Maũndũ Marĩa Meekirũo nĩ Atũmwo 19:1-41
19 Rĩrĩa Apolo+ aarĩ Korintho, Paulo agĩtuĩkanĩria icigo-inĩ cia kũraya na iria agĩthiĩ nginya Efeso.+ Agĩkora arutwo amwe kuo
2 akĩmoria atĩrĩ: “Nĩ mwaamũkĩrire roho mũtheru rĩrĩa mwatuĩkire etĩkia?”+ Nao makĩmũcokeria ũũ: “Ithuĩ tũtirĩ twaigua atĩ nĩ kũrĩ roho mũtheru.”
3 Nĩ ũndũ ũcio akĩmoria: “Mwakĩbatithirio na ũbatithio ũrĩkũ?” Makĩmũcokeria: “Ũbatithio wa Johana.”+
4 Paulo akiuga: “Johana aabatithanagia na ũbatithio ũcio ĩrĩ njĩra ya kuonania kwĩrira,+ akĩmeeraga metĩkie ũrĩa ũngĩokire thutha wake,+ nĩwe Jesu.”
5 Maigua ũguo, makĩbatithio thĩinĩ wa rĩĩtwa rĩa Mwathani Jesu.
6 Na rĩrĩa Paulo aamaigĩrĩire moko, roho mũtheru ũgĩũka igũrũ rĩao,+ nao makĩambĩrĩria kwaria na thiomi ingĩ na kũratha mohoro.+
7 Othe maarĩ arũme ta 12.
8 Na ihinda rĩa mĩeri ĩtatũ, nĩ aathiaga thĩinĩ wa thunagogi+ akaria arĩ na ũcamba akĩheana mĩario na akamaruta ũhoro wĩgiĩ Ũthamaki wa Ngai na akahũthĩra ihooto kũmaiguithia.+
9 No rĩrĩa amwe ao maaregire biũ gwĩtĩkia* na makĩaria ũũru mbere ya andũ igũrũ rĩgiĩ Njĩra Ĩrĩa,+ akĩmeherera+ na akĩeheria arutwo harĩ o, akarutanaga* o mũthenya nyũmba-inĩ ĩrĩa yathomithagĩrio andũ ya Turano.
10 Ũndũ ũcio wathiire na mbere mĩaka ĩĩrĩ, nginya arĩa othe maaikaraga gĩcigo kĩu kĩa Asia makĩigua kiugo kĩa Mwathani, Ayahudi o hamwe na Angiriki.
11 Nake Ngai agĩthiĩ na mbere gwĩka mawĩko ma hinya mũno kũgerera moko ma Paulo,+
12 nginya nguo na itambaya iria ciahutagia mwĩrĩ wake nĩ ciatwaragĩrũo arwaru,+ makahona, na maroho moru makoima.+
13 No Ayahudi amwe arĩa maathiaga makĩrutaga andũ ndaimono o nao nĩ maageragia kũhũthĩra rĩĩtwa rĩa Mwathani Jesu kũruta andũ maroho moru; makoiga: “Ndagwatha thĩinĩ wa rĩĩtwa rĩa Jesu ũrĩa Paulo ahunjagia ũhoro wake.”+
14 Na rĩrĩ, nĩ kwarĩ ariũ mũgwanja meekaga ũguo a Mũyahudi warĩ mũnene wa athĩnjĩri-Ngai wetagwo Sikeva.
15 No roho mũũru ũkĩmacokeria ũkĩmeera: “Nĩ njũĩ Jesu+ na Paulo;+ no inyuĩ mũrĩ a?”
16 Mũndũ ũcio warĩ na roho mũũru akĩmarũgĩra, akĩmakĩria hinya ũmwe thutha wa ũrĩa ũngĩ, na akĩmahoota, makiuma nyũmba ĩyo na makĩũra marĩ njaga na magurarĩtio.
17 Ũndũ ũcio ũkĩmenyeka nĩ andũ othe, Ayahudi o hamwe na Angiriki arĩa maaikaraga Efeso; na othe makĩnyitwo nĩ guoya, narĩo rĩĩtwa rĩa Mwathani Jesu rĩgĩthiĩ na mbere gũtũũgĩrio.
18 Andũ aingĩ arĩa maatuĩkĩte etĩkia mookaga na makoimbũra ciĩko ciao matekũhithĩrĩra.
19 Na andũ aingĩ arĩa meekaga maũndũ na hinya wa ũragũri magĩcokanĩrĩria mabuku mao na makĩmacina andũ othe makĩĩyonagĩra.+ Na magĩtara thogora wa mabuku macio makĩona maarĩ ma icunjĩ 50,000 cia betha.
20 Nĩ ũndũ ũcio, kiugo kĩa Jehova* gĩgĩthiĩ na mbere gũkũra na kũhootana+ na njĩra nene.
21 Thutha wa maũndũ macio gwĩkĩka-rĩ, Paulo agĩtua na ngoro atĩ thutha wa kuuma Makedonia+ na Akaia, nĩ agaathiĩ Jerusalemu.+ Akiuga atĩrĩ: “Ndarĩkia gũkinya kuo, ningĩ no mũhaka ngaathiĩ Roma.”+
22 Kwoguo agĩtũma andũ erĩ harĩ arĩa maamũtungataga mathiĩ Makedonia, nĩo Timotheo+ na Erasito,+ no we mwene agĩikara kũu gĩcigo-inĩ kĩa Asia kwa ihinda.
23 Hĩndĩ ĩyo gũkiumĩra ngũĩ nene+ ĩgiĩ Njĩra Ĩrĩa.+
24 Nĩ gũkorũo mũndũ ũmwe wetagwo Demeterio, mũturi wa indo cia betha ũrĩa wathondekaga tũhekarũ twa betha twa Aritemi, nĩ aatongagia mabundi mũno.+
25 Akĩmacokanĩrĩria marĩ hamwe na andũ angĩ arĩa maathondekaga indo ta icio na akĩmeera: “Athuri aya, nĩ mũĩ wega atĩ ũtonga witũ uumaga biacara-inĩ ĩno.
26 Rĩu nĩ muonete na mũkaigua ũrĩa Paulo ũcio aiguithĩtie andũ aingĩ gũkũ Efeso+ na hakuhĩ gĩcigo gĩothe kĩa Asia, akamaruta ũrutani ũngĩ, akameera atĩ ngai iria ithondeketwo na moko ti cia ma.+
27 Ningĩ-rĩ, to biacara ĩno itũ ĩrĩ ũgwati-inĩ wa kwagĩrũo gĩtĩo no nginya hekarũ ya Aritemi ngai ũrĩa mũnene mũtumia ĩrĩonagwo ĩtarĩ kĩene, nake ngai ũcio ũthathayagio gĩcigo-inĩ gĩothe kĩa Asia na thĩ yothe ĩrĩa ĩikaragwo nĩ egũtunywo riri wake.”
28 Athuri acio maigua ũguo makĩiyũrũo nĩ marakara maingĩ, makĩambĩrĩria kwanĩrĩra: “Aritemi wa Aefeso nĩ mũnene!”
29 Nĩ ũndũ ũcio itũũra rĩu rĩkĩiyũra ngũĩ, na andũ othe magĩteng’era marĩ hamwe magĩthiĩ kĩhaaro* makururĩtie Gayo na Arisitariko,+ andũ a Makedonia arĩa maathiaga na Paulo.
30 Paulo nĩ eendaga kũingĩra kũu thĩinĩ kũrĩ andũ, ĩndĩ arutwo matiamwĩtĩkĩririe.
31 O na atabania amwe a macindano na mathaako arĩa maarĩ arata ake magĩtũmana ndũmĩrĩri kũrĩ we, makĩmũthaitha ndakeingĩrie ũgwati-inĩ wa kũingĩra kĩhaaro-inĩ kĩu.
32 Amwe maanagĩrĩra makoiga ũndũ ũmwe, nao angĩ makoiga ũndũ ũngĩ; tondũ kwarĩ na ngũĩ na aingĩ ao matiamenyaga gĩtũmi gĩa gũkorũo marũrũnganĩte kũu.
33 Magĩkĩruta Aleksanda kĩrĩndĩ-inĩ, nao Ayahudi makĩmũrehe mbere yao, nake akĩmonia na guoko makire tondũ eendaga gwĩtetera harĩ andũ.
34 No rĩrĩa maamenyire atĩ nĩ Mũyahudi, othe makĩambĩrĩria kwanĩrĩra marĩ hamwe ta mathaa merĩ makiugaga: “Aritemi wa Aefeso nĩ mũnene!”
35 Rĩrĩa karani wa itũũra aakiririe kĩrĩndĩ, akiuga: “Athuri aya a Efeso, nũũ ũtoĩ kũna atĩ itũũra rĩa Aefeso nĩrĩo rĩrangagĩra hekarũ ya Aritemi ũrĩa mũnene na mũhianano ũrĩa wagũire kuuma igũrũ?
36 Tondũ maũndũ macio matingĩkararĩka-rĩ, mwagĩrĩirũo kũhoorera na mũtikahĩkĩke gwĩka ũndũ o na ũmwe.
37 Nĩ gũkorũo mũrehete andũ aya haha na o ti aici a indo cia hekarũ na matirumaga ngai witũ.*
38 Hakĩrĩ ũguo-rĩ, angĩkorũo nĩ harĩ ũndũ Demeterio+ na mabundi arĩa angĩ marathitangĩra mũndũ, nĩ mathitangane; nĩ gũkoragwo na mĩthenya ya igooti na nĩ kũrĩ atongoria.*
39 No angĩkorũo nĩ harĩ ũndũ ũngĩ mũracaria ũkĩrĩte ũcio-rĩ, no mũhaka ũtuwo mũcemanio-inĩ wa ndũire.
40 Nĩ gũkorũo kũna tũrĩ ũgwati-inĩ wa gũthitangĩrũo kũregana na thirikari kuumana na maũndũ marĩa mekĩka ũmũthĩ, tondũ gũtirĩ gĩtũmi tũngĩruta gĩa gũkorũo na mũrũrũngano ũyũ.”
41 Na arĩkia kuuga ũguo, akĩniina mũcemanio ũcio.
Tũũhoro twa magũrũ-inĩ
^ Kana “akaheana mĩario.”
^ Kana “maathiire o na mbere kũũmia ngoro na makaga gwĩtĩkia.”
^ Rora Ũhoro Muongerere A5.
^ Nĩ handũ andũ maagomanaga kwĩrorera drama na nyĩmbo. Kĩhaaro kĩu kĩnene thĩinĩ wa Efeso kĩarĩ na itĩ cia mahiga na nĩ kĩngĩaiganĩire andũ ta 25,000.
^ Kana “ngai witũ mũtumia.”
^ Mangavana a Roma a gĩcigo.
