Kũguũrĩrio kwa Johana 13:1-18
13 Nayo* ĩkĩrũgama ĩĩhandĩte mũthanga-inĩ wa iria.
Na ngĩona nyamũ ya gĩthaka+ ĩkĩambata kuuma iria-inĩ,+ na yarĩ na hĩa ikũmi na ciongo mũgwanja, na hĩa-inĩ ciayo yarĩ na thũmbĩ ikũmi ng’emie, no ciongo-inĩ ciayo yarĩ na marĩĩtwa ma kũruma Ngai.
2 Na rĩrĩ, nyamũ ĩyo ya gĩthaka ndonire yahaanaga ngarĩ, no magũrũ mayo maatariĩ ta ma nduba, nako kanua kayo gaatariĩ ta kanua ka mũrũthi. Nayo ndamathia ĩyo+ ĩkĩhe nyamũ ĩyo hinya wayo na gĩtĩ kĩayo kĩa ũnene na wathani mũnene.+
3 Ngĩona atĩ kĩongo kĩmwe kĩayo kĩoonekaga ta kĩarĩ kĩgurarie na kĩronda gĩa gĩkuũ, no kĩronda kĩu gĩa gĩkuũ nĩ kĩahonete,+ na thĩ yothe ĩkĩrũmĩrĩra nyamũ ĩyo ya gĩthaka ĩkenetio nĩyo.
4 Nao magĩthathaiya ndamathia ĩyo tondũ nĩ yaheete nyamũ ĩyo ya gĩthaka wathani, na magĩthathaiya nyamũ ĩyo ya gĩthaka makiugaga ũũ: “Nũũ ũtariĩ ta nyamũ ĩno ya gĩthaka, na nũũ ũngĩhota kũrũa nayo?”
5 Nayo ĩkĩheo kanua kaaragia maũndũ manene o na ma kũruma Ngai, na ĩkĩheo wathani wa gwĩka maũndũ ihinda rĩa mĩeri 42.+
6 Nayo ĩgĩtumũra kanua kayo na irumi+ kwerekera Ngai nĩguo ĩrume rĩĩtwa rĩake na gĩikaro gĩake, arĩa maikaraga igũrũ.+
7 Ĩgĩtĩkĩrio kũrũa mbaara na arĩa aamũre na kũmatooria,+ na ĩkĩheo wathani igũrũ rĩa mĩhĩrĩga yothe na ikundi cia andũ na thiomi na ndũrĩrĩ.
8 Nao arĩa othe matũũraga thĩinĩ wa thĩ nĩ makaamĩthathaiya. Na kuuma o kĩambĩrĩria gĩa thĩ, gũtirĩ o na ũmwe wao ũrĩ wandĩkwo rĩĩtwa rĩake thĩinĩ wa gĩkũnjo kĩa muoyo+ gĩa Gatũrũme o ũcio wathĩnjirũo.+
9 Mũndũ o wothe ũrĩ na gũtũ nĩ aigue.+
10 Mũndũ o wothe wathĩrĩirũo gũtahwo, nĩ agaatahwo. Mũndũ o wothe ũkooragana na rũhiũ rwa njora,* no mũhaka akooragwo na rũhiũ rwa njora.+ Hau nĩho arĩa aamũre+ mabataraga ũkirĩrĩria+ na wĩtĩkio.+
11 Ngĩcoka ngĩona nyamũ ĩngĩ ya gĩthaka ĩkĩambata yumĩte thĩinĩ wa thĩ, na yarĩ na hĩa igĩrĩ ta gatũrũme, no ĩkĩambĩrĩria kwaria ta ndamathia.+
12 Nayo ĩhũthagĩra wathani wothe wa nyamũ ĩrĩa ya mbere ya gĩthaka+ o ĩkĩonagwo nĩyo. Ningĩ nĩ ĩtũmaga thĩ o hamwe na aikari ayo mathathaiye nyamũ ya mbere ya gĩthaka, ĩrĩa kĩronda kĩayo gĩa gĩkuũ kĩahonire.+
13 Na nĩ yonanagia imenyithia nene, nginya gũtũma mwaki ũikũrũke thĩ kuuma igũrũ andũ makĩonaga.
14 Ĩhĩtithagia arĩa maikaraga thĩinĩ wa thĩ kũgerera imenyithia iria yetĩkĩririo kuonania nyamũ ĩyo ya gĩthaka ĩkĩonaga, o ĩkĩraga arĩa maikaraga thĩinĩ wa thĩ mathondeke mũhianano+ wa nyamũ ya gĩthaka ĩrĩa yarĩ na kĩronda kĩa rũhiũ rwa njora no ĩkĩhona.+
15 Ningĩ ĩgĩtĩkĩrio kũhe mũhianano ũcio wa nyamũ ya gĩthaka mĩhũmũ,* nĩguo mũhianano ũcio wa nyamũ ya gĩthaka warie na ũtũme arĩa othe maregaga gũthathaiya mũhianano ũcio wa nyamũ ya gĩthaka moragwo.
16 Na yathaga andũ othe na hinya—anini na anene, arĩa atongu na arĩa athĩni, arĩa marĩ wĩyathi o na ngombo—atĩ magĩrĩirũo gwĩkĩrũo rũũri guoko-inĩ kwao kwa ũrĩo kana thiithi-inĩ,+
17 na atĩ gũtirĩ mũndũ ũngĩgũra kana endie o tiga mũndũ ũrĩ na rũũri rũu, rĩĩtwa+ rĩa nyamũ ĩyo ya gĩthaka kana namba ya rĩĩtwa rĩayo.+
18 Haha nĩho habataraga ũũgĩ: Mũndũ ũrĩa ũrĩ na ũtaũku nĩ atare namba ya nyamũ ĩyo ya gĩthaka, tondũ nĩ namba ya mũndũ, na namba yayo nĩ 666.+
Tũũhoro twa magũrũ-inĩ
^ Nĩ ndamathia.
^ Kana hihi, “Mũndũ wothe wathĩrĩirũo kũũragwo na rũhiũ rwa njora.”
^ Kana “roho.”
