbaru mwena o na ũrĩkũ, nĩ tũhotaga kwarĩria andũ othe tũrĩ na wĩyathi ũhoro mwega wa Ũthamaki wa Ngai. Tũgeragia kuonania na ciugo na ciĩko citũ atĩ twĩhokete Ũthamaki wa Ngai nĩguo ũkaaniinĩra andũ mathĩna.—Thaburi 56:11.

•   Tondũ tũtiĩtĩkagĩra kũgayũkanio nĩ maũndũ ma gĩũteti, tũkoragwo tũrĩ na ũrũmwe thĩinĩ wa thĩ yothe. (Akolosai 3:14; 1 Petero 2:17) Ngũrani na ũguo, ndini iria ciĩingĩragia maũndũ-inĩ ma gĩũteti nĩ igayũkanagia arũmĩrĩri a cio.—1 Akorintho 1:10.

 Gũtĩa thirikari. O na gũtuĩka tũtinyitanagĩra maũndũ-inĩ ma ũteti, nĩ tũtĩaga ũnene wa thirikari iria itũtongoragia kũrĩa tũikaraga. Ũndũ ũcio nĩ ũnyitĩtwo mbaru nĩ watho ũyũ wa Bibilia: “Mũndũ o wothe nĩ athĩkagĩre athani arĩa anene.” (Aroma 13:1) Nĩ twathĩkagĩra watho, tũkarĩha magooti, na tũkanyitanĩra na mĩbango ya thirikari ya gũteithĩrĩria raiya a yo. Handũ ha kũnyitanĩra na ũndũ o wothe wa kũregana na thirikari, tũrũmagĩrĩra ũtaaro wa Bibilia wĩgiĩ kũhoyagĩra “athamaki na arĩa othe marĩ iturũa-inĩ cia wathani,” makĩria rĩrĩa maratua matua mangĩhutia wĩyathi witũ wa gũthathaiya.—1 Timotheo 2:1, 2, kohoro ka magũrũ-inĩ.

 Ningĩ nĩ tũtĩaga wĩyathi wa andũ arĩa angĩ wa gwĩtuĩra matua mao megiĩ maũndũ ma gĩũteti. Kwa ngerekano, tũtingagĩrĩra maũndũ ma ithuurano kana tũkaingĩrĩra arĩa matuĩte itua rĩa gũthuurana.

 Hihi mũrũgamo witũ wa kwaga kwĩingĩria maũndũ-inĩ ma gĩũteti nĩ kaũndũ ka mĩaka ya ica ikuhĩ? Aca. Atũmwo na Akristiano angĩ mahinda-inĩ ma tene maakoragwo na mũrũgamo o ta ũcio kwerekera thirikari. Ibuku rĩtagwo Beyond Good Intentions riugaga ũũ: “O na gũtuĩka nĩ meetĩkĩtie atĩ nĩ maagĩrĩirũo gũtĩa thirikari, Akristiano a mahinda ma tene matietĩkĩtie ũhoro wĩgiĩ kũnyitanĩra maũndũ-inĩ ma gĩũteti.” O ũndũ ũmwe na ũcio, ibuku rĩtagwo On the Road to Civilization riugaga atĩ Akristiano a mahinda ma tene “matingĩarutire wĩra ũkoniĩ ũteti.”

 Hihi mũrũgamo witũ wa kwaga kwĩingĩria maũndũ-inĩ ma gĩũteti nĩ ũgwati harĩ thayũ wa bũrũri? Aca. Tũrĩ raiya mendete thayũ na kwoguo arĩa matongoragia matibatiĩ gũtwĩtigĩra. Ta wĩcirie ũhoro wa riboti ĩmwe ya mwaka wa 2001 yarutirũo nĩ rũhonge rũmwe rwa ũthuthuria rwa Ukraine (National Academy of Sciences of Ukraine). Ĩkĩaria ũhoro wa mũrũgamo witũ wa kwaga kwĩingĩria maũndũ-inĩ ma gĩũteti, riboti ĩyo yoigire ũũ: “Ũmũthĩ andũ aingĩ no mage gũkenio nĩ mũrũgamo wa Aira a Jehova; mũrũgamo ũcio nĩguo watũmire mathitangwo nĩ thirikari ya Nazi na ingĩ cia Gĩkomunisti cia mahinda mahĩtũku.” No o na marĩ rungu rwa ũhinyĩrĩria wa thirikari ya Soviet, Aira a Jehova no “maathiire na mbere gũkorũo marĩ raiya athĩki. Othe maathiire na mbere kũruta mawĩra mĩgũnda-inĩ na iganda-inĩ marĩ na wĩhokeku na matekuonania mwĩyendo na matiarĩ ũgwati harĩ thirikari ĩyo ya Gĩkomunisti.” Riboti ĩyo ĩrĩkagĩrĩria na kuuga atĩ o na ũmũthĩ ũyũ, wĩtĩkio wa Aira a Jehova na maũndũ marĩa mekaga “matikoragwo marĩ ũgwati harĩ thayũ na ũrũmwe wa bũrũri o wothe.”