Maũndũ Marĩa Meekirũo nĩ Atũmwo 12:1-25
12 Mahinda-inĩ macio, Mũthamaki Herode akĩambĩrĩria kũnyarira andũ amwe a kĩũngano.+
2 Akĩũraga Jakubu mũrũ wa nyina na Johana+ na rũhiũ rwa njora.+
3 Rĩrĩa oonire atĩ ũndũ ũcio nĩ wakenia Ayahudi, akĩnyitithia Petero o nake. (Kwarĩ hĩndĩ ya mĩthenya ya Mĩgate Ĩtarĩ Mĩimbie.)+
4 Akĩmũnyita na akĩmũikia njera,+ na akĩmũneana kũrĩ ikundi inya cia thigari imũrangĩre igĩcenjanagia, arĩ na muoroto wa kũmũruta amũrehe* mbere ya andũ thutha wa Pasaka. O gĩkundi kĩarĩ na thigari inya.
5 Kwoguo Petero aarĩ njera, no kĩũngano nĩ kĩahoyaga Ngai mũno nĩ ũndũ wake.+
6 Rĩrĩa Herode aarĩ hakuhĩ kũmũruta, ũtukũ ũcio Petero aakomete ohetwo na mĩnyororo ĩĩrĩ arĩ gatagatĩ ga thigari igĩrĩ, na arangĩri maarĩ mũrango-inĩ marangĩire njera ĩyo.
7 No rĩrĩ, mũraika wa Jehova* akĩrũgama hau,+ na ũtheri ũkĩmũrĩka njera thĩinĩ. Akĩgũtha Petero mwena-inĩ, akĩmwarahũra, akĩmwĩra: “Ũkĩra na ihenya!” Nayo mĩnyororo ĩrĩa oohetwo moko nayo ĩkĩgwa.+
8 Mũraika ũcio akĩmwĩra: “Wĩhumbe nguo* na wĩkĩre iratũ.” Nake Petero agĩka ũguo. Ningĩ akĩmwĩra ũũ: “Ĩkĩra nguo yaku ya igũrũ na ũnũmĩrĩre.”
9 Petero akiuma nja na agĩthiĩ na mbere kũmũrũmĩrĩra, no ndaamenyaga atĩ ũguo mũraika eekaga warĩ ũndũ wa ma. Eeciragia nĩ kĩoneki oonaga.
10 Makĩhĩtũka mũrangĩri wa mbere na wa kerĩ, magĩkinya kĩhingo-inĩ gĩa kĩgera kĩrĩa kĩarorete itũũra-inĩ, na gĩkĩĩhingũra kĩo kĩene nĩ ũndũ wao. Marĩkia kuuma nja, magĩikũrũka magereire njĩra ĩmwe, na o hĩndĩ ĩyo mũraika ũcio akĩmũtiga.
11 Nake Petero amenya ũrĩa gwathiaga na mbere, akiuga: “Rĩu nĩ ndamenya na ma atĩ nĩ Jehova* ũtũmire mũraika wake aahonokie kuuma moko-inĩ ma Herode, na kuuma maũndũ-inĩ mothe marĩa Ayahudi mekwĩrĩgĩrĩire mekĩke.”+
12 Thutha wa kũmenya ũguo, agĩthiĩ mũciĩ kwa Mariamu, nyina wa Johana ũrĩa wetagwo Mariko,+ kũrĩa arutwo aingĩ maagomanĩte hamwe makĩhoya.
13 Rĩrĩa aaringaringire mũrango wa kĩhingo, mũirĩtu ũmwe warĩ ndungata kũu wetagwo Roda agĩthiĩ kũhingũra.
14 Amenya mwario wa Petero, agĩkena mũno ũũ atĩ ndaambire kũhingũra kĩhingo, ĩndĩ aateng’erire nyũmba na akĩmeera atĩ Petero aarũgamĩte kĩhingo-inĩ.
15 Nao makĩmwĩra atĩrĩ: “Wee nĩ ũgũrũkĩte.” No we agĩkĩrĩrĩria kuuga araria ma. Makĩambĩrĩria kuuga: “Nĩ mũraika wake.”
16 No Petero agĩikara o hau akĩringaringaga. Rĩrĩa maahingũrire mũrango, makĩmuona na makĩmaka mũno.
17 No we akĩmonia na guoko makire na akĩmeera maũndũ mothe megiĩ ũrĩa Jehova* aamũrutĩte njera, na akĩmeera atĩrĩ: “Mwĩre Jakubu+ na ariũ a Ithe witũ maũndũ macio.” Agĩcoka akiuma agĩthiĩ kũndũ kũngĩ.
18 Na rĩrĩa gwakĩire-rĩ, gũkĩgĩa na ngũĩ gatagatĩ-inĩ ga thigari nĩ ũndũ wa ũrĩa gwekĩkĩte harĩ Petero.
19 Herode akĩmũcaria na kĩyo, na thutha wa kũmwaga, akĩhũnga thigari mahũri na agĩathana ithiĩ ikaherithio;+ agĩcoka agĩikũrũka kuuma Judea agĩthiĩ Kaisarea na agĩikara kuo ihinda rĩigana ũna.
20 Na rĩrĩ, nĩ aarakarĩtio nĩ* andũ a Turo na Sidoni. Nĩ ũndũ ũcio magĩthiĩ kũrĩ we marĩ na muoroto ũmwe, na thutha wa kũiguithia Blasito, ũrĩa warũgamĩrĩire maũndũ ma nyũmba ya mũthamaki,* magĩthaithana magĩe thayũ na mũthamaki, tondũ bũrũri wao warutaga irio kuuma bũrũri-inĩ wa mũthamaki.
21 Mũthenya ũrĩa watuĩtwo wakinya, Herode akĩĩhumba nguo cia ũnene, agĩikarĩra gĩtĩ gĩa ciira na akĩambĩrĩria kwarĩria mũingĩ.
22 Nao andũ arĩa maagomanĩte makĩambĩrĩria kwanĩrĩra: “Ũcio nĩ mũgambo wa ngai, ti wa mũndũ!”
23 O hĩndĩ ĩyo mũraika wa Jehova* akĩrehera Herode ihũũra tondũ ndaagoocithirie Ngai, akĩrĩo nĩ igunyũ na agĩkua.
24 No kiugo kĩa Jehova* gĩgĩthiĩ na mbere gũkũra na gũtherema.+
25 Nao Baranaba+ na Saulu marĩkia kũruta wĩra wa kũheana ũteithio Jerusalemu,+ magĩcoka Antiokia na magĩthiĩ na Johana,+ ũrĩa ningĩ wetagwo Mariko.
Tũũhoro twa magũrũ-inĩ
^ Kana “kũmũruta agaciirithio.”
^ Rora Ũhoro Muongerere A5.
^ Kana “Wĩhotore.”
^ Rora Ũhoro Muongerere A5.
^ Rora Ũhoro Muongerere A5.
^ Kana “nĩ eendaga kũrũa na.”
^ Ũkk., “nyũmba ya toro ya mũthamaki.”
^ Rora Ũhoro Muongerere A5.
^ Rora Ũhoro Muongerere A5.
