Ndaciarĩirũo gĩcagi-inĩ gĩa Saxony, kĩrĩa kĩarĩ rungu rwa German Democratic Republic (GDR). Ndarereirũo mũciĩ warĩ na wendo, na aciari akwa nĩ maandutire mĩtugo mĩega. Bũrũri wa GDR warũmagĩrĩra mawatho ma Gĩkomunisti (mawatho ma atĩ indo ciothe ciagĩrĩirũo kũgayanwo nĩ andũ othe thĩinĩ wa bũrũri) na kwoguo andũ aingĩ gĩcagi-inĩ kĩu gĩa Saxony matiatindanagĩra na maũndũ ma ndini. Niĩ ndoĩ gũtirĩ Ngai. Mĩaka yakwa ya mbere 18, ũtũũro wakwa wehocetie harĩ maũndũ merĩ: wĩtĩkio wa atĩ gũtirĩ Ngai na maũndũ ma Gĩkomunisti.

Hihi nĩ kĩĩ gĩatũmaga ngucĩrĩrio nĩ maũndũ ma Gĩkomunisti? Tondũ nĩ ndakenagio nĩ rĩciria rĩa atĩ andũ othe nĩ maiganaine. Makĩria ma ũguo, ndetĩkĩtie atĩ indo ciothe ciagĩrĩirũo kũgayanwo nĩ andũ na kĩhooto, tondũ gwĩka ũguo nĩ kũngĩaninire ũhoro wa andũ amwe gũkorũo marĩ atongu mũno na angĩ gũkorũo marĩ athĩni gũkĩra njano. Kwoguo ngĩingĩra gĩkundi-inĩ kĩa andũ ethĩ gĩa Gĩkomunisti. Ndĩ na mĩaka 14, nĩ ndahũthĩrire mahinda maingĩ mũno wĩra-inĩ wa gũcokanĩrĩria na gũthondeka maratathi marĩa matetwo nĩguo mahũthĩrũo rĩngĩ. Taũni ya gwitũ ya Aue nĩ yakenirio mũno nĩ kĩyo gĩakwa nginya ngĩheo kĩheo. O na gũtuĩka ndarĩ mũnini, nĩ ndamenyanire na ateti amwe moĩkaine kũu GDR. Ndonaga atĩ ndathingataga mĩoroto ĩrĩa yagĩrĩire na ihinda rĩakwa rĩũkĩte rĩngĩarĩ rĩega.

No ũtũũro wakwa ũkĩgarũrũka o rĩmwe. Mwaka-inĩ wa 1989 Rũthingo rwa Berlin rũkĩgwa na ũcio nĩguo warĩ mũico wa maũndũ ma Gĩkomunisti mwena ũcio wa Irathĩro wa Rũraya. Ũndũ ũcio warũmĩrĩirũo nĩ ũndũ ũngĩ wamakirie mũno. Nĩ ndamenyire atĩ maũndũ ma wagi wa kĩhooto nĩ meekĩkaga kaingĩ kũu GDR. Kwa ngerekano, andũ arĩa mataanyitaga mbaru Ũkomunisti nĩ maahinyagĩrĩrio. Maũndũ maathiaga ũguo nĩkĩ? Na githĩ ithuĩ Akomunisti tũtietĩkĩtie atĩ andũ othe nĩ maiganaine? Hihi Ũkomunisti nĩ kũremwo waremetwo kũhingia maũndũ macio? Ngĩambĩrĩria kũgĩa na mĩtangĩko mĩingĩ.

Kwoguo, ngĩcenjia mwĩcirĩrie na ngĩambĩrĩria gũthingata ũini na ũcori. Tondũ nĩ ndahotete gũthiĩ cukuru ya ũini ndĩ na muoroto wa gũthiĩ yunivasĩtĩ, nĩ ndonaga no hote kũruta wĩra ũkonainie na ũini na gũcora. Makĩria ma ũguo, nĩ ndatiganĩirie mĩtugo ĩrĩa mĩega ndarutĩtwo ndĩ mũnini. Ũndũ ũrĩa warĩ wa bata rĩu warĩ gwĩkenia na kwoguo nĩ ndatumaga ndũgũ na airĩtu aingĩ o ihinda-inĩ rĩmwe. No nyĩmbo, ũcori, na ũtũũro ũcio wa kwĩrekereria itianyihanyihirie mĩtangĩko yakwa. O na mbica iria ndacoraga cionanagia o maũndũ ma guoya. Ũtũũro wa ihinda rĩũkĩte ũngĩatariĩ atĩa? Na muoroto wa ũtũũro warĩ ũrĩkũ?

Rĩrĩa ndonire macokio marĩa ndethaga, nĩ maangegirie mũno.  Hwaĩ-inĩ ũmwe ndĩ cukuru, nĩ ndaikaranirie na gĩkundi kĩa arutwo maaragĩrĩria ũhoro wa ihinda rĩũkĩte. Mandy * aarĩ mũrutwo na aarĩ Mũira wa Jehova. Hwaĩ-inĩ ũcio, nĩ aanyonirie njĩra ĩrĩa yagĩrĩire. Aanjĩrire ũũ: “Andreas, ũngĩenda macokio ma ciũria ciaku ciĩgiĩ ũtũũro na ihinda rĩũkĩte, thuthuria Bibilia na kinyi.”

Ndietĩkirie biũ ũhoro ũcio, no ngĩciria gũthuthuria macokio Bibilia-inĩ. Mandy nĩ aanyonirie ibuku rĩa Danieli mũrango wa 2, na maũndũ marĩa ndathomire nĩ maangegirie. Ũrathi ũcio ũtaaragĩria mothamaki marĩa mangĩathanire thĩ marũmanĩrĩire, na ũrĩa mangĩahutirie maũndũ thĩinĩ wa thĩ nginya mahinda-inĩ maitũ. Mandy nĩ aanyonirie morathi mangĩ marĩ thĩinĩ wa Bibilia marĩa mahutanĩtie na ihinda ritũ rĩũkĩte. Gũkinyĩria hau, nĩ ndambĩrĩirie kuona macokio ma ciũria ciakwa. No nũũ wandĩkire morathi macio, na nũũ ũngĩhota gũtaarĩria ũhoro wa ihinda rĩũkĩte wega ũguo atekũhĩtia? No gũkorũo hihi nĩ kũrĩ Ngai?

Mandy nĩ aamenyithanirie na Horst na mũtumia wake Angelika, arĩa maarĩ Aira a Jehova na makĩndeithia gũtaũkĩrũo nĩ Kiugo kĩa Ngai wega makĩria. Nĩ ndamenyire o na ihenya atĩ Aira a Jehova no o tu mahũthagĩra na makarutana mategũtigithĩria ũhoro wa rĩĩtwa rĩa Ngai, Jehova. (Thaburi 83:18; Mathayo 6:9) Nĩ nderutire atĩ Jehova Ngai nĩ aheaga andũ kĩĩrĩgĩrĩro gĩa gũgatũũra tene na tene thĩinĩ wa thĩ ĩrĩ paradiso. Thaburi 37:9 yugaga: “Arĩa metagĩrĩra Jehova, nĩo makagaya thĩ.” Nĩ ndakenire nĩ kũmenya atĩ kĩĩrĩgĩrĩro kĩu no kĩgune andũ othe arĩa merutanagĩria kũrũmĩrĩra ithimi cia Ngai cia mĩtugo ta ũrĩa itaarĩirio Bibilia-inĩ.

O na kũrĩ ũguo, nĩ ndaritũhagĩrũo nĩ kũgarũra ũtũũro wakwa nĩguo ũtwarane na ũrĩa Bibilia yugĩte. Nĩ ndetĩaga nĩ ũndũ wa kũgaacĩra maũndũ-inĩ megiĩ ũini na ũcori, na kwoguo nĩ ndabataraga kwĩruta wĩnyihia. Ningĩ ndwarĩ ũndũ mũhũthũ harĩ niĩ gũtigana na ũtũũro wakwa wa waganu. Nĩ njokagĩria Jehova ngatho mũno nĩ ũndũ wa kuonania ũkirĩrĩria, tha, na ũtaũku kwerekera arĩa merutanagĩria ũrĩa wothe mangĩhota gũikara kũringana na ũrĩa Bibilia ĩrutanaga.

Ũtũũro wa Gĩkomunisti na wĩtĩkio wa atĩ gũtirĩ Ngai, nĩmo maũndũ marĩa ũtũũro wakwa wehocetie harĩ mo mĩaka yakwa ya mbere 18, no kuuma hĩndĩ ĩyo nginya rĩu Bibilia nĩyo ĩkoretwo ĩkĩgarũra ũtũũro wakwa. Maũndũ marĩa nderutire nĩ maaninire mĩtangĩko yakwa ĩgiĩ ihinda rĩũkĩte, na makĩndeithia kũgĩa na muoroto ũtũũro-inĩ. Mwaka-inĩ wa 1993 nĩ ndabatithirio na ngĩtuĩka Mũira wa Jehova, na mwaka-inĩ wa 2000, ngĩhikia Tabitha, Mũkristiano ũrĩ kĩyo mũno. Tũhũthagĩra mahinda maingĩ o ũrĩa tũngĩhota gũteithia andũ angĩ mamenye Bibilia. Aingĩ arĩa tũcemanagia nao mareretwo o ta niĩ marũmĩtie maũndũ ma Gĩkomunisti na wĩtĩkio wa atĩ gũtirĩ Ngai. Nĩ njiguaga ngenete mũno ngĩmonia ũrĩa mangĩmenya Jehova.

Rĩrĩa ndambĩrĩirie kũnyitanĩra na Aira a Jehova, aciari akwa nĩ maamakire mũno. O na kũrĩ ũguo, kuuma hĩndĩ ĩyo nĩ monete ũgarũrũku mwega ũrĩa ngĩte naguo ũtũũro-inĩ wakwa nĩ ũndũ wa kũnyitanĩra na Aira a Jehova. Nĩ ndĩrakena tondũ rĩu nĩ mathomaga Bibilia na magathiĩ mĩcemanio ya Gĩkristiano ya Aira a Jehova.

Tũrĩ na Tabitha nĩ tũkoragwo na kĩhiko kĩega tondũ nĩ twĩrutanagĩria kũrũmĩrĩra ũtaaro ũrĩa ũheanĩtwo Bibilia-inĩ wĩgiĩ arĩa mahikanĩtie. Kwa ngerekano, kũrũmĩrĩra ũtaaro wĩgiĩ wĩhokeku thĩinĩ wa kĩhiko nĩ gũtũteithĩtie gũthiĩ na mbere gũkorũo na kĩhiko kĩrũmu.​—Ahibirania 13:4.

Rĩu ndikoragwo na guoya wa ũtũũro kana mĩtangĩko ĩgiĩ ihinda rĩũkĩte. Njiguaga ndĩ gĩcunjĩ kĩa famĩlĩ ya thĩ yothe ya Akristiano ĩrĩa ĩkenagĩra thayũ wa ma na ũrũmwe. Thĩinĩ wa famĩlĩ ĩno, ithuothe nĩ tũiganaine. Ũcio nĩ ũndũ njĩtĩkĩtie na ndũũrĩte ndĩĩrirĩirie kuona ũkĩhinga ũtũũro wakwa wothe.