KWARĨ mũthia-inĩ wa Novemba mwaka wa 1932 taũni-inĩ ya Mexico City. Kiumia kĩmwe mbere ĩyo, gwakoretwo gwekĩrũo matawa ma gũtongoria ngari barabara-inĩ, ma mbere taũni-inĩ ĩyo ĩrĩa yarĩ na andũ makĩria ma milioni ĩmwe. No rĩu, ũhoro wa matawa macio nĩ watigĩte kwario. Andĩki a mohoro a taũni ĩyo rĩu maaragĩrĩria maũndũ ma kiumia kĩu. Marĩ na kamera ciao, maarĩ ceceni-inĩ ya mũgithi metereire mũgeni wa mwanya, Mũrũ wa Ithe Witũ Joseph F. Rutherford, ũrĩa warĩ mũrũgamĩrĩri wa Watch Tower Society hĩndĩ ĩyo. Aira a Jehova a kũu o nao maarĩ hau metereire kũnyita ũgeni Mũrũ wa Ithe Witũ Rutherford, ũrĩa wokĩte nĩ ũndũ wa kĩgomano kĩa bũrũri ũcio gĩa thikũ ithatũ.

Ngathĩti ya The Golden Age yoigire ũũ: “Hatarĩ nganja, kĩgomano gĩkĩ gĩgũtũũra kĩririkanagwo kĩrĩ kĩa bata mũno harĩ ũthii wa na mbere wa Ũhoro wa Ma bũrũri-inĩ wa Mexico.” No nĩ kĩĩ gĩatũmire kĩgomano kĩu, kĩrĩa kĩarĩ na andũ ta 150, gĩkorũo kĩrĩ kĩa mwanya?

Mbere ya kĩgomano kĩu, ũhoro wa Ũthamaki warĩ na moimĩrĩro o manini kũu Mexico. Kuuma mwaka-inĩ wa 1919, nĩ gwekagwo igomano citarĩ nene, no mũigana wa ciũngano wathiaga ũnyihĩte mĩaka-inĩ ĩrĩa yarũmĩrĩire. Nĩ kwerĩgagĩrĩrũo maũndũ magarũrũke rĩrĩa kwagĩire na wabici ya rũhonge taũni-inĩ ya Mexico City mwaka-inĩ wa 1929. Ĩndĩ no kwarĩ na mĩhĩnga. Rĩrĩa kwarutirũo ũtongoria wa atĩ andũ matige gũtukania biacara na wĩra wa kũhunjia, painia ũmwe ũtaakenire nĩ eeherire ithondeka-inĩ na akĩambĩrĩria gĩkundi gĩake gĩa kwĩruta Bibilia. Ihinda-inĩ o rĩu, ũrĩa warĩ mũrori wa wabici ya rũhonge nĩ eingĩranĩtie na mĩthiĩre ĩtaarĩ ya kĩĩmaandĩko na kwoguo akĩeherio. Akristiano ehokeku bũrũri-inĩ ũcio nĩ maabataraga gwĩkĩrũo hinya kĩĩroho.

Hĩndĩ ya iceera rĩake, Mũrũ wa Ithe Witũ Rutherford nĩ eekĩrire ngoro mũno arĩa ehokeku kũgerera mĩario ĩĩrĩ ya kĩgomano na mĩario ĩngĩ ĩtano kũgerera redio. Rĩarĩ riita rĩa mbere harĩ ceceni cia redio cia Mexico kũmemerekia ũhoro ũrĩa mwega bũrũri-inĩ wothe. Thutha wa kĩgomano kĩu, mũrori mwerũ wa wabici ya rũhonge nĩ aabangire wĩra, na aarĩ na ariũ a Ithe witũ marĩ na kĩyo magĩthiĩ na mbere kũhunjia marĩ na hinya mwerũ na irathimo cia Jehova.

Mwaka ũrĩa warũmĩrĩire, nĩ gwekirũo igomano igĩrĩ bũrũri-inĩ ũcio, kĩmwe gĩekĩirũo taũni-inĩ ĩrĩa ĩkoragwo na gĩcukĩro kĩa meri ya Veracruz na kĩu kĩngĩ taũni-inĩ ya Mexico City. Kĩyo kĩrĩa gĩekĩrirũo ũtungata-inĩ gĩkĩambĩrĩria kũgĩa na moimĩrĩro mega. Mwaka-inĩ wa 1931, kwarĩ na ahunjia 82. Mĩaka ikũmi thutha ũcio, kwarĩ na ahunjia maita ikũmi ma acio. Kĩgomano gĩa Gĩtheokrasi kĩa mwaka wa 1941 taũni-inĩ ya Mexico City, kĩarĩ na andũ ta 1,000.

Mwaka-inĩ wa 1943, Aira a Jehova meehumbire imenyithia ciandĩkĩtwo mĩena ĩĩrĩ cia kũgaathĩrĩria Kĩgomano gĩa Gĩtheokrasi kĩa “Free Nation’s” kĩrĩa gĩekirũo taũni-inĩ 12 kũu Mexico. * Imenyithia igĩrĩ ciohagĩrĩrũo ciande-inĩ, kĩmwe gĩgacuuha mwena wa mbere na kĩu kĩngĩ mũgongo-inĩ, njĩra ya kũgaathĩrĩria ĩrĩa yahũthagĩrũo nĩ Aira a Jehova kuuma mwaka-inĩ wa 1936.

 Ngathĩti ya La Nación ĩkĩarĩrĩria ũrĩa njĩra ĩyo ya kũgaathĩrĩria ya kũrũgama taũni-inĩ mehumbĩte imenyithia icio yarĩ na moimĩrĩro mega, yoigire ũũ: “Mũthenya wa mbere [wa kĩgomano, Aira a Jehova] meerirũo manyite ũgeni andũ makĩria. Mũthenya ũrĩa warũmĩrĩire, matingĩaiganĩire harĩa maacemanĩtie.” Moimĩrĩro mega marĩa moimanire na njĩra ĩyo ya kũgaathĩrĩria matiakenirie Kanitha wa Gatoreki na kwoguo ũkĩambĩrĩria kambĩini ya gũũkĩrĩra Aira a Jehova. O na kũrĩ na ũkararia ũcio, aarĩ na ariũ a Ithe witũ no maathiire na mbere kũrũgama barabara-inĩ cia taũni mategwĩtigĩra. Ngathĩti ya La Nación yugaga atĩ andũ othe taũni-inĩ nĩ monaga athuri na atumia acio macuurĩtie imenyithia cia kũgaathĩrĩria. Gĩcunjĩ kĩu kĩa ngathĩti kĩarĩ na mbica ya ariũ a Ithe witũ marĩ barabara-inĩ cia taũni ya Mexico City. Kĩanda wa mbica ĩyo haarĩ na ciugo: “Tharĩkĩro barabara-inĩ cia taũni.”

Mĩaka-inĩ ĩyo, aarĩ na ariũ a Ithe witũ aingĩ nĩ maabataraga kwĩima mũno nĩguo mahote gũthiĩ igomano itaarĩ nyingĩ iria ciekagwo bũrũri-inĩ wa Mexico. Andũ aingĩ arĩa mokaga igomano, moimaga icagi-inĩ ciarĩ thĩinĩ mũno, kũndũ mĩgithi ĩtangĩakinyire na gũtaarĩ barabara. Kwoguo aingĩ mokaga na ndigiri kana magathiĩ magũrũ thikũ nyingĩ nĩguo makinye harĩa mangĩahaicĩire mũgithi ũrĩa ũngĩamatwarire taũni-inĩ ĩrĩa kĩgomano gĩekagĩrũo.

Aarĩ na ariũ a Ithe witũ aingĩ maarĩ athĩni, na nĩ maaritũhagĩrũo nginya nĩ kũrĩha tigiti o wa kũmakinyia kĩgomano-inĩ. Aingĩ maakinya, maaikaraga na aarĩ na ariũ a Ithe witũ a kũu, arĩa maamanyitaga ũgeni mĩciĩ-inĩ yao marĩ na wendo mũingĩ. Angĩ maakomaga thĩinĩ wa Nyũmba cia Ũthamaki. Hĩndĩ ĩmwe, andũ ta 90 arĩa mokĩte kĩgomano, maaikarire wabici-inĩ ya rũhonge kũrĩa maarĩirũo katoni 20 cia mabuku o mũndũ cituĩke marĩrĩ mao. Ibuku rĩa Kitabu cha Mwaka rĩkĩarĩrĩria ũhoro ũcio riugaga atĩ ageni acio maacokirie ngatho tondũ monaga “marĩrĩ macio marĩ mega na marĩ na ũrugarĩ gũkĩra gũkoma thimiti-inĩ.”

Aarĩ na ariũ a Ithe witũ acio monaga gũcemania hamwe igomano-inĩ cia Gĩkristiano ũrĩ ũndũ wakĩrĩte kĩndũ gĩothe mangĩeimire. Ũmũthĩ ũyũ, o ũrĩa mũigana wa ahunjia bũrũri-inĩ wa Mexico ũrathiĩ wongererekete ũgakuhĩrĩria milioni ĩmwe, roho ũcio wa kuonania ngatho no ũrathiĩ na mbere kuoneka. * Riboti ya wabici ya rũhonge ya mwaka wa 1949 yoigire ũũ ũhoro wa ariũ a Ithe witũ: “Moritũ marĩa makoragwo namo matinyihanyihagia kĩyo kĩao harĩ ũhoro wa ma tondũ o thutha wa kĩgomano matigagwo makĩarĩrĩria maũndũ macio kahinda karaihu na aingĩ makoria, Tũkagĩa na kĩgomano kĩngĩ rĩ?” O na ũmũthĩ ũyũ, ũguo noguo gũtariĩ bũrũri-inĩ ũcio.—Kuuma Mũthithũ-inĩ Witũ thĩinĩ wa Central America.