RUNGU rwa Watho, ndutura na ndirahũgĩ nĩ ciarĩ njĩtĩkĩrĩku kũrutwo irĩ magongona harĩ Jehova. Nyoni icio cierĩ nĩ ciagwetagwo hamwe watho-inĩ wĩgiĩ magongona, na mũndũ nĩ angĩarutire ĩmwe yacio. (Alaw. 1:14; 12:8; 14:30) Ũndũ ũcio warĩ na ũguni ũrĩkũ? Ũndũ ũmwe nĩ atĩ, ndutura citioonekaga kaingĩ. Ciaagaga nĩkĩ?

Ndutura nĩ cikaraga igĩthamathamaga na cionekaga bũrũri-inĩ wa Isiraeli mĩeri-inĩ ya ũrugarĩ. O mwaka mweri-inĩ wa Oktomba nĩ ithamaga igathiĩ mabũrũri-inĩ marĩa marĩ na ũrugarĩ, na igacoka bũrũri-inĩ wa Isiraeli heho yathira. (Rwĩm. 2:11, 12; Jer. 8:7) Ũguo nĩ kuuga Aisiraeli matingĩonire ndutura cia kũruta irĩ magongona mĩeri-inĩ ya heho.

No ndirahũgĩ itithamathamaga, kwoguo nĩ cionekaga bũrũri-inĩ wa Isiraeli hĩndĩ ciothe. Makĩria ma ũguo, andũ nĩ maarĩithagia ndirahũgĩ kwao mũciĩ. Kũringana na ibuku rĩtagwo Bible Plants and Animals, “thĩinĩ wa matũũra na taũni cia Palestina nĩ kwarĩithagio ndirahũgĩ mĩciĩ-inĩ ya andũ. Ene nyũmba nĩ maathondekete marima thingo-inĩ marĩ tũnyũmba twa nyoni twa gũikaraga.”

Kwoguo Jehova nĩ oonanirie atĩ nĩ endete andũ na nĩ ameciragia, na njĩra ya gwĩtĩkĩria Aisiraeli marutage nyoni icio irĩ magongona tondũ nĩ cionekaga mahinda-inĩ mothe ma mwaka.