1, 2. (a) Nĩkĩ rĩmwe no akorũo arĩ ũndũ mũritũ mũno gwĩtĩkia atĩ thĩ nĩ ĩgaatuĩka Paradiso? (b) Nĩ kĩĩ kĩngĩtũteithia gwĩkĩra hinya wĩtĩkio witũ harĩ ciĩranĩro cia Ngai?

 TA HŨŨRA mbica mũrũ wa Ithe witũ mwĩhokeku agĩkinya mĩcemanio-inĩ, ahũrĩkĩte nĩ kũruta wĩra mũthenya ũcio. Aatinda agĩthumbũrũo nĩ mũmwandĩki, arĩ na mĩtangĩko nĩ ũndũ wa moritũ marĩa arĩ namo akĩrũmbũiya famĩlĩ yake, na ningĩ nĩ ũndũ wa mũrimũ ũrĩa mũtumia wake arĩ naguo. Rwĩmbo rwa mbere rwa mĩcemanio rwambĩrĩria kũhũũrũo, akaigua acokwo nĩ thayũ, nĩ gũkorũo arĩ thĩinĩ wa Nyũmba ya Ũthamaki hamwe na aarĩ na ariũ a Ithe witũ. Rwĩmbo rũu rũkoniĩ kĩĩrĩgĩrĩro kĩa muoyo thĩinĩ wa Paradiso, na ciugo ciaruo iramwĩkĩra ngoro ahũũre mbica ĩgiĩ kĩĩrĩgĩrĩro kĩu, eyone arĩ thĩinĩ wa thĩ njerũ. Nĩ endete rwĩmbo rũu mũno, na akĩrũina hamwe na famĩlĩ yake, akaigua omĩrĩrio nĩ kĩĩrĩgĩrĩro kĩu kĩa mahinda mokĩte.

² Hihi wee nĩ ũrĩ waigua ũndũ ta ũcio? Aingĩ aitũ twanaigua. Ũrĩa kũrĩ nĩ atĩ, ũtũũro thĩinĩ wa thĩ ĩno no ũtũme ũkorũo ũrĩ ũndũ mũritũ mũno harĩ ithuĩ gwĩtĩkia atĩ thĩ nĩ ĩgaatuĩka Paradiso. Tũratũũra “mahinda ma ũgwati maritũ kũhiũrania namo” na thĩ ĩrĩa tũraikara ti paradiso. (2 Tim. 3:1, New World Translation) Nĩ kĩĩ kĩngĩtũteithia gwĩtĩkia atĩ kĩĩrĩgĩrĩro gitũ nĩ gĩkaahinga? Tũmenyaga atĩa na ma atĩ ica ikuhĩ Ũthamaki wa Ngai nĩ ũgwatha thĩ yothe? Reke tũthuthurie morathi maigana ũna kuuma kũrĩ Jehova marĩa andũ ake a tene meeyoneire makĩhinga. Thutha ũcio nĩ tũkuona ũrĩa morathi macio na mangĩ mahaana o ta mo marahingio na njĩra nene mahinda maya. Wĩtĩkio witũ warĩkia gwĩkĩrũo hinya, nĩ tũkuona ũrĩa morathi ta macio mahutagia ũtũũro witũ wa mahinda mokĩte.

3. Nĩ kĩĩrĩgĩrĩro kĩrĩkũ kĩomagĩrĩria Ayahudi arĩa maatũũraga ithamĩrio Babuloni?

³ Ta geria gwĩciria ũrĩa ũtũũro wahaanaga harĩ Ayahudi arĩa maarĩ ithamĩrio Babuloni karine-inĩ ya gatandatũ mbere ya Kristo. Aingĩ maarereirũo kũu ithamĩrio o ta aciari ao, na ũtũũro ndwarĩ mũhũthũ. Ababuloni nĩ maamanyũrũragia nĩ ũndũ wa wĩtĩkio wao harĩ Jehova. (Thab. 137:1-3) Mĩaka-inĩ ĩyo yothe, Ayahudi arĩa ehokeku maatũire marũmĩtie kĩĩrĩgĩrĩro gĩkĩ: Jehova nĩ eeranĩire atĩ nĩ angĩgaacokia andũ ake bũrũri-inĩ wao. Jehova oigĩte atĩ maũndũ mangĩarĩ mega mũno bũrũri-inĩ ũcio. O na  akĩringithania bũrũri ũcio wa Juda na mũgũnda wa Edeni, kana paradiso! (Thoma Isaia 51:3.) Muoroto wa ciĩranĩro ta icio warĩ gũteithia andũ a Ngai metĩkie, nĩguo meherie nganja iria mangĩarĩ nacio thĩinĩ wa ngoro ciao. Na njĩra ĩrĩkũ? Reke tuone morathi maigana ũna.

4. Jehova omĩrĩirie Ayahudi atĩa ũhoro-inĩ wĩgiĩ ũgitĩri bũrũri-inĩ wao?

⁴ Ũgitĩri. Andũ acio maarĩ ithamĩrio matingĩacokire thĩinĩ wa paradiso, no mangĩacokire bũrũri wa kũraihu ũrĩa watũũrĩte ũrĩ maganjo mĩaka 70, na nĩ anini mũno gatagatĩ-inĩ kao maawonete hau kabere. Hĩndĩ ĩyo ya tene, mĩrũthi, njũi, ngarĩ, na nyamũ ingĩ ndĩani ciakoragwo irĩ nyingĩ. Mũthuri nĩ angĩeyũririe atĩrĩ, ‘Ndĩrĩkaga atĩa nĩguo ngitĩre mũtumia na ciana ciakwa? Ĩ nacio ngʼombe na mbũri-rĩ, ndĩrĩcigitagĩra atĩa?’ Mũndũ ndangĩagire kwĩyũria ciũria ta icio. No ta wĩcirie igũrũ rĩgiĩ kĩĩranĩro kĩa Ngai thĩinĩ wa Isaia 11:6-9, na ũrĩa kĩngĩakorirũo gĩkĩmomĩrĩria. (Thoma.) Kũhĩtũkĩra ciugo icio, Jehova nĩ omĩrĩirie arĩa maarĩ ithamĩrio atĩ nĩ angĩamagitĩire hamwe na mahiũ mao. Mũrũthi ũngĩarĩire nyeki na njĩra ya atĩ ndũngĩarĩire mahiũ ma Ayahudi acio. Arĩa maarĩ ehokeku matiarĩ na gĩtũmi gĩa gwĩtigĩra nyamũ icio. Jehova eeranĩire atĩ andũ ake nĩ mangĩarĩ na ũgitĩri bũrũri-inĩ ũcio mwerũ wa Juda, o na marĩ werũ-inĩ na mũtitũ-inĩ.​—Ezek. 34:25.

5. Nĩ morathi marĩkũ maateithirie Ayahudi acio maacokaga kuuma ithamĩrio metĩkie atĩ Jehova nĩ angĩarũmbũirie mabataro mao na njĩra nene?

⁵ Bũũthi. Kũrĩ ciũria ingĩ mũndũ angĩeyũririe. ‘Hihi nĩ ngaahotaga kũhe famĩlĩ yakwa gĩa kũrĩa bũrũri-inĩ ũcio mwerũ? Tũgaikaraga kũ? Hihi nĩ ngona wĩra, na hihi nĩ ũgaakorũo ũrĩ mwega gũkĩra ũrĩa tũraruta gũkũ ithamĩrio rungu rwa Ababuloni?’ Na njĩra ya wendo, Jehova nĩ aacokirie ciũria icio o na cio kũgerera morathi marĩa maatongoririo nĩ roho. Jehova nĩ eeranĩire atĩ gũtirĩ hĩndĩ andũ ake athĩki mangĩagire mbura; na nĩ ũndũ ũcio, tĩĩri nĩ ũngĩoimaga irio “itunguhĩte na ikaingĩha.” (Isa. 30:23) Ũhoro-inĩ wĩgiĩ gwa gũikara na wĩra mwega, Jehova eerĩire andũ ake ũũ: “Nao nĩmagaaka nyũmba, na macitũũre, na mahande mĩgũnda ya mĩthabibũ, o na marĩage maciaro mayo. Matigaaka nyũmba, na icokage gũtũũrũo nĩ andũ angĩ, o na kana mahande irio, icokage kũrĩo nĩ andũ angĩ.” (Isa. 65:21, 22) Ma nĩ atĩ, ũtũũro ũngĩarĩ mwega na njĩra nyingĩ ũringithanĩtio na ũrĩa wa Babuloni, kũrĩa gwathathayagio ngai cia maheeni. Ĩ ũhoro-inĩ wĩgiĩ mathĩna mao marĩa maarĩ manene, marĩa maatũmĩte matwarũo ithamĩrio?

6. Nĩ mĩrimũ ya mũthemba ũrĩkũ andũ a Ngai maakoretwo nayo ihinda inene, na Jehova aamomĩrĩirie atĩa?

⁶ Ũgima mwega wa kĩĩroho. Mĩaka mĩingĩ matanatwarũo ithamĩrio, andũ a Ngai nĩ morĩtwo nĩ hinya kĩĩroho. Jehova eerire andũ ake ũũ kũgerera mũnabii Isaia: “Mũtwe wothe nĩ mũrũaru, na ngoro yothe ĩkaringĩka.” (Isa. 1:5) Maarĩ itumumu na itaigua na njĩra ya kĩĩroho, tondũ maahingaga matũ mao matikaigue motaaro ma Jehova na makahinga maitho mao matikone ũtongoria wake. (Isa. 6:10; Jer. 5:21; Ezek. 12:2) Andũ arĩa maacokaga kuuma ithamĩrio mangĩakorirũo na mathĩna ta macio-rĩ, hihi  Jehova nĩ angĩamagitĩire? Na githĩ matingĩagire gwĩtĩkĩrĩka nĩ Jehova o rĩngĩ? Kĩĩranĩro gĩkĩ kĩa Jehova nĩ kĩamomĩrĩirie mũno: “Mũthenya ũcio-rĩ, andũ arĩa morĩte matũ nĩmakaigua mohoro ma ibuku, o namo maitho ma atumumu matige kuona na mairia o na nduma.” (Isa. 29:18) Hatarĩ nganja, Jehova nĩ angĩahonirie andũ ake kĩĩroho, tondũ nĩ maarũithĩtio na makerira. Mangĩatũũrire marĩ athĩki, nĩ angĩamaheaga motaaro mega ma kũmatongoria ũtũũro-inĩ wao.

7. Ciĩranĩro cia Ngai kũrĩ andũ ake arĩa maarĩ ithamĩrio ciahingirio atĩa, na nĩkĩ ũndũ ũcio nĩ wĩkĩraga hinya wĩtĩkio witũ?

⁷ Hihi Jehova nĩ aahingirie ciĩranĩro icio ciake? Maũndũ marĩa meekĩkire no matũteithie gũcokia kĩũria kĩu. Ayahudi arĩa maacokire kwao kuuma ithamĩrio nĩ maarathimirũo na ũgitĩri, bũũthi, na ũgima mwega wa kĩĩroho. Kwa mũhaano, Jehova nĩ aamagitĩrire matigatharĩkĩrũo nĩ andũ a matũũra marĩa maamathiũrũrũkĩirie, arĩa maarĩ aingĩ na maarĩ na hinya kũmakĩra. O namo mahiũ mao matianinirũo nĩ nyamũ ndĩani. Ayahudi acio nĩ meeyoneire na njĩra nini kũhinga kwa morathi megiĩ paradiso marĩa andũ ta Isaia, Jeremia na Ezekieli maandĩkĩte, no kũhinga kũu andũ a Ngai meeyoneire nĩkuo maabataraga ihinda-inĩ rĩu, na nĩ kwamareheire gĩkeno kĩingĩ. Twecũrania maũndũ marĩa Ngai eekĩire andũ ake hĩndĩ ĩyo, wĩtĩkio witũ nĩ ũkũgĩa na hinya makĩria. Angĩkorũo morathi macio nĩ maarehire gĩkeno kĩingĩ rĩrĩa maahingire na njĩra nini riita rĩa mbere-rĩ, ĩ rĩrĩa mangĩkaahinga na njĩra nene? Reke tuone maũndũ marĩa Jehova atwĩkĩire ũmũthĩ.

8. Andũ a Jehova ũmũthĩ maratũũra “bũrũri” wa mũthemba ũrĩkũ?

⁸ Andũ a Jehova ũmũthĩ ti a rũrĩrĩ rũmwe ta Aisiraeli, ningĩ matiikaraga bũrũri ũmwe. Handũ ha ũguo, Akristiano arĩa aitĩrĩrie maguta nĩo rũrĩrĩ rwa kĩĩroho, “Aisiraeli arĩa a Ngai.” (Gal. 6:16) Arĩa a “ngʼondu ingĩ” nĩ maikaranagia nao ‘bũrũri-inĩ’ wa kĩĩroho, kũrĩa mathathayagia Jehova Ngai marĩ hamwe. Ĩyo nĩyo njĩra yao ya ũtũũro. (Joh. 10:16; Isa. 66:8) Hihi nĩ “bũrũri” wa mũthemba ũrĩkũ Jehova atũheete? Nĩ paradiso ya kĩĩroho. Bũrũri-inĩ ũcio, ciĩranĩro cia Ngai ciĩgiĩ paradiso nĩ ihingĩte na njĩra nene kĩĩroho. Reke tuone ngerekano cigana ũna.

9, 10. (a) Ũrathi wa Isaia 11:6-9 ũrahingio atĩa ũmũthĩ? (b) Nĩ ũndũ ũrĩkũ wonanagia atĩ andũ a Ngai nĩ makoragwo na thayũ?

⁹ Ũgitĩri. Ũrathi ũrĩa ũrĩ thĩinĩ wa Isaia 11:6-9 nĩ ũtuonagia mbica njega ya thayũ na ũgitĩri​—gatagatĩ-inĩ ka nyamũ cia gĩthaka, na gatagatĩ ka andũ na nyamũ iria cikaraga mĩciĩ. Hihi maũndũ macio nĩ marahinga na njĩra ya kĩĩroho ũmũthĩ? Ĩĩ nĩ marahinga! Mũhari wa 9 nĩ wonanĩtie kĩrĩa kĩngĩgaatũma kwage kũgeranwo ngero: “Nĩ gũkorũo thĩ yothe nĩĩkaiyũrũo nĩ ũhoro wa kũmenya Jehova o ta ũrĩa maĩ maiyũrĩte iria-inĩ.” Hihi “kũmenya Jehova” no gũcenjie ũrĩa nyamũ ikoragwo? Aca, andũ nĩo magarũragwo mamenya Ngai Ũrĩa wĩ Igũrũ Mũno na meruta kwĩgerekania na njĩra ciake cia thayũ. Nĩkĩo ũmũthĩ ũyũ thĩinĩ  wa paradiso itũ ya kĩĩroho, nĩ tuonaga kũhingio kwa ũrathi ũcio na njĩra nene. Rungu rwa wathani wa Ũthamaki, arũmĩrĩri a Kristo nĩ mareruta kweheria ngumo ciao iria ingĩringithanio na cia nyamũ, na gũikarania hamwe na aarĩ na ariũ a Ithe witũ arĩa angĩ na thayũ.

¹⁰ Kwa mũhaano, thĩinĩ wa ibuku rĩrĩ nĩ twarĩrĩirie ũrĩa Akristiano matanyitaga mbaru mwena o wothe gĩũteti​—tũkona Maandĩko marĩa matũteithagia gwĩka ũguo na maũndũ marĩa andũ a Ngai manacemania namo nĩ ũndũ wa kwaga kũnyita mbaru mwena o wothe. Na githĩ ti ũndũ wa bata kuona atĩ thĩinĩ wa thĩ ĩno ĩiyũire ngũĩ, kũrĩ na andũ gĩkundi kĩnene maregaga kwĩingĩria thĩinĩ wa ngũĩ o ciothe o na rĩrĩa mĩoyo yao ĩrĩ ũgwati-inĩ? Ũndũ ũcio nĩ wonanagia wega atĩ hatarĩ nganja raiya a Mũthamaki wa Kĩĩmesia nĩ marakenera thayũ ta ũrĩa ũtaarĩirio nĩ Isaia! Jesu oigire atĩ arũmĩrĩri ake mangĩkaamenyeka nĩ ũndũ wa wendo ũrĩa mangĩgakorũo naguo gatagatĩ-inĩ kao. (Joh. 13:34, 35) Thĩinĩ wa kĩũngano, Kristo nĩ arahũthĩra “ngombo ĩrĩa ĩĩhokekete na njũgĩ” arĩ na ũkirĩrĩria kũruta Akristiano othe a ma gũkorũo na thayũ, wendo, na ũhooreri.​—Mat. 24:45-47.

11, 12. Nĩ ngʼaragu ya mũthemba ũrĩkũ ĩgũmĩire thĩ ũmũthĩ, no Jehova ahũnĩtie andũ ake atĩa kĩĩroho?

¹¹ Bũũthi. Kũrĩ na ngʼaragu nene ya kĩĩroho thĩinĩ wa thĩ. Bibilia yarathĩte atĩrĩ: “Mwathani Jehova ekuuga ũũ: Atĩrĩrĩi, matukũ nĩmaroka rĩrĩa ngatũmĩra bũrũri ũyũ ngʼaragu, na ti ngʼaragu ya irio, kana nyota wa maĩ, nĩ ngʼaragu ya kũigua mohoro ma  Jehova.” (Amos 8:11) Hihi raiya a Ũthamaki wa Ngai marĩ na ngʼaragu o nao? Jehova aarathĩte ũũ ũhoro-inĩ wĩgiĩ ũtiganu wa andũ ake na thũ ciake: “Ndungata ciakwa nĩikarĩaga irio, no inyuĩ nĩ kũhũta mũkahũta; atĩrĩrĩ, ndungata ciakwa nĩikanyuaga gĩa kũnyua, no inyuĩ nĩ kũnyota mũkanyota; atĩrĩrĩ, ndungata ciakwa nĩ gũkena igakenaga, no inyuĩ nĩ gũconorũo mũgaconorũo.” (Isa. 65:13) Hihi wee nĩ wĩyoneire ciugo icio ikĩhinga?

¹² Irio cia kĩĩroho iria tũheagwo no tũcihaananie na rũũĩ rũrathiĩ rwaramĩte na rũkĩrikaga. Mabuku maitũ marĩa maaragĩrĩria Bibilia, o hamwe na video na indo cia gũthikĩrĩria, mĩcemanio na igomano, ũhoro ũrĩa wĩkĩragwo thĩinĩ wa Web site itũ, ciothe na njĩra ya kĩĩroho ihaana ta maĩ maingĩ maratherera marĩa matũnyotoraga thĩinĩ wa thĩ ĩno ĩ na ngʼaragu nene ya kĩĩroho. (Ezek. 47:1-12; Joel 3:18) Na githĩ ndũkenaga kuona kĩĩranĩro kĩa Jehova kĩgiĩ bũũthi gĩkĩhinga ũtũũro-inĩ waku? Hihi nĩ ũtigagĩrĩra atĩ nĩ ũrarĩa irio metha-inĩ ya Jehova ũtegũtĩrĩria?

13. Wee wĩyoneire atĩa kũhinga gwa kĩĩranĩro kĩa Jehova kĩgiĩ maitho matonaga kũhingũrũo, na matũ mataiguaga gũkunũrũo?

¹³ Ũgima mwega wa kĩĩroho. Andũ aingĩ ũmũthĩ nĩ arĩa matonaga na mataiguaga na njĩra ya kĩĩroho. (2 Kor. 4:4) O na kũrĩ ũguo, Kristo nĩ arahonia mĩrimũ na mawathe thĩinĩ wa thĩ. Hihi wee wanona maitho matonaga mahingũrĩtwo na matũ mataiguaga makunũrĩtwo? Angĩkorũo wanona andũ mamũkĩrĩte ũhoro wa ma wa Kiugo kĩa Ngai, magatigana na maheeni ma ndini marĩa maatũmĩte maage kuona kana kũigua ũhoro ũrĩa wa ma, nĩ wĩyoneire kũhinga kwa ũrathi ũyũ: “Mũthenya ũcio-rĩ, andũ arĩa morĩte matũ nĩmakaigua mohoro ma ibuku, o namo maitho ma atumumu matige kuona na mairia o na nduma.” (Isa. 29:18) Thĩinĩ wa thĩ yothe, andũ aingĩ mũno o mwaka nĩ mahonagio mĩrimũ ta ĩyo ya kĩĩroho. Rĩrĩa mũndũ oima thĩinĩ wa Babuloni Ũrĩa Mũnene agoka tũnyitanĩre gũthathaiya thĩinĩ wa paradiso ya kĩĩroho, ũndũ ũcio nĩ wonanagia atĩ ciĩranĩro cia Jehova nĩ irahinga!

14. Nĩ ũndũ ũrĩkũ tũngĩĩcũrania igũrũ rĩaguo wongerere wĩtĩkio witũ hinya?

¹⁴ O gĩcunjĩ thĩinĩ wa ibuku rĩrĩ nĩ kĩronania wega atĩ Kristo nĩ areheete arũmĩrĩri ake thĩinĩ wa paradiso ya kĩĩroho matukũ-inĩ maya ma kũrigĩrĩria. Rekei tũthiĩ na mbere gwĩcũrania igũrũ rĩgiĩ njĩra nyingĩ iria tũragunĩka nacio thĩinĩ wa paradiso ĩyo ya kĩĩroho. Tweka ũguo, wĩtĩkio witũ harĩ ciĩranĩro cia Jehova cia mahinda mokĩte nĩ ũrĩgĩaga na hinya makĩria.

15. Nĩ kĩĩ kĩngĩtũma tũgĩe na ma atĩ thĩ nĩ ĩgaatuĩka paradiso?

¹⁵ Muoroto wa Jehova kuuma tene ũkoretwo ũrĩ gũtua thĩ yothe paradiso. Aaigire Adamu na Hawa mũgũnda-inĩ warĩ paradiso, na akĩmaatha maiyũrie thĩ na njiarũa ciao na marorage ciũmbe ciayo ciothe. (Kĩam. 1:28) Handũ ha ũguo, Adamu na Hawa maarũmĩrĩire Shaitani makĩremera Ngai na kwoguo makĩingĩria njiarũa ciao ciothe ũhoro-inĩ wa kwaga gũkinyanĩra, mehia, na gĩkuũ. No muoroto wa Ngai ndwacenjirie. Ciugo ciake iria arĩtie no nginya ihinge biũ. (Thoma Isaia 55:10, 11.) Nĩ ũndũ ũcio no  tũkorũo na ma atĩ, ciana cia Adamu na Hawa nĩ ikaiyũria thĩ ĩno na imĩtoorie, iramatage ũũmbi wa Jehova thĩ yothe ĩrĩ paradiso. Hĩndĩ ĩyo, morathi marĩa riita rĩa mbere maaheirũo Ayahudi arĩa maarĩ ithamĩrio megiĩ ũtũũro thĩinĩ wa paradiso, nĩ makaahingio na njĩra nginyanĩru. Reke tuone ngerekano ici.

16. Bibilia ĩtaaragĩria atĩa ũgitĩri ũrĩa tũgaakorũo naguo thĩinĩ wa Paradiso?

¹⁶ Ũgitĩri. Mũthia-inĩ biũ, ũhoro ũrĩa ũheanĩtwo thĩinĩ wa Isaia 11:6-9 nĩ ũkaahingio na njĩra ĩronekana nginya na maitho. Athuri, atumia, na ciana nĩ magaakorũo na ũgitĩri na matarĩ na wagagu harĩa hothe magaakorũo thĩinĩ wa thĩ. Gũtirĩ kĩũmbe, gĩkorũo nĩ mũndũ kana nyamũ, gĩkaagerana ngero. Ta hũũra mbica hĩndĩ ĩrĩa ũkona thĩ ĩno ĩhaana ta mũciĩ waku, kũndũ ũngĩtubĩra njũĩ-inĩ, iria-inĩ, na ũtuĩkanagie irĩma-inĩ, na kũũrũraga werũ-inĩ ũtegwĩtigĩra o na hanini. O na watukĩrĩrũo ndũgaakorũo ũkĩmaka. Ciugo cia Ezekieli 34:25 nĩ ikaahinga, nĩ getha gũkaahoteka andũ a Ngai ‘matũũre kũu werũ-inĩ megangarĩte, na marahage kana magakoma mĩtitũ-inĩ.’

17. Nĩ kĩĩ kĩratũma tũgĩe na ma atĩ Jehova nĩ agaatũhe mabataro ma kũigana rĩrĩa Ũthamaki ũgaakorũo ũgĩathana thĩ yothe?

¹⁷ Bũũthi. Ta hũũra mbica rĩrĩa gũtagaakorũo maũndũ ta thĩna, kwaga irio ciagĩrĩire, ngʼaragu, kana mathondeka ma kũheana ũteithio. Bũũthi wa irio cia kĩĩroho ũrĩa andũ a Ngai marĩ naguo ũmũthĩ nĩ ũronania na ma atĩ Mũthamaki wa Kĩĩmesia nĩ akaahe raiya ake irio cia kũigana. Rĩrĩa Jesu aarĩ gũkũ thĩ, nĩ onanirie na njĩra nini atĩ aarĩ na ũhoti wa kũhingia ciĩranĩro ta icio, nĩ ũndũ wa ũrĩa aahũnirie makiri ma andũ ahũũtu akĩhũthĩra mĩgate o mĩnini na thamaki cigana ũna. (Mat. 14:17, 18; 15:34-36; Mar. 8:19, 20) Rĩrĩa Ũthamaki wa Ngai ũgaakorũo ũgĩthamaka thĩ yothe, ũrathi ta ũyũ nĩ ũkaahingio na njĩra ĩroneka na maitho: “Mbura, o ĩo mbeũ ciaku ciendaga, nĩakamiuria, nĩguo ũhande mĩgũnda, na akũhe irio iria ciumaga thĩ, nacio ikoragwo itunguhĩte na ikaingĩha; ningĩ mũthenya ũcio-rĩ, ũhiũ waku ũkarĩithagio nyeki-inĩ kũndũ kwariĩ mũno.”​—Isa. 30:23.

18, 19. (a) Ũrathi wa Isaia 65:20-22 ũkũhutagia atĩa? (b) Nĩ na njĩra ĩrĩkũ matukũ maitũ magaakorũo “o ta ũrĩa matukũ ma mũtĩ maigana”?

¹⁸ Ti ũndũ mũhũthũ harĩ andũ aingĩ ũmũthĩ gwĩtĩkia atĩ no magĩe na mũciĩ mwega kana wĩra wĩ na uumithio, na ũratũma maiganĩre. Thĩinĩ wa thĩ ĩno njũru, andũ aingĩ nĩ mekoraga makĩruta wĩra mũritũ ihinda inene no ũkaaga kũmateithia o ene na famĩlĩ ciao, rĩrĩa arĩa atongu na arĩa akoroku matongaga o gũtonga. Ta hũũra mbica ũrĩa gũgaakorũo kũhaana rĩrĩa ũrathi ũyũ ũkaahingio thĩinĩ wa thĩ yothe: “Nao nĩmagaaka nyũmba, na macitũũre, na mahande mĩgũnda ya mĩthabibũ, o na marĩage maciaro mayo. Matigaaka nyũmba, na icokage gũtũũrũo nĩ andũ angĩ, o na kana mahande irio, icokage kũrĩo nĩ andũ angĩ; nĩ gũkorũo o ta ũrĩa matukũ ma mũtĩ maigana, ũguo noguo matukũ ma andũ akwa makaigana, nao andũ akwa arĩa athure nĩmarĩkenagĩra wĩra wa moko mao ihinda iraya.”​—Isa. 65:20-22.

¹⁹ Kuuga atĩ matukũ maitũ makaigana “o ta ũrĩa matukũ ma mũtĩ maigana” kũronania atĩa? Rĩrĩa ũrũgamĩte rungu rwa mũtĩ  mũnene mũno-rĩ, nĩ ũiguaga thĩinĩ waku ũmakĩte weciria mĩaka ĩrĩa mũtĩ ũcio ũtũũrĩte, na rĩngĩ nĩ wa tene o na gũkĩra rĩrĩa baba wa guka wanyu aaciarirũo? Ũndũ ũcio no ũtũme wone atĩ wee mwene wathiĩ na mbere gũtũũra ũtarĩ mũkinyanĩru, mũtĩ ũcio no ũikare mĩaka mĩingaingĩ, na ũthiĩ na mbere gũtũũra, o na thutha waku gũkua. Na githĩ ti gĩtĩo kĩnene Jehova atuonetie gĩa gũtũũmĩrĩria atĩ thĩinĩ wa Paradiso ĩyo yũkĩte, matukũ maitũ magaakorũo marĩ maingĩ na ma thayũ! (Thab. 37:11, 29) Ihinda nĩ rĩrĩkinya rĩrĩa o na mĩtĩ ĩrĩa ĩikarĩte ihinda inene ĩrĩonekaga ĩrĩ ya ihinda o inini ta nyeki, ĩgaakũraga na ĩkoma no ithuĩ tũgaathiĩ na mbere gũtũũra tene na tene!

20. Raiya ehokeku a Ũthamaki makaagĩa atĩa ũgima mũkinyanĩru wa mwĩrĩ?

²⁰ Ũgima mũkinyanĩru wa mwĩrĩ. Ũmũthĩ, mĩrimũ na gĩkuũ ihutagia mũndũ wothe thĩinĩ wa thĩ. Na njĩra nguhĩ, ithuothe tũrĩ arwaru, mũrimũ ũtahonagwo wĩtagwo mehia. Kĩhonia tu no igongona rĩa ũkũũri rĩa Jesu Kristo. (Rom. 3:23; 6:23) Hĩndĩ ya Wathani wa Mĩaka Ngiri, Jesu na arĩa magaathamaka hamwe nake, nĩ magaateithia andũ kũgunĩka biũ nĩ igongona rĩu, o kahora kahora, meherie mehia mothe kuuma kũrĩ andũ arĩa ehokeku. Ũrathi ũyũ wa Isaia nĩ ũkaahinga na njĩra nene: “Nake mũndũ ũrĩa ũtũũraga bũrũri ũcio ndarĩ hingo agacoka kuuga ũũ: Ndĩ mũrũaru; nao andũ arĩa matũũraga kuo nĩmakoherũo ũũru wao.” (Isa. 33:24) Ta hũũra mbica hĩndĩ ĩrĩa gũtagaakorũo mũndũ mũtumumu, ũtaiguaga, kana mwonju. (Thoma Isaia 35:5, 6.) Gũtirĩ mũrimũ o na ũmwe Jesu akaaremwo nĩ kũhonia, o na angĩkorũo nĩ mũrimũ wa mwĩrĩ, wa meciria, kana wa ngoro. Raiya ehokeku a Ũthamaki nĩ magaakorũo na ũgima mũkinyanĩru wa mwĩrĩ!

21. Gĩkuũ gĩgeekwo atĩa, na nĩkĩ kĩĩrĩgĩrĩro kĩu nĩ gĩkũũmagĩrĩria?

²¹ Ĩ ũhoro-inĩ wĩgiĩ gĩkuũ, kĩrĩa rĩngĩ kiumanaga na mĩrimũ ĩrĩa tũtangĩĩthema nĩ ũndũ wa gũkorũo tũrĩ ehia? Ĩyo harĩ ithuĩ nĩyo “thũ ya mũthia,” ĩrĩa ĩtooragia andũ othe matarĩ akinyanĩru. (1 Kor. 15:26, Holy Bible in Gĩkũyũ) No hihi gĩkuũ nĩ thũ nene ũndũ ĩngĩrema Jehova? Ta rora ũrĩa Isaia aarathire: “Gĩkuũ nĩ kũngʼaria akĩngʼarĩtie agakĩnina biũ tene na tene; ningĩ Mwathani Jehova nĩakagiria maithori mothiũ mothe.” (Isa. 25:8) Hihi nĩ ũrahũũra mbica ĩyo meciria-inĩ maku? Gũtigaakorũo mathiko rĩngĩ, mbĩrĩra, o na maithori ma kĩeha! Mũgarũ na ũguo, gũgaakorũo na maithori ma gĩkeno rĩrĩa Jehova akaahingia kĩĩranĩro gĩake kĩa magegania gĩa kũriũkia arĩa akuũ! (Thoma Isaia 26:19.) Mũthia-inĩ biũ, ruo rũingĩ rũrĩa rwanarehwo nĩ gĩkuũ nĩ rũgaathira.

22. Gũkahaana atĩa hĩndĩ ĩrĩa Ũthamaki wa Kĩĩmesia ũkaahingia wendi wa Ngai gũkũ thĩ?

²² Gũkinyĩria mũthia-inĩ wa Mĩaka Ngiri, Ũthamaki nĩ ũgaakorũo ũhingĩtie wendi wa Ngai thĩinĩ wa thĩ, na hĩndĩ ĩyo nĩrĩo Kristo agaacokeria Ithe wathani. (1 Kor. 15:25-28) Andũ othe, arĩa hĩndĩ ĩyo magaakorũo marĩ akinyanĩru, magaakorũo mehaarĩirie kũgerio rĩa mũico nĩ Shaitani rĩrĩa akaahingũrĩrũo kuuma abiso.  Thutha ũcio, Kristo nĩ akaahehenja nyoka ĩyo na arĩa othe mamĩnyitaga mbaru. (Kĩam. 3:15; Kũg. 20:3, 7-10) No arĩa othe mendete Jehova na ngoro yothe nĩ magaakenera ihinda rĩega rĩrĩa rĩũkĩte. No kũhoteke gũtirĩ ciugo ingĩtaarĩria wega makĩria gũkĩra iria cionekaga mũhari-inĩ ũmwe thĩinĩ wa Bibilia. Nĩ kĩĩranĩro kĩa atĩ arĩa othe ehokeku nĩ makaagĩa na “wĩyathi ũrĩ na riri wa ciana cia Ngai.”​—Rom. 8:21, NW.

23, 24. (a) Nĩkĩ hatirĩ nganja atĩ ciĩranĩro cia Ngai nĩ ikaahinga? (b) Wee wĩhotorete gwĩka atĩa?

²³ Ciĩranĩro icio itiĩhocetie harĩ maũndũ ma gwĩcirĩria kana iroto. Hatirĩ nganja, Jehova nĩ akaahingia ciĩranĩro ciake! Tũngiuga ũguo nĩkĩ? Ta ririkana ciugo cia Jesu iria twarĩrĩirie gĩcunjĩ-inĩ kĩa mbere kĩa ibuku rĩrĩ. Aarutire arũmĩrĩri ake mahoyage Jehova ũũ: “Ũthamaki waku ũũke. O ũrĩa wendete Wee, nĩwĩkagwo gũkũ thĩ, o ta ũrĩa wĩkagwo kũu igũrũ.” (Mat. 6:9, 10) Ũthamaki wa Ngai ti kĩndũ gĩa gwĩcirĩrio tu. Wĩ kuo, na nĩ ũrathana kũrĩa igũrũ. Kwa ihinda rĩa mĩaka igana rĩmwe, nĩ ũhingĩtie ciĩranĩro cia Jehova na njĩra ĩroneka wega thĩinĩ wa kĩũngano gĩa Gĩkristiano. Nĩ ũndũ ũcio tũrĩ na ũũma atĩ ciĩranĩro ciothe cia Jehova nĩ ikaahingio rĩrĩa Ũthamaki wa Ngai ũkeerekeria wathani waguo biũ thĩinĩ wa thĩ yothe!

²⁴ Nĩ tũũĩ wega atĩ Ũthamaki wa Ngai nĩ ũgooka. Ningĩ nĩ tũũĩ atĩ ciĩranĩro iria ciothe Jehova eranĩire nĩ ikaahinga. Tũroiga ũguo nĩkĩ? Nĩ tondũ ŨTHAMAKI WA NGAI NĨ ŨRATHANA! Kĩũria kĩrĩa o ũmwe witũ agĩrĩirũo kwĩyũria nĩ gĩkĩ, ‘Hihi niĩ nĩ ndongoragio nĩ Ũthamaki ũcio?’ Rekei twĩke ũrĩa wothe tũngĩhota gũtũũra tũrĩ raiya ehokeku a Ũthamaki ihinda-inĩ rĩrĩ, nĩguo tũtũũre tũgunĩkaga nĩ wathani waguo mũkinyanĩru na wa kĩhooto tene na tene!