Ngai nĩ aaheire andũ kĩheo kĩa bata, ũhoti wa kwaranĩria nake na kũmwĩra maũndũ marĩa marĩ ngoro-inĩ kũgerera mahoya. Mũnabii Daudi aahoire ũũ: “Wee Mũigua wa mahoya, andũ a mĩthemba yothe marĩũkaga kũrĩ wee.” (Thaburi 65:2) No tũngĩhoya na njĩra ĩrĩkũ nĩguo Ngai atũigue na atũrathime?

Mahoya no magũteithie gũitũrũrĩra Ngai ngoro yaku, ũmũmenyithie ũrĩa ũraigua. (Thaburi 62:8) Mwene-Hinya-Wothe nĩ akenagio nĩ mahoya ma kuuma ngoro.

O na gũtuĩka Ngai nĩ etagwo marĩĩtwa maingĩ ma ũnene, nĩ arĩ rĩĩtwa rĩake mwene. Kiugo kĩa Ngai kiugaga: “Niĩ nĩ niĩ Jehova. Rĩu nĩrĩo rĩĩtwa rĩakwa.” (Isaia 42:8) Rĩĩtwa Jehova rĩonekaga maita ta 7,000 thĩinĩ wa Maandĩko Matheru. Anabii aingĩ nĩ maahũthagĩra rĩĩtwa rĩa Ngai makĩaria nake. Iburahimu ooigire ũũ: “Jehova, ndagũthaitha . . . , reke thiĩ o na mbere kwaria [nawe].” (Kĩambĩrĩria 18:30) O na ithuĩ nĩ twagĩrĩirũo kũhũthagĩra rĩĩtwa rĩa Ngai Jehova tũkĩhoya.

Ngai nĩ ataũkagĩrũo nĩ meciria maitũ na ũrĩa tũraigua gũtekũmakania tũrahũthĩra rũthiomi rũrĩkũ. Kiugo gĩake gĩtwĩraga ũũ: “Ngai ndarĩ mũthutũkanio, no thĩinĩ wa ndũrĩrĩ ciothe, mũndũ ũrĩa ũmwĩtigĩrĩte na wĩkaga ũrĩa kwagĩrĩire nĩ etĩkĩrĩkaga nĩ we.”—Atũmwo 10:34, 35.

Makĩria ma ũguo, nĩgetha Ngai atũrathime nĩ tũrabatara gwĩka maũndũ mangĩ makĩria ma kũhoya. Nĩ tũkuona maũndũ macio thĩinĩ wa icunjĩ iria irũmĩrĩire.