GĨCUNJĨ KĨA 35

Ingĩka Atĩa Nĩguo Nduĩke Mũrata wa Ngai?

Nĩ ũndũ wa ũndũ mũritũ ũrĩa Jeremy aagereire, nĩ oonire bata wa gũkorũo na ũrata hamwe na Ngai. Ooigire ũũ: “Ndĩ na mĩaka 12, baba nĩ aatũtigire. Ũtukũ ũmwe ngĩhoya ndĩ ũrĩrĩ-inĩ, nĩ ndathaithire Jehova amũteithie acoke.”

Jeremy akuĩte ngoro, nĩ aambĩrĩirie gũthoma Bibilia. Rĩrĩa aathomire Thaburi 10:14 nĩ aahutirio ngoro mũno. Mũhari ũcio uugaga ũũ igũrũ rĩgiĩ Jehova: “Mũndũ ũrĩa ũtarĩ na wa kũmũteithia-rĩ, wee nĩwe ehokaga; wee nĩwe mũteithia wa mwana ũrĩa ũtarĩ ithe.” Jeremy aacokire akiuga: “Ndoonire ta arĩ niĩ Jehova aaragĩria, akĩmenyithia atĩ nĩwe mũndeithia na baba. Gũtirĩ baba ũngĩ mwega ingĩgĩa gũkĩra Jehova.”

O NA angĩkorũo nĩ ũragerera ũndũ ta ũcio Jeremy aagereire kana ndũragerera, Bibilia yonanagia atĩ Jehova nĩ endaga ũtuĩke mũrata wake. O na Bibilia yugaga ũũ: “Kuhĩrĩriai Ngai, nake nĩ ekũmũkuhĩrĩria.” (Jakubu 4:8) Ta wĩcirie ũrĩa ciugo icio ciugĩte: O na gũtuĩka ndũngĩona Jehova, na nĩ mũtũũgĩru mũno gũgũkĩra, nĩ arenda ũtuĩke mũrata wake.

No nĩguo ũgĩe ũrata hamwe na Ngai, nĩ ũrabatara kwĩrutanĩria. Kwa ngerekano: Ũngĩkorũo ũhandĩte ihũa nyũmba, no mũhaka ũrĩmenyerere nĩguo rĩkũre wega. No mũhaka ũrĩheage maĩ kaingĩ na ũrĩige handũ rĩkũhota gũkũra wega. Ũguo noguo ũrata hamwe na Ngai ũkoragwo ũhaana. Ũngĩka atĩa nĩguo ũrata ũcio ũkũre?

Bata wa Kwĩruta Bibilia

Ũrata ũkoragwo ũhutĩtie maũndũ merĩ, nĩmo gũthikĩrĩria na kwaranĩria. Ũguo noguo kũrĩ nĩguo mũndũ agĩe ũrata hamwe na Ngai. Tũthikagĩrĩria ũrĩa Ngai aratwĩra rĩrĩa twathoma na tweruta Bibilia.—Thaburi 1:2, 3.

Nĩ ma, no ũkorũo ũtendete kwĩruta. Andũ aingĩ ethĩ monaga kaba kwĩrorera TV, gũthaaka, kana gũceeranĩra na arata. No angĩkorũo nĩ ũkwenda kũgĩa ũrata hamwe na Ngai, no mũhaka wĩrutanĩrie. Wagĩrĩirũo kũmũthikĩrĩria na njĩra ya gũthoma Kiugo gĩake.

Ndwagĩrĩirũo kũmaka, tondũ kwĩruta Bibilia ti mũrigo. No ũkenere o na angĩkorũo ndwendete gũthoma. Ũndũ wa mbere ũrĩa wagĩrĩirũo nĩ gwĩka, nĩ kũbanga mahinda ma kwĩruta Bibilia. Mũirĩtu ũmwe wĩtagwo Lais ooigire ũũ: “Nĩ ngoragwo na mũtaratara wa gũthoma Bibilia. O mũthenya rũcinĩ nyambaga gũthoma mũrango ũmwe.” Nake Maria, ũrĩa ũrĩ na mĩaka 15, akoragwo na mũtaratara ngũrani. Ooigire ũũ: “Thomaga gacunjĩ kanini ka Bibilia o mũthenya itanathiĩ toro.”

Nĩguo wambĩrĩrie mũtaratara waku wa kwĩruta, rora gathandũkũ karatathi ka 292. Ũcoke wandĩke haha thĩ nĩ rĩ ũngĩenda kũhũthĩra ndagĩka ta 30 ũguo kwĩruta Kiugo kĩa Ngai.

․․․․․

Kũbanga mahinda ma kwĩruta no kĩambĩrĩria. Wambĩrĩria kwĩruta, wahota kuona atĩ kwĩruta Bibilia gũtikoragwo kũrĩ ũndũ mũhũthũ hĩndĩ ciothe. Wahota gwĩtĩkania na Jezreel ũrĩa ũrĩ na mĩaka 11, ũrĩa woigire, “Icunjĩ imwe cia Bibilia ibataraga mũndũ aige meciria make hau agĩthoma na itikoragwo irĩ cia kũgucĩrĩria mũno.” Angĩkorũo nĩ ũiguaga ũguo, ndũgakue ngoro. Hingo ciothe ũgĩthoma Bibilia, koragwo na muonere wa atĩ ũrathikĩrĩria mũrata waku Jehova Ngai agĩkwarĩria. Kĩyo kĩrĩa ũgwĩkĩra ũkĩĩruta Bibilia nĩkĩo gĩgũtũma ũkenere na ũgunĩke kuumana na wĩruti waku.

Mahoya Nĩ ma Bata

Rĩrĩa tũrahoya, tũkoragwo tũkĩaria na Ngai. Ta wĩcirie ũrĩa mahoya arĩ kĩheo kĩa bata! No warie na Jehova Ngai ihinda o rĩothe mũthenya kana ũtukũ. Hingo ciothe akoragwo ehaarĩirie gũgũthikĩrĩria. Makĩria ma ũguo, nĩ endaga kũigua ũndũ ũrĩa ũrenda kũmwĩra. Nĩkĩo Bibilia ĩtwĩraga ũũ: “Maũndũ-inĩ mothe menyithagiai Ngai maũndũ marĩa mũbataraga kũgerera mahoya na mathaithana o hamwe na gũcokia ngatho.”—Afilipi 4:6.

O ta ũrĩa rĩandĩko rĩu rĩronania, nĩ kũrĩ maũndũ maingĩ ũngĩra Jehova. No ũmwĩre nginya mathĩna maku na maũndũ marĩa maragũtanga. Ningĩ no ũmũcokerie ngatho nĩ ũndũ wa maũndũ marĩa magũkenagia. Na githĩ ndũcokagĩria arata aku ngatho nĩ ũndũ wa maũndũ mega marĩa magwĩkĩire? O na Jehova nĩ wagĩrĩirũo kũmũcokeria ngatho, tondũ nĩ agwĩkĩire maũndũ maingĩ gũkĩra marĩa mũrata ũngĩ o wothe angĩgwĩkĩra.—Thaburi 106:1.

Andĩka haha thĩ maũndũ mamwe marĩa ũngĩenda gũcokeria Jehova ngatho nĩ ũndũ wamo.

․․․․․

Hatarĩ nganja rĩmwe na rĩmwe nĩ ũkoragwo na maũndũ maratũma wĩtigĩre na ũtangĩke. Thaburi 55:22 yugaga: “Ikagĩria Jehova mũrigo waku, na nĩ arĩgũtiiragĩrĩra. Gũtirĩ hĩndĩ akaareka mũndũ ũrĩa mũthingu agwe.”

Raini-inĩ ici irĩ haha thĩ, andĩka maũndũ marĩa maragũtanga marĩa ũngĩenda kũgweta mahoya-inĩ.

․․․․․

Maũndũ Marĩa Wĩyoneire

Nĩ harĩ ũndũ ũngĩ wĩgiĩ ũrata waku hamwe na Ngai ũtagĩrĩirũo kũhũthia. Daudi aandĩkire ũũ: “Camai muone atĩ Jehova nĩ mwega.” (Thaburi 34:8) Rĩrĩa Daudi aandĩkire Thaburi 34, aakoretwo agerera ũndũ watũmĩte etigĩre. Ooragĩra Mũthamaki Saulu ũrĩa wendaga kũmũũraga, na ũndũ ũcio nĩ watũmaga atangĩke mũno. Aabatarire gũthiĩ kwĩhitha gĩcigo-inĩ kĩa Afilisti arĩa maarĩ thũ ciao. Hĩndĩ ĩmwe nĩ aang’ethanĩire na gĩkuũ na kwoguo agĩĩtua mũgũrũki na akĩhota kũhonokia muoyo wake.—1 Samueli 21:10-15.

Handũ ha kuona ta arĩ ũũgĩ wake watũmĩte ahonoke, Daudi nĩ oonire atĩ Jehova nĩwe wamũhonoketie. Atanagweta ciugo cia Thaburi 34:8, aaugĩte ũũ: “Ndatuĩririe ũhoro harĩ Jehova, nake akĩnjokeria. Aahonokirie kuuma harĩ maũndũ mothe marĩa maanjĩkĩraga guoya.” (Thaburi 34:4) Kwoguo nĩ ũndũ wa maũndũ marĩa Daudi eeyoneire, nĩkĩo eekĩrire andũ ngoro ‘macame mone atĩ Jehova nĩ mwega.’ *

Hihi nĩ harĩ ũndũ wĩyoneire ũtũũro-inĩ waku wonanagia atĩ Jehova nĩ akũrũmbũyagia? Angĩkorũo nĩ harĩ, andĩka ũndũ ũcio haha thĩ. Kaũndũ kangĩgũteithia: To mũhaka ũkorũo ũrĩ ũndũ mũnene. Geria gwĩciria tũmaũndũ tũnini tũrĩa Jehova agwĩkagĩra o mũthenya, tũrĩa mũndũ angĩhiũha kũhũthia.

․․․․․

No gũkorũo aciari aku nĩ makũrutĩte ũhoro wa Bibilia. Angĩkorũo nĩ mekĩte ũguo, kĩu nĩ kĩrathimo. O na kũrĩ ũguo, wee mwene nĩ ũrabatara gũkũria ũrata hamwe na Ngai. Angĩkorũo ndwĩkĩte ũguo, ũhoro ũrĩa ũrĩ gĩcunjĩ-inĩ gĩkĩ no ũgũteithie gwĩka ũguo. Jehova nĩ ekũrathima kĩyo gĩaku. Bibilia yugaga ũũ: “Thiĩi na mbere kũhoya, na nĩ mũkũheo; thiĩi na mbere gũcaria, na nĩ mũkuona.”—Mathayo 7:7.

NĨGUO WONE ŨHORO MAKĨRIA WĨGIĨ ŨNDŨ ŨYŨ, THOMA MBUKU YA 1 GĨCUNJĨ KĨA 38 NA 39

GĨCUNJĨ-INĨ KĨRĨA KĨRŨMĨRĨIRE

Nĩ wonaga ũrĩ ũndũ mũritũ kwĩra andũ arĩa angĩ ũhoro wĩgiĩ Ngai? Thoma wone ũrĩa ũngĩtetera wĩtĩkio waku.

[Kohoro ka magũrũ-inĩ]

RĨANDĨKO RĨA MŨTHINGI

“Gũkena-rĩ, nĩ arĩa marũmbũyagia mabataro mao ma kĩĩroho.”​—Mathayo 5:3.

ŨNDŨ ŨNGĨKA

Ũngĩthomaga tũratathi tũna twa Bibilia o mũthenya, no ũrĩkie kũmĩthoma na kĩndũ mwaka ũmwe.

HIHI NĨ ŨĨ . . . ?

Gũkorũo atĩ nĩ ũrathoma ibuku rĩrĩ na ũkarũmĩrĩra ũtaaro wa Bibilia ũrĩa ũrĩ thĩinĩ warĩo kũronania atĩ Jehova nĩ arakenio nĩwe.—Johana 6:44.

MAKINYA MARĨA ŨNGĨOYA!

Nĩguo hote kũgunĩka makĩria na wĩruti wakwa wa Bibilia, ngwĩka ũũ ․․․․․

Nĩguo hotage kũhoya maita maingĩ, ngwĩka ũũ ․․․․․

Ũndũ ũrĩa ingĩenda kũũria aciari akwa wĩgiĩ ũhoro ũyũ nĩ ․․․․․

ŨGWĨCIRIA ATĨA?

● Ũngĩka atĩa nĩguo ũkenere wĩruti waku wa Bibilia makĩria?

● Nĩ kĩĩ gĩtũmaga Jehova athikĩrĩrie mahoya ma andũ matarĩ akinyanĩru?

● Ũngĩagagĩria mahoya maku atĩa?

 

‘‘Rĩrĩa ndaarĩ mũnini, ndaacokagĩra maũndũ o marĩa marĩa ngĩhoya. Rĩu ngĩhoya, nĩ ngwetaga maũndũ mega na moru marĩa njemanagia namo o mũthenya. Tondũ gũtirĩ mĩthenya ĩĩrĩ ĩhaanaine, ũndũ ũcio nĩ ũndeithagia kwaga gũcokera maũndũ o marĩa marĩa.’’—Eve

[Gathandũkũ]

Thoma Bibilia na kinyi

1. Thuura rũgano rwa Bibilia rũrĩa ũngĩenda gũthoma. Hoya Jehova agũteithie gũtaũkĩrũo nĩ kĩrĩa ũrathoma.

2. Thoma rũgano rũu na kinyi. Ndũgathome na ihenya. Ũgĩthoma, geria kũhũũra mbica. Geria kũrora maũndũ marĩa marekĩka, kũigua mĩgambo ya arĩa marĩ rũgano-inĩ rũu, kũnungĩra rĩera, gũcama irio, na maũndũ mangĩ ta macio. Reke rũgano rũu rũingĩre biũ meciria-inĩ maku!

3. Wĩcirie ũhoro wa maũndũ marĩa wakorũo wathoma. Wĩyũrie ciũria ta ici:

● Nĩ kĩĩ gĩatũmire Jehova andĩkithie rũgano rũrũ thĩinĩ wa Kiugo gĩake?

● Nĩ andũ arĩkũ ingĩĩgerekania nao, na nĩ arĩkũ maarĩ cionereria njũru?

● Nĩ maũndũ marĩkũ ndĩreruta kuumana na rũgano rũrũ?

● Rũgano rũrũ rũranduta atĩa igũrũ rĩgiĩ Jehova na ũrĩa ekaga maũndũ?

4. Hoya Jehova mahoya makuhĩ. Mwĩre maũndũ marĩa weruta ũgĩthoma Bibilia na ũrĩa ũrabanga kũmahũthĩra ũtũũro-inĩ waku. Mũcokagĩrie ngatho hingo ciothe nĩ ũndũ wa kĩheo kĩrĩa akũheete, Kiugo gĩake Bibilia.

[Mbica]

“Kiugo gĩaku nĩ tawa wa kũgũrũ gwakwa, na ũtheri wa njĩra yakwa.”—Thaburi 119:105.

[Gathandũkũ]

Igaga maũndũ marĩa ma bata mbere

Hihi nĩ wagaga mahinda ma kũhoya kana kwĩruta Bibilia? Kaingĩ kũringanaga na maũndũ marĩa ũigaga mbere.

Geria gwĩka ũũ: Oya ndoo, wĩkĩre mahiga manene maigana ũna. Ũcoke ũiyũrie ndoo ĩyo mũthanga nginya igũrũ biũ. Ndoo ĩyo ĩgũkorũo ĩiyũrĩte mahiga na mũthanga.

Rĩu coka ũrute mahiga macio na mũthanga ũciige handũ. Geria gũciĩkĩra ndoo-inĩ rĩngĩ, no riita rĩrĩ wambĩrĩrie na mũthanga, ũcoke wĩkĩre mahiga. Hihi mahiga nĩ maiganĩra? Maga kũiganĩra tondũ wambĩrĩra na mũthanga.

Tũreruta atĩa? Bibilia yugaga ũũ: “Mũkũũranage maũndũ marĩa ma bata makĩria.” (Afilipi 1:10) Ũngĩiga tũmaũndũ tũnini mbere ta maũndũ ma gwĩkenia, ndũrĩkoragwo na mahinda ma gwĩka maũndũ manene, na nĩmo maũndũ ma kĩĩroho. No ũngĩrũmĩrĩra ũtaaro wa Bibilia, nĩ ũkuona atĩ nĩ ũrĩkoragwo na mahinda ma gwĩka maũndũ ma kĩĩroho na maũndũ ma gwĩkenia. Gũkũringana na maũndũ marĩa ũkũiga mbere.

 

O ta ũrĩa ihũa rĩhandĩtwo nyũmba rĩbataraga kũmenyererũo, ũrata hamwe na Ngai nĩ ũbataraga kĩyo