Thaburi 31:1-24
Kũrĩ mũrũgamĩrĩri. Rwĩmbo rwa Daudi.
31 Atĩrĩrĩ Jehova, niĩ njũrĩire harĩ wee.+
Ndũkanareke njonorithio.+
Honokia nĩ ũndũ wa ũthingu waku.+
2 Ndegera gũtũ gwaku.*
Ũka na ihenya ũũhonokie.+
Tuĩka kĩrĩma gĩakwa gĩa kwĩgitia,Ũtuĩke handũ harĩ na ũgitĩri nĩguo ũũhonokie.+
3 Nĩ gũkorũo wee nĩwe ndũmba yakwa ya ihiga na mwĩgitio wakwa;+Nĩ ũrĩndongoragia na ũkanyonereria njĩra+ nĩ ũndũ wa rĩĩtwa rĩaku.+
4 Nĩ ũrĩhatũraga kuuma neti-inĩ ĩrĩa manjigĩire na hitho,+Tondũ wee nĩwe handũ hakwa harĩa hairigĩre.+
5 Nĩ ndaiga roho wakwa guoko-inĩ gwaku.+
Nĩ ũngũũrĩte wee Jehova, Ngai wa ũhoro wa ma.*+
6 Nĩ thũire arĩa merutagĩra harĩ mĩhianano ya tũhũ na ĩtarĩ kĩene,No niĩ-rĩ, ndĩhokaga Jehova.
7 Nĩ ndĩrĩkenaga mũno nĩ ũndũ wa wendo waku mwĩhokeku,Nĩ gũkorũo nĩ wonete mĩnyamaro yakwa;+Nĩ ũĩ mĩtangĩko yakwa ĩrĩa ya thĩinĩ mũno.
8 Ndũũneanĩte harĩ thũ,No ũtũmaga ndũgame handũ harĩ na ũgitĩri.*
9 Njiguĩra tha wee Jehova, nĩ gũkorũo ndĩ na mĩtangĩko.
Kĩeha nĩ gĩtũmĩte maitho makwa mage hinya,+ na mwĩrĩ wakwa wothe o naguo.+
10 Ũtũũro wakwa ũniinĩtwo nĩ kĩeha+Na mĩaka yakwa ĩkaniinwo nĩ gũcaya.+
Hinya wakwa nĩ ũranyiha nĩ ũndũ wa mahĩtia makwa;Namo mahĩndĩ makwa magathira hinya.+
11 Nĩ nyũrũragio nĩ thũ ciakwa ciothe,+Na makĩria andũ a itũũra ritũ.
Na ngetigĩrũo nĩ andũ arĩa tũmenyanĩte nao;Rĩrĩa manyona mũingĩ-inĩ, no kũnjũrĩra manjũragĩra.+
12 Nĩ manjeheretie ngoro-inĩ yao* na makariganĩrũo nĩ niĩ, o ta ndĩ mũkuũ;Haana ta ndigithũ nguũ.
13 Nĩ njiguĩte ndeto nyingĩ njũru cia mũhuhu;Ndigicĩirio nĩ guoya.+
Hĩndĩ ĩrĩa macokanĩrĩra hamwe marĩ kĩndũ kĩmwe nĩguo manjũkĩrĩre,Mabangaga ũrĩa mekũnduta muoyo.+
14 No niĩ nĩwe ndĩhokete, wee Jehova.+
Njugaga atĩrĩ: “Wee nĩwe Ngai wakwa.”+
15 Matukũ* makwa marĩ guoko-inĩ gwaku.
Honokia kuuma guoko-inĩ gwa thũ ciakwa na kuuma harĩ arĩa manyariraga.+
16 Tũma ũthiũ waku warĩre ndungata yaku.+
Honokia kũgerera wendo waku mwĩhokeku.
17 Atĩrĩrĩ Jehova, ndũkareke njonorithio rĩrĩa ndagũkaĩra.+
Andũ arĩa aganu maroconorithio;+Marokirio thĩinĩ wa Mbĩrĩra.*+
18 Mĩromo ĩrĩa ĩheenanagia ĩroremwo nĩ kwaria,+Mĩromo o ĩyo yaragia na mwĩtĩo kwerekera arĩa athingu, ĩkeyambararia na ĩkaria na kĩnyũrũri.
19 Kaĩ wega waku nĩ mũingĩ-ĩ!+
Ũigĩte wega ũcio nĩ ũndũ wa arĩa magwĩtigĩrĩte,+Na nĩ ũwonanĩtie andũ othe makĩĩyonagĩra, ũkawonania harĩ arĩa moragĩra harĩ wee.+
20 Ũrĩmahithaga handũ ha hitho harĩa wee ũrĩ+Ũkamahitha kuuma harĩ njama cia andũ;Ũrĩmahithaga hema-inĩ yakuŨkamagitĩra kuumana na tharĩkĩro cia arĩa mendaga kũmeka ũũru.*+
21 Jehova arogoocwo,Nĩ gũkorũo nĩ anyonetie wendo wake mwĩhokeku na njĩra ya magegania+ ndĩ thĩinĩ wa itũũra irigicĩrie.+
22 Niĩ ndanyitirũo nĩ guoya ngiuga ũũ:
“Nĩ ngũthira njehere mbere yaku.”+
No wee nĩ waiguire mathaithana makwa ma kũhoya ũteithio rĩrĩa ndagũkaĩire.+
23 Endai Jehova, inyuothe arĩa ehokeku harĩ we!+
Jehova nĩ agitagĩra arĩa ehokeku,+No mũndũ wothe wonanagia mwĩtĩo amũrĩhaga na njĩra nene.+
24 Gĩai na ũmĩrĩru, na ngoro cianyu ikorũo na hinya,+Inyuothe arĩa mwetagĩrĩra Jehova.+
Tũũhoro twa magũrũ-inĩ
^ Kana “Inamĩrĩra ũthikĩrĩrie.”
^ Kana “Ngai ũrĩa mwĩhokeku.”
^ Kana “handũ harĩ na wariĩ.”
^ Kana “meciria-inĩ mao.”
^ Ũkk., “Mahinda.”
^ Kana “Sheoli,” ũguo nĩ kuuga, mbĩrĩra ya mũhaano kũrĩa akuũ makomete. Rora Ũthathaũri wa Ciugo.
^ Ũkk., “kuumana na ngũĩ cia nĩmĩ.”
