Ũtaaro wa Bibilia nĩ Ũtũgunaga
Andũ aingĩ nĩ monete atĩ ũtaaro wa Bibilia nĩ ũrĩ ũguni na nĩ wa kwĩhokeka. Reke tuone ũrĩa ũmateithĩtie maũndũ-inĩ maya mana.
1. Kĩhiko
Andũ nĩ makoragwo na mawoni ngũrani megiĩ kĩhiko na megiĩ kĩrĩa kĩbataranagia nĩguo kĩhiko gĩkorũo na gĩkeno.
BIBILIA YUGAGA ŨŨ: “O ũmwe wanyu no mũhaka endage mũtumia wake o ta ũrĩa eyendete we mwene; nake mũtumia agĩrĩirũo kũheaga mũthuri wake gĩtĩo kĩnene.”—Aefeso 5:33.
ŨRUTANI: Ngai nĩwe waambĩrĩirie mũbango wa kĩhiko, kwoguo nĩ oĩ kĩrĩa kĩbataranagia nĩguo arĩa mahikanĩtie makorũo na gĩkeno. (Mariko 10:6-9) Rĩrĩa mũthuri na mũtumia marũmbũyania mũndũ na ũrĩa ũngĩ handũ ha o mũndũ kwĩĩciria we mwene, nĩ magĩaga na gĩkeno. Mũthuri onanagia atĩ nĩ endete mũtumia wake rĩrĩa amũrũmbũiya na njĩra ya ũtugi. Nake mũtumia onanagia atĩ nĩ aheete mũthuri wake gĩtĩo rĩrĩa amũnyita mbaru na amwarĩria na njĩra ya ũtugi.
ŨTAARO WA BIBILIA NĨ ŨTŨGUNAGA: Quang na Thi kuuma Vietnam, meetĩkĩtie atĩ gũtirĩ hĩndĩ mangĩgĩa na gĩkeno kĩhiko-inĩ kĩao. Kaingĩ Quang ndoonagia mũtumia wake ũtugi. Aaugire ũũ: “Ndiatindanagĩra na ũrĩa Thi aaiguaga ngoro-inĩ na kaingĩ nĩ ndamũconorithagia.” Thi o na eendaga macarie marũa ma ndigano. Aaugire ũũ: “Ndioonaga ta kũrĩ hĩndĩ ngehoka mũthuri wakwa kana ndĩmũhe gĩtĩo.”
Mũthia-inĩ Quang na Thi nĩ maamenyire ũrĩa Bibilia ĩrutanaga, na ũrĩa mangĩhũthĩra ũtaaro wa Aefeso 5:33 kĩhiko-inĩ kĩao. Quang aaugire: “Rĩandĩko rĩu nĩ rĩanyonirie bata wa gũkorũo ndĩ mũtugi, na ũrĩa ingĩka nĩguo Thi aigue atĩ nĩ ndĩmwendete na nĩ ndĩrarũmbũiya mabataro make ma kĩĩmwĩrĩ na ma ngoro-inĩ. Rĩrĩa ndamũrũmbũiya na njĩra ĩyo, nĩ ahotaga kũnyenda na kũhe gĩtĩo o na makĩria.” Nake Thi aaugire, “O ũrĩa ndĩrarũmĩrĩra ũtaaro wa Aefeso 5:33 na ngonia mũthuri wakwa gĩtĩo, noguo atũmaga njigue nyendetwo, ndĩ na ũgitĩri, na ndĩ na thayũ.”
Nĩguo wone ũhoro makĩria wĩgiĩ kĩhiko, thoma ngathĩti ya Arahũkai! ya Na. 2 2018, ĩrĩ na kĩongo “Maũndũ 12 Mangĩteithia Famĩlĩ Kũgaacĩra” thĩinĩ wa jw.org/ki.
2. Ũrĩa Tũngĩrũmbũyania na Andũ Arĩa Angĩ
Kaingĩ andũ nĩ mathutũkanagia arĩa angĩ nĩ ũndũ wa kũrĩa maumĩte, rũrĩrĩ rwao, ndini yao, muonekanĩre wao, kana mũrũgamo wao wĩgiĩ ndũgũ cia andũ a hũũra ũmwe.
BIBILIA YUGAGA ŨŨ: “Tĩagai andũ a mĩthemba yothe.”—1 Petero 2:17.
ŨRUTANI: Bibilia nĩ ĩtũkaanĩtie kũmena andũ a kuuma rũrĩrĩ kana bũrũri ũngĩ, kana arĩa matumaga ndũgũ cia hũũra ũmwe. Handũ ha ũguo, ĩtwĩkĩraga ngoro tũtĩage andũ othe, gũtekũmakania rũrĩrĩ rwao, kũrĩa maumĩte, o na kana nĩ atongu kana nĩ athĩni. (Atũmwo 10:34) O na angĩkorũo tũtiretĩkania na maũndũ marĩa andũ arĩa angĩ metĩkĩtie kana ciĩko ciao, tũbatiĩ kũmonia ũtugi na gĩtĩo.—Mathayo 7:12.
ŨTAARO WA BIBILIA NĨ ŨTŨGUNAGA: Daniel aarutĩtwo kuonaga andũ a kuuma Asia marĩ ũgwati bũrũri-inĩ wao. Nĩ aamenete mũndũ o wothe wa kuuma Asia, na kaingĩ nĩ aamarumaga nginya mbere ya andũ. Daniel aaugire ũũ: “Ndonaga ta gwĩka ũguo arĩ kũrũĩrĩra bũrũri witũ. O na ndioonaga mwĩcirĩrie wakwa kana ciĩko ciakwa ta irĩ njũru.”
Mũthia-inĩ Daniel nĩ aamenyire ũrĩa Bibilia ĩrutanaga. Aaugire ũũ: “Nĩ ndabatarire gũcenjia mwĩcirĩrie wakwa biũ. Ndabataraga gũkorũo na mawoni ta ma Ngai kwerekera andũ, atĩ ithuothe nĩ tũiganaine gũtekũmakania kũrĩa tuumĩte.” Daniel aaugire ũũ agĩtaarĩria ũrĩa aiguaga rĩrĩa acemania na andũ matiganĩte: “Kaingĩ rĩu nditindanagĩra na kũrĩa maumĩte. Nyendete andũ a mĩthemba yothe na nĩ ngĩte na arata kuuma kũndũ gũtiganĩte thĩinĩ wa thĩ.”
Nĩguo wone ũhoro makĩria, thoma Amkeni! ya Na. 3 2020, ĩrĩ na kĩongo “Je, Inawezekana Kuushinda Ubaguzi?” thĩinĩ wa jw.org/sw.
3. Mbeca
Andũ aingĩ merutanagĩria gũcaria ũtonga nĩguo makorũo na gĩkeno na ũtũũro mwega wa ihinda rĩũkĩte.
BIBILIA YUGAGA ŨŨ: “Ũũgĩ nĩ ũgitĩri o ta ũrĩa mbeca o nacio ikoragwo irĩ ũgitĩri, no ũguni wa ũmenyo nĩ ũyũ: Ũũgĩ nĩ ũhonokagia muoyo wa mwene guo.”—Kohelethu 7:12.
ŨRUTANI: Nĩ tũbataraga mbeca, no gũkorũo nacio ti kuuga atĩ nĩ tũkũgĩa na gĩkeno kana ũtũũro mwega wa ihinda rĩũkĩte. (Thimo 18:11; 23:4, 5) Handũ ha ũguo, kũhũthĩra ũũgĩ wa Ngai ũrĩa ũrĩ Bibilia-inĩ, nĩkuo kũngĩtũteithia kũgĩa na gĩkeno kĩa ma na ũtũũro mwega ihinda rĩũkĩte.—1 Timotheo 6:17-19.
ŨTAARO WA BIBILIA NĨ ŨTŨGUNAGA: Mũthuri ũmwe wĩtagwo Cardo kuuma Indonesia, nĩ eerutanagĩria mũno gwetha ũtonga. Aaugire ũũ: “Ndaarĩ na indo iria ciothe andũ meriragĩria kũgĩa nacio. Nĩ ndahotaga gũceera kũndũ na kũndũ, na kũgũra indo cia goro, makaari, na manyũmba.” No ũtonga ũcio ndwaikarire ihinda iraya. Cardo aaugire: “Ndakungirio wara, na mbeca iria ciothe nderutanĩirie gũthũkũma mĩaka ĩyo yothe igĩthira ta kũbucia kwa riitho. Ndahũthĩrĩte ũtũũro wakwa wothe gũtengʼerania na ũtonga, no mũico wa ũhoro ndatigirũo itarĩ o na kĩ, na kwoguo ndaiguaga nguĩte ngoro na itarĩ kĩene.”
Cardo nĩ aambĩrĩirie kũhũthĩra ũtaaro wa Bibilia wĩgiĩ mbeca. Rĩu ndetungumanagia agĩetha ũtonga, ĩndĩ athuurĩte gũikaraga ũtũũro mũhũthũ. Aaugire ũũ: “Mũthithũ wa ma na wa gũtũũra uumanaga na gũkorũo na ũrata mwega na Ngai. Rĩu ngomaga ũtukũ mũgima, na ndĩ na gĩkeno kĩa ma.”
Nĩguo wone ũhoro makĩria wĩgiĩ mawoni ma Bibilia megiĩ mbeca, thoma gĩcunjĩ kĩrĩ na kĩongo “Hihi Gĩthomo na Mbeca no Iteithie Mũndũ Gũgaakorũo na Ũtũũro Mwega?” ngathĩti-inĩ ya Mũrangĩri ya Na. 3 2021, thĩinĩ wa jw.org/ki.
4. Ngomanio
Andũ makoragwo na mawoni matiganĩte megiĩ ngomanio.
BIBILIA YUGAGA ŨŨ: “[Mwĩthemagei] ngomanio itagĩrĩire. O ũmwe wanyu nĩ agĩrĩirũo kũmenya ũrĩa angĩgirĩrĩria mwĩrĩ wake nĩguo aikarage arĩ mũtheru na arĩ na gĩtĩo, ti na mũkoroko wa merirĩria moru ma ngomanio ta marĩa ndũrĩrĩ iria itoĩ Ngai ikoragwo namo.”—1 Athesalonike 4:3-5.
ŨRUTANI: Bibilia nĩ ĩigĩte ithimi ciĩgiĩ ũrĩa tũngĩhingia merirĩria maitũ ma ngomanio. Ciugo “ngomanio itagĩrĩire” ihutĩtie ũtharia, ũmaraya, ngomanio gatagatĩ ka andũ matahikanĩtie, ngomanio gatagatĩ ka andũ a hũũra ũmwe, na ngomanio gatagatĩ ka mũndũ na nyamũ. (1 Akorintho 6:9, 10) Ngomanio nĩ kĩheo kuuma kũrĩ Ngai na endaga ĩkenagĩrũo tu nĩ mũthuri na mũtumia arĩa mahikanĩtie.—Thimo 5:18, 19.
ŨTAARO WA BIBILIA NĨ ŨTŨGUNAGA: Mũtumia ũmwe wĩtagwo Kylie kuuma Australia aaugire ũũ: “Itanahika, ndeciragia atĩ kwĩingĩria ngomanio-inĩ nĩ kũngĩatũmire njigue nyendetwo na njiganĩire. No ũguo tiguo gwathiire. Ndaiguaga ndĩ na mĩtangĩko na nguĩte ngoro.”
Thutha-inĩ Kylie nĩ eerutire maũndũ marĩa Bibilia ĩrutanaga megiĩ ngomanio na akĩambĩrĩria kũmahũthĩra. Aaugire ũũ: “Nĩ nyonete atĩ ithimi cia Ngai nĩ cia gũtũgitĩra kuumana na maũndũ mangĩtũrehera ruo rwa ngoro. Rĩu nĩ njiguaga njiganĩire na nyendetwo nĩ ũndũ wa gwĩka maũndũ kũringana na ũrĩa Jehova endaga. Kũrũmĩrĩra ũtaaro wa Bibilia nĩ kũndeithĩtie gwĩthema kwĩreherera ruo rwa ngoro.”
Nĩguo wone ũhoro makĩria, thoma gĩcunjĩ kĩrĩ na kĩongo “Bibilia Yugaga Atĩa Igũrũ Rĩgiĩ Andũ Gũikarania Hamwe Matahikanĩtie?” thĩinĩ wa jw.org/ki.
Mũũmbi witũ nĩ atũteithagia gũkũũrana ũndũ ũrĩa mwega na ũrĩa mũũru. O na gũtuĩka rĩmwe ti ũndũ mũhũthũ gwathĩkĩra ithimi ciake ciĩgiĩ mĩtugo, nĩ tũgunĩkaga rĩrĩa tweka ũguo. No tũkorũo na ma atĩ tweka ũguo nĩ tũrĩgĩaga na gĩkeno gĩa gũtũũra.
