O ũrĩa tũreruta ũhoro wĩgiĩ mũndũ mũna, noguo tũmũmenyaga makĩria, na kwoguo ũrata witũ nake ũkagĩa na hinya. Ũndũ ũmwe na ũcio, o ũrĩa tũreruta ũhoro wĩgiĩ Jehova, noguo tũkũmenya ũrĩa atariĩ, na kwoguo ũrata witũ hamwe nake ũgĩe hinya. Ngai arĩ ngumo nyingĩ njega, na inya ciacio iria nene nĩ: hinya, ũũgĩ, kĩhooto, na wendo.

“Atĩrĩrĩ, Mwathani Jehova, wee nĩwe wombire igũrũ na thĩ na ũndũ wa hinya waku mũnene.”​—JEREMIA 32:17.

Hinya wa Ngai nĩ wonekaga kũgerera indo iria ombĩte. Kwa ngerekano, rĩrĩa warũgama nja kũrĩ na riũa-rĩ, mwĩrĩ waku ũiguaga atĩa? Ũiguaga ũrugarĩ. Ũrugarĩ ũcio ũkoragwo uumanĩte na hinya wa Jehova wa ũũmbi. Riũa rĩkoragwo na hinya ũigana atĩa? Kwĩrĩkanaga atĩ riũa rĩkoragwo na ũrugarĩ wa ndigirii 15,000,000 harĩa gatagatĩ. O sekondi, riũa rĩrutaga hinya ũiganaine na mũtuthũko wa mbomu nyingĩ mũno cia niukilia.

No riũa nĩ inini mũno rĩringithanĩtio na njata imwe harĩ njata milioni nyingĩ iria irĩ kũrĩa igũrũ. Athomi a Sayansi moigaga atĩ njata ĩmwe ya iria nene mũno ĩtagwo UY Scuti, nĩ njariĩ gũkĩra riũa maita 1,700. Njata ĩyo ya UY Scuti ĩngĩigwo harĩa riũa rĩrĩ, nĩ nene ũũ atĩ no ĩhumbĩre nginya thĩ itũ na ĩhĩtũke ĩthiĩ nginya kũrĩ thĩ ĩrĩa ĩtagwo Jupiter. Ũndũ ũcio nĩ ũratũteithia gũtaũkĩrũo wega nĩ ciugo cia Jeremia atĩ, Jehova Ngai oombire igũrũ na thĩ kũgerera hinya wake mũnene.

 Tũgunĩkaga atĩa kuumana na hinya wa Ngai? Ũtũũro wa mũndũ ũkoragwo wĩhocetie harĩ indo iria Ngai oombire, ta riũa na indo iria ingĩ ciothe irĩ thĩinĩ wa thĩ. Makĩria ma ũguo, Ngai nĩ ahũthagĩra hinya wake gũtũteithia tũrĩ mũndũ ũmwe ũmwe. Na njĩra ĩrĩkũ? Hĩndĩ ĩrĩa Jesu aarĩ gũkũ thĩ, Ngai nĩ aamũheire hinya wa gwĩka maũndũ ma magegania. Tũthomaga ũũ: “Arĩa atumumu nĩ marahota kuona, arĩa mathuaga magetwara wega, arĩa marĩ na mangũ makahonio, arĩa mataiguaga makaigua, akuũ makariũkio.” (Mathayo 11:5) Ĩ matukũ-inĩ maya? Bibilia yugaga ũũ: “Mũndũ ũrĩa ũũrĩtwo nĩ hinya, nĩwe ũmũheaga hinya.” Ĩgacoka ĩkongerera ũũ: “Andũ arĩa mehokete Jehova nĩo magacokererũo nĩ hinya wao.” (Isaia 40:29, 31) Ngai no atũhe “hinya ũrĩa ũkĩrĩte wa ndũire” nĩgetha tũhote kũhiũrania na moritũ na magerio kana tũhote gũkirĩrĩria. (2 Akorintho 4:7) Na githĩ to wende gũkuhĩrĩria Ngai ũcio ũhũthagĩra hinya wake mũingĩ na njĩra ya wendo gũtũteithia?

“Wee Jehova, kaĩ mawĩra maku nĩ maingĩ-ĩ! Mothe ũmarutĩte na ũũgĩ.”​—THABURI 104:24, Holy Bible in Gĩkũyũ.

O ũrĩa tũreruta ũhoro wa indo iria Ngai ombĩte, noguo twĩkoraga tũkĩgegio nĩ ũũgĩ wake. O na nĩ kũrĩ athomi amwe a Sayansi mathuthuragia indo iria Jehova ombĩte, magacoka magathondeka indo ciao makĩĩgerekania na icio Jehova ombĩte. Indo iria mathondekete kuumana na ũthuthuria ta ũcio nĩ indo nini ta ngamu na ingĩ nene ta ndege.

Angĩkorũo nĩ harĩ handũ ũũgĩ wa Ngai wonekaga na njĩra nene nĩ ũrĩa mũndũ ombĩtwo. Kwa ngerekano, ta wĩcirie ũrĩa mwana akũraga. Mwana ambagĩrĩria arĩ kahengereta (cell) kamwe, karĩa gakoragwo na ũhoro wothe wĩgiĩ ũrĩa agaakorũo ahaana. Kahengereta kau gacokaga gakegayania gagatuĩka tũhengereta tũingĩ tũhaanaine. No thutha wa ihinda, o kamwe gatuo kambagĩrĩria gwĩthondeka na njĩra ngũrani na mũthia-inĩ tũgakorũo tũrĩ tũhengereta tũingĩ twa mĩthemba ĩtiganĩte, ta tũhengereta twa thakame, twa mĩkiha, na twa mahĩndĩ. Thutha wa ihinda rĩtarĩ coho, tũhengereta tũu tũkambĩrĩria gũthondeka ciĩga itiganĩte cia mwĩrĩ na ikambĩrĩria kũruta wĩra. Ihinda-inĩ rĩa mĩeri kenda tu, kahengereta kau ka mbere gakoragwo gatuĩkĩte tũhengereta bilioni nyingĩ tũrĩa tũthondekaga mwana ũrĩ na ciĩga ciothe. Ũũgĩ ta ũcio wa Ngai ũtũmaga andũ aingĩ metĩkanie na mwandĩki wa Bibilia ũrĩa woigire ũũ: “Nĩndagũcokeria ngatho, tondũ mũũmbĩre ũrĩa nyũmbĩtwo nĩ wa magegania.”​—Thaburi 139:14.

Tũgunĩkaga atĩa kuumana na ũũgĩ wa Ngai? Mũũmbi witũ nĩ oĩ kĩrĩa tũbataraga nĩgetha tũgĩe na gĩkeno. Tondũ akoragwo na ũmenyo na ũtaũku mũingĩ, nĩ atũheaga ũtaaro wa ũũgĩ kũgerera Kiugo gĩake Bibilia. Kwa ngerekano, Bibilia ĩtwĩraga ũũ: “Thiĩi na mbere . . . kuohanagĩra mwĩyendeire.” (Akolosai 3:13) Hihi ũtaaro ũcio nĩ wa ũũgĩ? Ĩĩ. Mandagĩtarĩ nĩ monete atĩ kuohanĩra nĩ gũtũmaga mũndũ akome wega na gũgateithia mũndũ ndakahaicie thakame. Ningĩ no kũnyihanyihie ũgwati wa kũnyitwo nĩ mũrimũ wa gũthuthĩka ngoro (depression), na mathĩna mangĩ ma mwĩrĩ.  Ngai nĩ ta mũrata witũ ũrĩ ũũgĩ na ũtũrũmbũyagia ũrĩa ũtũheaga ũtaaro wa gũtũteithia na gũtũguna hingo ciothe. (2 Timotheo 3:16, 17) Na githĩ to wende kũgĩa na mũrata ta ũcio?

“Jehova enda o maũndũ ma kĩhooto.”​—THABURI 37:28.

Ngai hingo ciothe ekaga maũndũ marĩa magĩrĩire. O na Bibilia yugaga atĩ, “Gũtingĩhoteka Ngai ũrĩa wa ma eke maũndũ ma waganu, kana Mwene-Hinya-Wothe eke maũndũ moru!” (Ayubu 34:10, New World Translation) Atuaga ciira na kĩhooto o ta ũrĩa mwandĩki wa Thaburi ooigire akĩhoya Jehova: “Wee ũrĩciragĩra irĩndĩ o ũrĩa kwerekereire.” (Thaburi 67:4) Tondũ “Jehova abaraga ngoro thĩinĩ,” ndangĩheenio nĩ ũhinga wa andũ no hingo ciothe nĩ ahotaga kũmenya ũhoro wa ma na gũtua ciira ũrĩa kwagĩrĩire. (1 Samueli 16:7) Makĩria ma ũguo, Ngai nĩ amenyaga ũndũ o wothe wĩkagwo ũtarĩ wa kĩhooto na ungumania gũkũ thĩ na nĩ eranĩire atĩ ica ikuhĩ “andũ arĩa aganu, nĩ makaaninwo mehere thĩinĩ wa thĩ.”​—Thimo 2:22, NWT.

O na kũrĩ ũguo, Ngai ti mũtuanĩri ciira ũtarĩ tha, wendaga o kũherithia andũ. Nĩ onanagia tha hĩndĩ ĩrĩa kwagĩrĩire. Bibilia yugaga ũũ: “Jehova nĩ wa matha maingĩ na nĩ muuma-andũ mũno,” o na kwerekera andũ arĩa aganu mangĩonania nĩ merirĩte biũ. Githĩ kĩu ti kĩhooto kĩa ma?​—Thaburi 103:8; 2 Petero 3:9.

Tũgunĩkaga atĩa kuumana na kĩhooto kĩa Ngai? Mũtũmwo Petero ooigire ũũ: “Ngai ndarĩ mũthutũkanio, no thĩinĩ wa ndũrĩrĩ ciothe, mũndũ ũrĩa ũmwĩtigĩrĩte na wĩkaga ũrĩa kwagĩrĩire nĩ etĩkĩrĩkaga nĩ we.” (Atũmwo 10:34, 35) Nĩ tũgunĩkaga nĩ kĩhooto kĩa Ngai tondũ ndarĩ hĩndĩ onanagia mũthutũkanio kana akenderera andũ amwe. No twĩtĩkĩrĩke nĩwe na tũtuĩke athathaiya ake gũtekũmakania rangi wa ngothi itũ, bũrũri witũ, gĩthomo, kana ũhoti witũ wa kĩĩmbeca.

Tondũ Ngai nĩ endaga tũtaũkĩrũo nĩ kĩhooto gĩake na tũgunĩke kuumana nakĩo, nĩ atũheete thamiri.  Maandĩko monanagia atĩ thamiri nĩ watho ‘mwandĩke ngoro-inĩ,’ ũrĩa ‘ũtũrutagĩra ũira’ wĩgiĩ kana ũndũ ũrĩa tũreka nĩ mwega kana nĩ mũũru. (Aroma 2:15) Thamiri ĩtũgunaga atĩa? Thamiri ĩmenyeretio wega no ĩtũteithie gwĩthema ciĩko njũru kana itarĩ cia kĩhooto. Na rĩrĩa twahĩtia, no ĩtũteithie kwĩrira na kwaga gũcokera mahĩtia macio. Hatarĩ nganja, gũtaũkĩrũo nĩ kĩhooto kĩa Ngai nĩ gũtũmaga twende kũmũkuhĩrĩria.

“Ngai nĩ wendo.”​—1 JOHANA 4:8.

Ngai nĩ arĩ hinya, ũũgĩ na kĩhooto, ĩndĩ Bibilia ndiugaga atĩ Ngai nĩ hinya, ũũgĩ, kana kĩhooto. Yugaga atĩ Ngai nĩ wendo. Nĩkĩ? Tondũ hinya wake nĩguo ũmũhotithagia gwĩka maũndũ, na kĩhooto na ũũgĩ wake nĩcio itongoragia maũndũ marĩa ekaga. No wendo wa Jehova nĩguo ũtũmaga eke maũndũ. Wendo nĩguo ũtũmaga Ngai eke maũndũ mothe marĩa ekaga.

O na gũtuĩka Jehova nĩ angĩahotire gũikara arĩ wiki, wendo wake nĩ watũmire ombe ciũmbe irĩ na ũũgĩ kũrĩa igũrũ o na gũkũ thĩ, na ciũmbe icio nĩ igunĩkaga na igakenera wendo wake. Wendo nĩ watũmire ombe thĩ nĩguo ĩtuĩke mũciĩ mwega wa andũ. Na nĩ athiaga na mbere kuonia andũ othe wendo tondũ “atũmaga riũa rĩake rĩarĩre andũ arĩa oru na arĩa ega na agatũma mbura yurĩre andũ arĩa athingu na arĩa matarĩ athingu.”​—Mathayo 5:45.

Makĩria ma ũguo, “Jehova arĩ wendo mũnene na tha.” (Jakubu 5:11) Nĩ onanagia wendo wake kwerekera andũ arĩa merutanagĩria kũmũmenya na kũmũkuhĩrĩria. Ngai arũmbũyagia andũ ta acio marĩ mũndũ ũmwe ũmwe. Bibilia yugaga atĩ, “ndarĩ haraya na mũndũ o na ũmwe witũ.”​—Atũmwo 17:27.

Tũgunĩkaga atĩa kuumana na wendo wa Ngai? Nĩ tũkenagĩra kuona ũthaka wa riũa rĩgĩthũa. Nĩ tũkenaga kuona kaana gagĩtheka. Nĩ tũkenagĩra wendo ũrĩa tuonagio nĩ andũ a famĩlĩ citũ. O na gũtuĩka maũndũ macio ti ma o mũhaka harĩ ũtũũro, nĩ matũmaga ũtũũro witũ ũgĩe na gĩkeno kĩnene.

Njĩra ĩngĩ tũgunĩkaga nayo kuumana na wendo ũrĩa Jehova atuonagia nĩ kũgerera mahoya. Bibilia ĩtwĩraga ũũ: “Mũtigatangĩkage nĩ ũndũ o na ũrĩkũ, no maũndũ-inĩ mothe menyithagiai Ngai maũndũ marĩa mũbataraga kũgerera mahoya na mathaithana o hamwe na gũcokia ngatho.” O ta mũciari ũrĩ wendo, Ngai endaga tũmũhoe ũteithio rĩrĩa tũrĩ na maũndũ maratũtanga. Nake Jehova nĩ ũndũ wa wendo wake mũingĩ, atwĩrĩte atĩ nĩ arĩtũheaga “thayũ wa Ngai ũrĩa ũkĩrĩte ũtaũku wothe.”​—Afilipi 4:6, 7.

Hihi maũndũ macio manene twarĩrĩria megiĩ Ngai ta hinya wake, ũũgĩ, kĩhooto, na wendo nĩ magũteithia gũtaũkĩrũo wegega ũrĩa Ngai atariĩ? Nĩguo ũtaũkĩrũo wega makĩria nĩ ũrĩa Ngai atariĩ, tũgũkũũria wĩrute ũhoro wĩgiĩ maũndũ ma gũkũguna marĩa agwĩkĩire na marĩa egũgwĩkĩra ihinda rĩroka.