ITHOMO RĨA 3
Hihi Kũna Ũhoro Ũrĩa Mwega Uumĩte Kũrĩ Ngai?
1. Mũtungi wa Bibilia nũũ?
Ũhoro ũrĩa mwega atĩ andũ nĩ magaatũũra thĩinĩ wa thĩ tene na tene wandĩkĩtwo thĩinĩ wa Bibilia. (Thaburi 37:29) Bibilia ĩkoragwo na mabuku 66. Ngai aahũthĩrire andũ ta 40 ehokeku kwandĩka mabuku macio. Mabuku ma mbere matano maandĩkirũo nĩ Musa mĩaka ta 3,500 mĩhĩtũku. Ibuku rĩa mũico rĩaandĩkirũo nĩ mũtũmwo Johana makĩria ma mĩaka 1,900 mĩhĩtũku. Andĩki a Bibilia maarutaga kũ ũhoro ũcio maandĩkaga? Ngai aaranagĩria na andĩki a Bibilia kũgerera roho wake mũtheru. (2 Samueli 23:2) Maandĩkire ũhoro ũrĩa woimaga meciria-inĩ ma Ngai, no ti mao. Nĩ ũndũ ũcio, Jehova nĩwe Mũtungi wa Bibilia.—Thoma 2 Timotheo 3:16; 2 Petero 1:20, 21.
Wĩrorere video ya Mũtungi wa Bibilia nũũ?
2. Tũngĩkorũo na ma atĩa atĩ Bibilia nĩ ya ma?
Tũmenyaga atĩ Bibilia yumĩte kũrĩ Ngai tondũ ĩrathaga ũhoro wa mahinda marĩa maroka ĩtekũhĩtia o na hanini. Gũtirĩ mũndũ ũngĩhota gwĩka ũguo. (Joshua 23:14) Ngai Mwene-Hinya-Wothe nowe ũngĩmenya ũhoro wa mahinda marĩa maroka megiĩ andũ atekũhĩtia.—Thoma Isaia 42:9; 46:10.
Tũngĩrĩgĩrĩra ibuku riumĩte kũrĩ Ngai rĩkorũo rĩrĩ rĩa mwanya, na ũguo nĩguo Bibilia ĩtariĩ. Kobĩ bilioni nyingĩ cia Bibilia nĩ ikinyĩirio andũ na thiomi nyingĩ mũno. O na gũtuĩka Bibilia nĩ ibuku rĩa tene mũno, nĩ ĩtwaranaga na maũndũ ma sayansi marĩa mamenyekete nĩ ma ma. Ningĩ andũ 40 arĩa maandĩkire Bibilia, maandĩkire maũndũ maratwarana. * Makĩria ma ũguo, maũndũ marĩa yaragia megiĩ wendo no makorirũo moimanĩte tu na Ngai ũrĩa wa ma—Ngai ũrĩ wendo, na ningĩ nĩ ĩkoragwo na ũhoti wa kũgarũra mĩtũũrĩre ya andũ ĩkagĩra. Maũndũ macio matũmaga andũ milioni nyingĩ makorũo na ma atĩ Bibilia nĩ Kiugo kĩa Ngai.—Thoma 1 Athesalonike 2:13.
Wĩrorere video ya Tũngĩkorũo Na Ma Atĩa Atĩ Bibilia Nĩ ya Ma?
3. Bibilia ĩkoragwo na ũhoro ũrĩkũ?
Ũhoro ũmwe wa bata ũkoragwo thĩinĩ wa Bibilia nĩ atĩ Ngai nĩ akoragwo na muoroto mwega harĩ andũ. Maandĩko nĩ mataaragĩria ũrĩa kĩambĩrĩria-inĩ mũndũ aateire mweke wa gũtũũra thĩinĩ wa paradiso gũkũ thĩ, na ũrĩa thutha-inĩ paradiso ĩgaacokio. —Thoma Kũguũrĩrio 21:4, 5.
Ningĩ Kiugo kĩa Ngai nĩ gĩkoragwo na mawatho na motaaro. Makĩria ma ũguo, Bibilia nĩ yonanagia ũrĩa Ngai kuuma o tene akoretwo akĩrũmbũyania na andũ, na ũndũ ũcio nĩ ũguũragia ũrĩa Ngai atariĩ. Nĩ ũndũ ũcio Bibilia no ĩgũteithie kũmenya Ngai. Nĩ ĩtaaragĩria ũrĩa ũngĩtuĩka mũrata wake.Thoma Thaburi 19:7, 11; Jakubu 2:23; 4:8.
4. Ũngĩtaũkĩrũo nĩ Bibilia atĩa?
Kabuku gaka gegũgũteithia ũtaũkĩrũo nĩ Bibilia kũgerera njĩra o ta ĩrĩa Jesu aahũthagĩra. Jesu aambaga kuoya mũhari ũmwe wa Bibilia na agataarĩria andũ nĩguo “mataũkĩrũo nĩ Maandĩko macio.”Thoma Luka 24:27, 45.
Ũhoro ũrĩa mwega kuuma kũrĩ Ngai nĩ ũrehaga gĩkeno kĩnene. O na kũrĩ ũguo, andũ amwe nĩ maũregaga, na angĩ nginya makarakario nĩguo. Ndũgakue ngoro. Kĩĩrĩgĩrĩro gĩaku gĩa gũkaagĩa na muoyo wa tene na tene kĩĩhocetie harĩ wee kũmenya Ngai.—Thoma Johana 17:3.
^ kĩb. 3 Rora kabuku Kitabu kwa Ajili ya Watu Wote.
