LUZIA NĨ ATHUAGA KŨGŨRŨ KWA ŨMOTHO. Arĩ mwana nĩ aarwarire polio, mũrimũ ũgwatanagio na ihenya ũrĩa ũthũkagia mĩkiha ĩrĩa ĩtwaraga ũhoro thĩinĩ wa mwĩrĩ. Luzia arĩ na mĩaka 16 mũtumia ũmwe aarutagĩra wĩra aamwĩrire, “Ngai aakũherithirie na wonje tondũ nĩ waremagĩra mami wanyu na nĩ wamwĩkaga maũndũ moru.” O na mĩaka mĩingĩ thutha ũcio, Luzia no aririkanaga ũrĩa ũndũ ũcio watũmire aigue ũũru.

RĨRĨA DAMARIS AAMENYIRE ATĨ ARĨ NA KANSA YA TOMBO, ithe aamũũririe ũũ: “Kaĩ arĩ ũndũ ũrĩkũ wĩkĩte nĩguo ũnyitwo nĩ mũrimũ ũyũ? No mũhaka ũkorũo harĩ ũndũ mũũru mũno wĩkĩte. Nĩkĩo Ngai arakũherithia.” Damaris nĩ aahehenjekire mũno nĩ ciugo icio cia ithe.

Rĩciria rĩa atĩ Ngai nĩwe ũherithagia andũ na mũrimũ ti hĩndĩ rĩambĩrĩria. Ibuku rĩmwe rĩtagwo Manners and Customs of Bible Lands riugaga atĩ andũ aingĩ mahinda-inĩ ma Kristo meetĩkĩtie atĩ “mũrimũ warehagwo nĩ mehia ma mũndũ ũcio mũrwaru, kana nĩ mehia ma andũ arĩa metainwo, na wakoragwo ũtũmĩtwo ũrĩ ihera nĩ ũndũ wa mehia macio.” Narĩo ibuku rĩtagwo Medieval Medicine and the Plague riugaga atĩ mĩaka mĩingĩ thutha wa Kristo, “andũ amwe meetĩkĩtie atĩ Ngai aarehaga mĩrimũ nĩguo amaherithie nĩ ũndũ wa mehia mao.” Gũkĩrĩ ũguo-rĩ, hĩndĩ ĩrĩa andũ milioni nyingĩ maakuire Rũraya kuumana na mũrimũ thĩinĩ wa karine ya 14, hihi nĩ Ngai waherithagia andũ oru? Kana hihi mũrimũ ũcio warehirũo nĩ bacteria ta ũrĩa athuthuria magundũrĩte kuuma hĩndĩ ĩyo? Andũ amwe no meyũrie, hihi Ngai nĩ ahũthagĩra mĩrimũ kũherithia andũ nĩ ũndũ wa mehia mao? *

TA WĨCIRIE: Jesu aahonagia andũ arwaru nĩkĩ angĩkorũo mĩrimũ na mĩnyamaro nĩ ihera kuuma kwĩ Ngai? Na githĩ gwĩka ũguo ti ta kũhũthia kĩhooto na ũthingu wa Ngai? (Mathayo 4:23, 24) Jesu ndarĩ hĩndĩ angĩhũthia matua ma Ngai. Ooigire ũũ: “Hingo ciothe njĩkaga maũndũ marĩa mamũkenagia” agĩcoka akiuga, “Ndĩreka o ũrĩa Awa anjathĩte njĩke.”—Johana 8:29; 14:31.

Bibilia ĩkĩaria igũrũ rĩgiĩ Jehova Ngai yonanagia wega atĩ “mĩthiĩre yake yothe nĩ ya kĩhooto.” (Gũcokerithia Maathani 32:4) Kwa ngerekano, Ngai ndangĩtũma ndege ĩgwe, yũrage andũ aingĩ matarĩ na mahĩtia, atĩ tondũ harĩ mũndũ ũmwe arenda kũherithia thĩinĩ wayo! Iburahimu, ndungata njĩhokeku ya Ngai, akĩaria ũhoro wĩgiĩ ũthingu wa Ngai, ooigire atĩ Ngai ‘ndangĩninanĩria andũ arĩa athingu na arĩa aganu hamwe.’ Ooigire ũcio nĩ ũndũ ‘ũtangĩhoteka.’ (Kĩambĩrĩria 18:23, 25, NW) Ningĩ Bibilia yugaga atĩ Ngai ‘ndangĩka ũndũ mwaganu’; ndarĩ hĩndĩ angĩka “ũndũ wa wogogi [mũũru].”—Ayubu 34:10-12.

Mĩnyamaro ĩrĩa tũcemanagia nayo ndĩkoragwo ĩrĩ ihera kuuma kwĩ Ngai nĩ ũndũ wa mehia maitũ. Jesu we mwene nĩ aataarĩirie ũndũ ũcio wega rĩrĩa marĩ na arutwo ake moonire mũndũ waciarĩtwo arĩ mũtumumu. “Arutwo ake makĩmũũria: ‘Rabii, mũndũ ũyũ aaciarirũo arĩ mũtumumu nĩ ũndũ wa mehia make-ĩ kana ma aciari ake?’ Nake agĩcokia: ‘Ti mũndũ ũyũ o na kana aciari ake meehirie, no gwathiire ũguo nĩguo ciĩko cia Ngai cionekane ũndũ-inĩ ũyũ.’”—Johana 9:1-3.

Nĩ ũndũ wa mawoni mahĩtanu marĩa maarĩ kuo ihinda-inĩ rĩu, no kũhoteke arutwo a Jesu nĩ maagegire rĩrĩa aamerire atĩ mũndũ ũcio ndaaciarĩtwo  ũguo nĩ ũndũ wa mehia make kana ma aciari ake. Jesu nĩ aahonirie mũndũ ũcio, na akĩrũnga wĩtĩkio mũhĩtanu wa atĩ mĩnyamaro nĩ ihera kuuma kũrĩ Ngai. (Johana 9:6, 7) Arĩa maranyamarĩka nĩ ũndũ wa mathĩna manene ma ndwari, no momĩrĩrio nĩ kũmenya atĩ Ngai tiwe ũmareheire mathĩna macio.

Maandĩko matũmagĩrĩria atĩ

• “Ngai ndangĩgerio na maũndũ moru, nake we mwene ndageragia mũndũ o na ũrĩkũ.” (JAKUBU 1:13) “Maũndũ moru” marĩa makoretwo magĩkora andũ mĩaka mĩingĩ, ta mĩrimũ, ruo, na gĩkuũ, ica ikuhĩ nĩ mekweherio mathire.

• Jesu Kristo nĩ ‘aahonirie arĩa othe maanyamarĩkaga.’ (MATHAYO 8:16) Na njĩra ya kũhonia arĩa othe mookaga kũrĩ we, Mũrũ wa Ngai oonanirie maũndũ marĩa Ũthamaki wa Ngai ũkaahingia na gĩkĩro kĩnene.

• “[Ngai] nĩ ekũmagiria maithori mothe mathire maitho-inĩ mao, na gĩkuũ gĩtigacoka gũkorũo kuo rĩngĩ, o na kĩeha kana kĩrĩro kana ruo. Maũndũ marĩa ma tene nĩ mathiru biũ.”—KŨGUŨRĨRIO 21:3-5.

Nĩkĩ gĩtũmaga andũ magĩe na ruo na mĩnyamaro? Andũ makoretwo makĩĩyũria kĩũria kĩu ihinda iraihu mũno. Angĩkorũo ti Ngai ũrehagĩra andũ mĩnyamaro-rĩ, nũũ ũrehaga? Ciũria icio nĩ igũcokio gĩcunjĩ-inĩ kĩrĩa kĩrũmĩrĩire.