KŨRĨ ANDŨ ETHĨ
11: Gũkorũo na Kĩyo
ŨGUO NĨ KUUGA ATĨA?
Andũ arĩa marĩ kĩyo matiĩyũaga wĩra. Ithenya rĩa ũguo, nĩ makenagĩra kũruta wĩra na kĩyo nĩguo mahingie mabataro mao na mateithie andũ arĩa angĩ, o na angĩkorũo wĩra ũrĩa mararuta ndwendetwo nĩ andũ aingĩ.
ŨNDŨ ŨCIO NĨ WA BATA NĨKĨ?
Nĩ tũkoragwo na maũndũ maingĩ mũno ma kũhingia ũtũũro-inĩ o na angĩkorũo tũtiendete kũmahingia. O na gũtuĩka andũ aingĩ thĩinĩ wa thĩ ĩno matiendete kwĩrutanĩria wĩra-inĩ, gũkorũo na kĩyo no gũkũgune.—Kohelethu 3:13.
“Nĩ nyonete atĩ rĩrĩa waruta wĩra na kĩyo, nĩ ũkenaga na ũkaigua ũiganĩire. Ũndũ ũcio nĩ ũtũmĩte ndĩĩrute kwenda wĩra. Gũkoragwo na kĩyo wĩra-inĩ ningĩ nĩ gũtũmaga mũndũ agĩe na rĩĩtwa rĩega.”—Reyon.
ŨTAARO WA BIBILIA: “Wĩra o wothe mũritũ nĩ ũkoragwo na ũguni.”—Thimo 14:23.
ŨRĨA ŨNGĨKA
Kũria mwerekera ũrĩa wagĩrĩire wĩgiĩ wĩra na njĩra ya kũrũmĩrĩra maũndũ maya magwetetwo haha.
Wĩrute kũhingia wĩra waku wega. O na angĩkorũo ũraruta wĩra wa mũciĩ, wa cukuru, kana wĩra ũngĩ o wothe, ũrutage na ngoro yothe. Wamenya kũruta wĩra mũna, caragia njĩra cia kwagagĩria, ũkaũrutaga na ihenya o na kana wega makĩria. O ũrĩa ũkũgĩa na ũmenyeru, noguo ũrĩkenagĩra wĩra waku.
ŨTAARO WA BIBILIA: “Hihi nĩ wonete mũndũ mũũgĩ wĩra-inĩ wake? Ũcio arĩrũgamaga mbere ya athamaki; ndarĩrũgamaga mbere ya andũ matarĩ igweta.”—Thimo 22:29.
Onaga maũndũ na njĩra njariĩ. Maita maingĩ, rĩrĩa wahingia maũndũ marĩa wĩhokeirũo na njĩra njega, nĩ ũgunaga andũ arĩa angĩ. Kwa ngerekano, rĩrĩa wakorũo na kĩyo harĩ kũhingia mawĩra ma mũciĩ, nĩ ũhũthagĩria andũ arĩa angĩ thĩinĩ wa famĩlĩ.
ŨTAARO WA BIBILIA: “Kũheana nĩ kũrĩ gĩkeno kĩnene gũkĩra kwamũkĩra.”—Atũmwo 20:35.
Ĩkaga makĩria ma ũrĩa ũngĩrĩgĩrĩrũo. Handũ ha kũrutaga o wĩra mũnini tu, wĩrutanagĩrie gwĩkaga makĩria ma ũrĩa ũrerĩgĩrĩrũo wĩke. Rĩrĩa weka ũguo, nĩwe ũrĩĩyathaga na ndũrĩrutaga wĩra tondũ wa gũtindĩkĩrĩrio, no ũrĩrutaga tondũ wa kwĩyendera.—Mathayo 5:41.
ŨTAARO WA BIBILIA: “Gĩĩko gĩaku kĩega gĩkorũo kĩrĩ gĩa kwĩyendera no ti kũringĩrĩrio.”—Filemona 14.
Koragwo na ũigananĩru. Andũ arĩa marutaga wĩra na kĩyo ti igũta, no ningĩ matiĩyũragaga na wĩra. Makoragwo na ũigananĩru, magakenera kũruta wĩra na kĩyo na makagĩa na mahinda ma kũhurũka.
ŨTAARO WA BIBILIA: “Nĩ kaba rũhĩ rũmwe rwa kũhurũka gũkĩra hĩ igĩrĩ cia wĩra mũritũ na gũteng’erania na rũhuho.”—Kohelethu 4:6.
Icunjĩ Ingĩ Hihi Ũngĩenda Gũthoma
MŨRANGĨRI
Ũrĩa Ũngĩkenera Wĩra Mũritũ
Thoma wone njĩra imwe iria Bibilia ĩngĩkũhee ũtaaro ũngĩgũteithia harĩ kũgĩa gĩkeno, na kũiganĩra wĩra-inĩ waku.
ARAHŨKAI!
Ũrĩa Ũngĩhũthĩra Mahinda Maku Wega
Ũndũ ũmwe ũngĩgũteithia kũhũthĩra mahinda maku wega nĩ gũthuthuria ũtũũro waku na njĩra igĩrĩ. Nĩ irĩkũ icio?
