Athamaki wa Mbere 6:1-38
6 Mwaka-inĩ wa 480 thutha wa Aisiraeli* kuuma bũrũri wa Misiri,+ mwaka-inĩ wa kana kuuma Suleimani atuĩka mũthamaki wa Isiraeli, mweri-inĩ wa Zivu*+ (na noguo mweri wa kerĩ), Suleimani akĩambĩrĩria gwaka nyũmba ya Jehova.*+
2 Nyũmba ĩyo Mũthamaki Suleimani aakĩire Jehova yarĩ na ũraihu wa mĩkono* 60, wariĩ wa mĩkono 20, na ũraihu wa na igũrũ wa mĩkono 30.+
3 Gĩthaku+ kĩrĩa kĩarĩ mwena wa mbere wa hekarũ* kĩarĩ na ũraihu* wa mĩkono 20, ũiganaine na wariĩ wa nyũmba ĩyo.* Na gĩgacomoka mĩkono ikũmi kuuma mwena wa mbere wa nyũmba ĩyo.
4 Agĩthondekera nyũmba ĩyo ndirica ciarĩ na buremu ciathiĩte icekehete.+
5 Ningĩ agĩaka nyũmba mwena-inĩ wa rũthingo rwa nyũmba ĩyo; yaakĩtwo ĩthiũrũrũkĩirie thingo cia nyũmba ĩyo, cia hekarũ* na rumu ya thĩinĩ biũ,+ na agĩthondeka tũnyũmba twa mĩena-inĩ tũthiũrũrũkĩirie mĩena yothe.+
6 Ngoroba ya thĩ ya tũnyũmba tũu twa mwena-inĩ yarĩ na wariĩ wa mĩkono ĩtano, ngoroba ya gatagatĩ yarĩ na wariĩ wa mĩkono ĩtandatũ, na ngoroba ya gatatũ yarĩ na wariĩ wa mĩkono mũgwanja, nĩ gũkorũo nĩ aathondekire tũrũthingo tuoimĩrĩte na nja tũgathiũrũrũkĩria nyũmba ĩyo yothe, ũũ atĩ gũtirĩ kĩndũ kĩohereirũo thingo-inĩ cia nyũmba ĩyo.+
7 Nyũmba ĩyo yaakirũo na mahiga ma kware marĩa maaicũhĩtio,+ ũũ atĩ gũtirĩ nyundo kana mathanwa kana indo cia kĩgera ciaiguĩkaga nyũmba-inĩ ĩyo rĩrĩa yaakagwo.
8 Mũromo wa kanyũmba ka mwena-inĩ ka ngoroba ya thĩ warĩ mwena wa mũhuro* wa nyũmba ĩyo,+ na ngathĩ yathiĩte ĩnyogondete nginya ngoroba ya gatagatĩ, na kuuma ngoroba-inĩ ya gatagatĩ nginya ngoroba-inĩ ya gatatũ.
9 Agĩthiĩ na mbere gwaka nyũmba ĩyo na akĩmĩrĩkia+ na akĩgita nyũmba ĩyo na mĩgamba ya mũtarakwa na akĩara mĩhari ya mbaũ cia mũtarakwa.+
10 Agĩaka tũnyũmba twa mĩena-inĩ tũthiũrũrũkĩirie nyũmba ĩyo,+ o kanyũmba kaarĩ na ũraihu wa mĩkono ĩtano, na twanyitithanĩtio nyũmba-inĩ ĩyo na mbaũ cia mũtarakwa.
11 Ihinda-inĩ o rĩu, ndũmĩrĩri ya Jehova ĩgĩkinyĩra Suleimani, akĩmwĩra ũũ:
12 “Ũhoro-inĩ wĩgiĩ nyũmba ĩno ũraka-rĩ, angĩkorũo nĩ ũrĩrũmagĩrĩra mawatho makwa na ũhingagie matuĩro makwa na ũrũmagie maathani makwa mothe na njĩra ya kũmarũmagĩrĩra,+ o na niĩ nĩ ngũkũhingĩria kĩrĩkanĩro gĩakwa kĩrĩa ndarĩkanĩire na thoguo Daudi,+
13 na ndĩikaraga gatagatĩ-inĩ ka Aisiraeli,+ na ndigatiganĩria andũ akwa Isiraeli.”+
14 Suleimani agĩgĩthiĩ na mbere gwaka nyũmba ĩyo nĩguo amĩrĩkie.
15 Agĩaka thingo cia thĩinĩ cia nyũmba ĩyo na mbaũ cia mũtarakwa. Akĩgemia thingo icio cia thĩinĩ na mbaũ, kuuma thĩ nginya mĩitĩrĩro-inĩ ya mambarita, na akĩhumbĩra kũu thĩ ya nyũmba ĩyo na mbaũ cia mũthengera.+
16 Na agĩaka gĩcunjĩ kĩa mĩkono 20 kĩa mwena wa na thutha wa nyũmba ĩyo na mbaũ cia mũtarakwa, kuuma thĩ nginya mĩitĩrĩro-inĩ, na thĩinĩ wayo* agĩaka rumu ya thĩinĩ biũ,+ nĩho Harĩa Hatheru Mũno.+
17 Nayo hekarũ*+—gĩcunjĩ kĩa nyũmba ĩyo kĩrĩa kĩarĩ mbere ya rumu ĩyo—yarĩ ya mĩkono 40.
18 Mũtarakwa ũrĩa warĩ thĩinĩ wa nyũmba ĩyo wacongetwo mĩhiano ya mĩũngũ+ na mahũa macanũku.+ Guothe kwahumbĩrĩtwo na mũtarakwa; gũtirĩ ihiga o na rĩmwe rĩoonekaga.
19 Na akĩhaarĩria rumu ya thĩinĩ biũ+ thĩinĩ wa nyũmba ĩyo nĩgetha aige ithandũkũ rĩa kĩrĩkanĩro kĩa Jehova kuo.+
20 Rumu ya thĩinĩ biũ yarĩ na ũraihu wa mĩkono 20, wariĩ wa mĩkono 20, na ũraihu wa na igũrũ wa mĩkono 20;+ na akĩmĩhumbĩra na thahabu therie; akĩhumbĩra kĩgongona+ na mbaũ cia mũtarakwa.
21 Suleimani aahumbĩrire nyũmba ĩyo thĩinĩ na thahabu therie,+ na agĩkĩrania nyororo cia thahabu mwena wa mbere wa rumu ĩyo ya thĩinĩ biũ,+ ĩrĩa yahumbĩrĩtwo na thahabu.
22 Aahumbĩrire nyũmba ĩyo yothe na thahabu nginya nyũmba ĩyo yothe ĩkĩrĩka; ningĩ akĩhumbĩra kĩgongona gĩothe na thahabu+ kĩrĩa kĩarĩ hakuhĩ na rumu ĩyo ya thĩinĩ biũ.
23 Thĩinĩ wa rumu ya thĩinĩ biũ agĩthondeka akerubi erĩ+ na mbaũ cia mũcinda-nũgũ,* o kerubi aarĩ na ũraihu wa na igũrũ wa mĩkono ikũmi.+
24 Ithagu rĩmwe rĩa kerubi rĩarĩ mĩkono ĩtano narĩo ithagu rĩu rĩngĩ rĩarĩ mĩkono ĩtano. Kuuma mũthia-inĩ wa ithagu rĩmwe nginya mũthia-inĩ wa ithagu rĩu rĩngĩ yarĩ mĩkono ikũmi.
25 Kerubi wa kerĩ o nake aarĩ na ũraihu wa mĩkono ikũmi. Akerubi acio eerĩ nĩ maaiganaine na makahaanana.
26 Ũraihu wa kerubi ũmwe warĩ mĩkono ikũmi, o ta wa kerubi ũcio ũngĩ.
27 Agĩcoka akĩiga akerubi+ acio nyũmba-inĩ ya thĩinĩ.* Mathagu ma kerubi ũmwe maatambũrũkĩte ũũ atĩ ithagu rĩmwe rĩakinyĩte rũthingo-inĩ rũmwe narĩo ithagu rĩa kerubi ũcio ũngĩ rĩgakinya rũthingo-inĩ rũu rũngĩ, namo mathagu macio mangĩ maatambũrũkĩte kwerekera gatagatĩ ka nyũmba ĩyo, ũndũ mathagu macio maahutanĩtie.
28 Na akĩhumbĩra akerubi acio na thahabu.
29 Na thingo-inĩ ciothe cia nyũmba ĩyo gũthiũrũrũkĩria rumu ya thĩinĩ na ya nja,* agĩconga mĩhiano ya akerubi,+ mĩtĩ ya mĩkĩndũ,+ na mahũa macanũku.+
30 Akĩhumbĩra kũu thĩ ya nyũmba ĩyo na thahabu thĩinĩ wa rumu ya thĩinĩ na ya nja.
31 Naguo mũromo wa rumu ya thĩinĩ biũ akĩũthondekera mĩrango ya mbaũ cia mũcinda-nũgũ, itugĩ cia mĩena, na itugĩ cia mĩrango, irĩ gĩcunjĩ gĩa gatano.*
32 Mĩrango yerĩ yarĩ ya mbaũ cia mũcinda-nũgũ, na mĩrango-inĩ ĩyo agĩconga mĩhiano ya akerubi, mĩtĩ ya mĩkĩndũ, na mahũa macanũku, na akĩmĩhumbĩra na thahabu; na akĩhũũrĩrĩra thahabu igũrũ rĩa akerubi acio na nyundo o na mĩtĩ-inĩ ĩyo ya mĩkĩndũ.
33 Ũguo noguo aathondekeire mũromo wa hekarũ* itugĩ cia mũrango na mbaũ cia mũcinda-nũgũ, cia gĩcunjĩ gĩa kana.*
34 Na agĩthondeka mĩrango ĩĩrĩ ya mbaũ cia mũthengera. Mũrango ũmwe warĩ na icunjĩ igĩrĩ ciekũnjaga gĩtugĩ-inĩ, naguo mũrango ũcio ũngĩ warĩ na icunjĩ igĩrĩ ciekũnjaga gĩtugĩ-inĩ.+
35 Agĩconga mĩhiano ya akerubi, mĩtĩ ya mĩkĩndũ, na mahũa macanũku, na akĩhumbĩra mĩcongo ĩyo na thahabu.
36 Agĩthondeka nja ĩrĩa nini+ na mĩhari ĩtatũ ya mahiga maicũhie na mũhari ũmwe wa mĩgamba ya mũtarakwa.+
37 Mwaka-inĩ wa 4 mweri-inĩ wa Zivu,* nĩrĩo mũthingi wa nyũmba ya Jehova waakirũo;+
38 na mwaka-inĩ wa 11, mweri wa Bulu* (na noguo mweri wa kanana), nyũmba ĩyo ĩkĩrĩka hamwe na maũndũ mayo mothe na kũringana na mũtaratara wa mwako wayo.+ Kwoguo aahũthĩrire mĩaka mũgwanja kũmĩaka.
Tũũhoro twa magũrũ-inĩ
^ Rora Ũhoro Muongerere B8.
^ Rora Ũhoro Muongerere B15.
^ Ũkk., “ariũ a Isiraeli.”
^ Mũkono ũmwe waiganaine na centimita 44.5 (inji 17.5). Rora Ũhoro Muongerere B14.
^ Ũkk., “hekarũ ya nyũmba ĩyo.”
^ Kana “wariĩ.”
^ Kana “mĩkono 20 gũkĩrania wariĩ wa nyũmba ĩyo.”
^ Hakĩaria ũhoro wa Harĩa Hatheru.
^ Ũkk., “ũrĩo.”
^ Ũguo nĩ kuuga, thĩinĩ wa nyũmba ĩyo.
^ Ũguo nĩ kuuga, Harĩa Hatheru, rumu ĩrĩa yarĩ mbere ya Harĩa Hatheru Mũno.
^ Ũkk., “mbaũ cia maguta,” hihi mũcinda-nũgũ wa Aleppo.
^ Ũguo nĩ kuuga, Harĩa Hatheru Mũno.
^ Ũkk., “thĩinĩ na nja.”
^ No kũhoteke nĩ ũrĩa buremu cia mĩrango ciathondekirũo kana nĩ ũrĩa mĩrango yaiganaga.
^ Hakĩaria ũhoro wa Harĩa Hatheru.
^ No kũhoteke nĩ ũrĩa buremu cia mĩrango ciathondekirũo kana nĩ ũrĩa mĩrango yaiganaga.
^ Rora Ũhoro Muongerere B15.
^ Rora Ũhoro Muongerere B15.
