Mwaka wa 1985 ndaarĩ na mĩaka ikũmi. Cukuru itũ thĩinĩ wa Columbus, Ohio, U.S.A. nĩ guokire ciana cioimĩte Kambodia. Kamwana kamwe harĩ ciana icio nĩ kooĩ ciugo cigana ũna cia Gĩthũngũ. Na njĩra ya kũnjorera mbica, nĩ kaambĩrĩirie kũndaarĩria maũndũ ma kũgegania ma ũrĩa andũ maanyariragwo makĩũragagwo na ũrĩa amwe meetharire. Nĩ ndaarĩraga mũno ũtukũ ndeeciria ũhoro wa ciana icio. Nĩ ndeendaga kũmeera ũhoro wa Paradiso na ũrĩa andũ makaariũkio, ĩndĩ matingĩaiguire rũthiomi rwakwa. O na gũtuĩka ndaarĩ o kamwana kanini, nĩ ndaatuire itua rĩa kwĩruta rũthiomi rwa Kambodia nĩguo hotage kũhunjĩria andũ cukuru ũhoro wa Jehova. Hĩndĩ ĩyo ndiamenyaga ũrĩa itua rĩu rĩngĩakorirũo na moimĩrĩro mega mũno ũtũũro-inĩ wakwa wa thutha.

Kwĩruta rũthiomi rwa Kambodia ndwarĩ ũndũ mũhũthũ. Maita merĩ, nĩ ndecirĩtie gũtigana ũhoro ũcio wa kwĩruta, ĩndĩ Jehova nĩ aahũthĩrire aciari akwa kũnjĩkĩra ngoro. Thutha wa ihinda, arutani na arutwo arĩa twathomaga nao nĩ maambĩrĩirie kũnyonia bata wa gũthingata wĩra wa mbeca nyingĩ. Ĩndĩ, niĩ ndeendaga gũtuĩka painia, na nĩ ũndũ ũcio ngĩthuura kothi iria cingĩandeithirie kuona wĩra ũtarĩ wa mahinda mothe nĩguo hote gũkinyĩra muoroto wakwa. Rĩrĩa itarĩ cukuru nĩ ndaathiaga kũrĩ mapainia amwe tũkahunjia nao. Ningĩ nĩ ndaateithagia arutwo kwĩruta Gĩthũngũ. Ũndũ ũcio nĩ wacokire kũndeithia mũno thutha-inĩ.

Ndĩ na mĩaka 16, nĩ ndaiguire atĩ nĩ kwarĩ na gĩkundi kĩa rũthiomi rwa Kambodia itũũra-inĩ rĩa Long Beach, California, U.S.A. Ngĩthiĩ kuo na ngĩĩruta gũthoma rũthiomi rwa Kambodia. Ndarĩkia cukuru o ũguo, nĩ ndatuĩkire painia na ngĩthiĩ na mbere kũhunjĩria andũ arĩa maaragia rũthiomi rwa Kambodia hakuhĩ na gwitũ mũciĩ. Rĩrĩa ndakinyirie mĩaka 18, nĩ ndaambĩrĩirie gwĩciria ũrĩa ingĩthamĩra Kambodia. Kũu Kambodia gũtiagĩrĩte biũ, o na kũrĩ ũguo nĩ ndaamenyaga atĩ thĩinĩ wa andũ milioni ikũmi arĩa maatũũraga kuo nĩ anini mũno maahunjĩirio ũhoro ũrĩa mwega wa Ũthamaki. Gũkinyĩria hĩndĩ ĩyo, bũrũri-inĩ ũcio wothe kwarĩ na kĩũngano kĩmwe tu kĩrĩa kĩarĩ na ahunjia 13. Ndaathire Kambodia rĩa mbere ndĩ na mĩaka 19. Mĩaka ĩĩrĩ thutha ũcio, nĩ ndaatuire itua rĩa gũthiĩ gũikaraga kuo. Nĩ ndonire wĩra ũtaarĩ wa mahinda mothe wa gũthomithia na gũtaũra Gĩthũngũ. Wĩra ũcio nĩ wandeithagia kwĩrũgamĩrĩra ũtungata-inĩ. Thutha wa ihinda, nĩ ndagĩire na mũtumia warĩ na mĩoroto o ta yakwa. Nĩ tũkeneire mũno tũrĩ nake gũteithia andũ aingĩ arĩa maragia rũthiomi rwa Kambodia kwĩyamũrĩra Jehova ũtũũro-inĩ wao.

Jehova nĩ aheete maũndũ ‘marĩa ngoro yakwa ĩhoyaga.’ (Thab. 37:4) Gũtua andũ arutwo nĩguo wĩra ũrĩa ũrehagĩra mũndũ gĩkeno mũno kũrĩ wĩra ũngĩ o wothe. Kwa ihinda rĩa mĩaka 16, ĩrĩa ngoretwo Kambodia, gakundi kau ka ndungata cia Jehova 13, gakũrĩte gagatuĩka ciũngano 12 na ikundi 4 iria irĩ kũndũ kũraihu!—Ta ũrĩa rũheanĩtwo nĩ Jason Blackwell.