KATHERINE aarereirũo United States na akĩbatithio arĩ na mĩaka 16. O na gũtuĩka nĩ aahunjagia na kĩyo mũno, ti andũ aingĩ maakenagio nĩ ndũmĩrĩri ya Ũthamaki kũrĩa aahunjagia. Oigire ũũ: “Nĩ ndathomaga maũndũ monetwo megiĩ andũ maahoire Ngai amatũmĩre mũndũ wa kũmateithia merute ũhoro wake. Nĩ nderiragĩria gũcemania na mũndũ ta ũcio, ĩndĩ ndigana kuona o na ũmwe.”

Thutha wa kũhunjia gĩcigo kĩu mĩaka mĩingĩ, Katherine nĩ aambĩrĩirie gwĩciria ũrĩa angĩthamĩra kũndũ kũrĩ na andũ mangĩtĩkĩra makĩria ndũmĩrĩri ya Ũthamaki. O na kũrĩ ũguo, nĩ aarigagwo kana nĩ ekũhota ũndũ ũcio. Ũtũũro-inĩ wake wothe no riita rĩmwe aakoretwo aikarĩte haraya na famĩlĩ yao, na o na gũtuĩka kaarĩ kahinda ga ciumia igĩrĩ tu, aaiguaga ihooru o mũthenya. Ĩndĩ, tondũ nĩ eendaga mũno kwĩgĩra na gĩkeno kĩrĩa kiumanaga na gũteithia arĩa macaragia Jehova, nĩ aatuire itua. Thutha wa gwĩciria ũhoro wa kũndũ kũigana ũna kũrĩa angĩathamĩire, nĩ aandĩkĩire wabici ya rũhonge ya Guam marũa na akĩheo ũhoro ũrĩa aabataraga. Kũrĩ Julaĩ 2007, arĩ na mĩaka 26, nĩ aathamĩire gĩcigĩrĩra kĩmwe gĩtagwo Saipan, iria-inĩ rĩa Pacific, kiromita 10, 000 kuuma kwao mũciĩ. Gũthama gwake kwarĩ na moimĩrĩro marĩkũ?

Kahinda kanini thutha wa gũthamĩra kĩũngano kĩu kĩerũ, Katherine nĩ aahunjĩirie mũtumia wetagwo Doris warĩ na mĩaka 40 na kĩndũ, na agĩtĩkĩra kwĩruta Bibilia. Thutha wa kũmũruta icunjĩ cia mbere ithatũ cia ibuku rĩa Bibilia Ĩrutanaga, Katherine nĩ aambĩrĩirie gũtangĩka. Oigire ũũ: “Doris aarĩ mũrutwo mwega mũno na ndionaga ta ingĩhota kũmũruta wega. Ndiakoretwo thomithĩtie mũrutwo agathiĩ na mbere, na kwoguo ndoonaga ta Doris aabataraga kũrutwo nĩ mwarĩ wa Ithe witũ ũrĩ na ũmenyeru, na kũngĩhoteka wa riika rĩake.” Katherine nĩ aahoire Jehova amũteithie kuona mwarĩ wa Ithe witũ ũrĩa waagĩrĩire kũruta Doris. Agĩcoka agĩciria kũmenyithia Doris atĩ nĩ ekũmũrehera mwarimũ ũngĩ mathomage nake.

Katherine oigire ũũ: “Itanamũmenyithia, Doris nĩ aanjĩrire atĩ nĩ aarĩ na gathĩna eendaga twarĩrĩrie ũhoro wako. Thutha wa kũmũthikĩrĩria, nĩ ndamũtaarĩirie ũrĩa Jehova aandeithirie hĩndĩ ndaarĩ na gathĩna o ta kau. Nĩ aanjokeirie ngatho mũno.” Doris aacokire akĩra Katherine ũũ: “We nĩwe Jehova arahũthĩra kũndeithia. Mũthenya wa mbere ũrĩa wokire gwakwa, ndathomete Bibilia mathaa maingĩ. Ndaahoyaga Ngai ngĩrĩraga andũmĩre mũndũ wa kũndeithia gũtaũkĩrũo nĩ Bibilia.  Na kahinda o kau ũkĩringaringa mũrango wakwa. Nĩ Jehova wacokirie mahoya makwa!” Rĩrĩa Doris aataragĩria ũhoro ũcio wa kũhutia ngoro, Katherine akĩambĩrĩria gũita maithori. Oigire ũũ: “Ciugo cia Doris ciarĩ macokio ma mahoya makwa. Jehova nĩ aanyonirie atĩ ndaarĩ na ũhoti wa gũthiĩ na mbere kwĩruta na Doris.”

Doris aabatithirio 2010, na rĩu nĩ arathomithia arutwo maigana ũna Bibilia. Katherine oigire ũũ: “Nĩ ngenaga mũno nĩ ũndũ wa kuona atĩ ũndũ ũrĩa ndatũire ndĩrirĩirie wa gũteithia mũndũ atuĩke ndungata ya Jehova nĩ wahingire!” Rĩu Katherine nĩ painia wa mwanya gĩcigĩrĩra-inĩ kĩmwe thĩinĩ wa Pacific gĩtagwo Kosrae.

Makĩria ma aarĩ na ariũ a Ithe witũ igana rĩmwe kuuma mabũrũri-inĩ mangĩ (a kuuma mĩaka 19 nginya 79) nĩ matungatĩte kũrĩa kũrĩ na ũbataro mũnene wa ahunjia bũrũri-inĩ wa Micronesia. Gĩkeno kĩrĩa ahunjia acio marĩ kĩyo makoragwo nakĩo nĩ gĩtaarĩirio wega nĩ Erica, ũrĩa wathamĩire Guam mwaka-inĩ wa 2006 arĩ na mĩaka 19. Oigire ũũ: “Gũkorũo mũndũ arĩ painia kũndũ andũ manyoteire ũhoro wa ma nĩ ũndũ ũrehaga gĩkeno mũno. Nĩ njokagĩria Jehova ngatho nĩ kũndeithia nyingĩre ũtungata-inĩ ũyũ. Ũyũ nĩguo wĩra ũrĩa wa bata mũno ũtũũro-inĩ!” Rĩu Erica atungataga arĩ painia wa mwanya gĩcigo-inĩ kĩa Ebeye, Icigĩrĩra-inĩ cia Marshall. Ma nĩ atĩ, gũtungatĩra bũrũri-inĩ ũngĩ nĩ kũrĩ moritũ makuo. Reke twarĩrĩrie matatũ mamo na tuone ũrĩa ahunjia arĩa mathamĩire Micronesia mahiũranagia namo.

Mũtũũrĩre. Akinya gĩcigĩrĩra-inĩ kĩa Palau mwaka-inĩ wa 2007, mũrũ wa Ithe witũ Simon ũrĩa ũrĩ na mĩaka 22, nĩ aamenyire o na ihenya atĩ arĩthũkũmaga o tũbeca tũnini tũringithanĩtio na kĩrĩa aathũkũmaga bũrũri-inĩ wao wa Ngeretha. Oigire ũũ: “No mũhaka ingĩerutire kwaga kũgũraga o kĩrĩa ndenda. Rĩu ngĩthuura irio iria ngũgũra thuuraga na ũbarĩrĩru na ngaringithania thogora nĩ getha ngũre na thogora wa thĩ. Rĩrĩa indo ciakwa ciathũka, njaragia indo cia raithi cia gũcithondeka nacio, ngacoka ngacaria mũndũ ũngĩndeithia gũthondeka.” Hihi gũikara mũtũũrĩre mũhũthũ kwamũteithirie atĩa? Oigaga ũũ: “Nĩ kwandeithirie kũmenya indo iria mũndũ abataraga mũno ũtũũro-inĩ na ũrĩa ingĩtũũra ona itarĩ na indo nyingĩ. Kũrĩ maita maigana ũna ndĩyoneire wega guoko kwa Jehova gũkĩndeithia. Mĩaka ĩyo mũgwanja ndungatĩte gũkũ ndirĩ ndaga kĩndũ gĩa kũrĩa kana handũ ha gũkoma.” Hatarĩ nganja, Jehova nĩ ateithagia arĩa maikaraga mũtũũrĩre mũhũthũ nĩguo macarie Ũthamaki mbere.—Mat. 6:32, 33.

Ihooru rĩa kuuma mũciĩ. Erica oigire ũũ: “Nĩ ũndũ wa ũkuruhanu wa hakuhĩ ũrĩa ngoragwo naguo na famĩlĩ itũ, nĩ ndoonaga ta ngagĩa na ihooru nĩ ũndũ wa kũmaaga na ũndũ ũcio ũthũkie ũtungata wakwa.” Hihi eeharĩirie atĩa nĩ ũndũ wa ũndũ ũcio? “Mbere ya gũthiĩ, nĩ ndathomire icunjĩ cia Mũrangĩri iria ciarĩrĩirie ũhoro wa ihooru rĩa kuuma mũciĩ. Gwĩka ũguo nĩ kwandeithirie kũmenya ũrĩa ingĩahiũranirie na ihooru. Gĩcunjĩ-inĩ kĩmwe kĩa iria ndathomire, mũtumia ũmwe omĩrĩirie mwarĩ na ciugo ici, ‘Jehova no ahote gũkũrũmbũyia makĩria ma ũrĩa ingĩhota.’ Ciugo icio nĩ cianyũ mĩrĩirie mũno.” Patrick marĩ na mũtumia wake Hannah matungataga gĩcigo-inĩ kĩa Majuro Icigĩrĩra-inĩ cia Marshall. Hannah aahiũranagia na ihooru rĩa kuuma mũciĩ na njĩra ya gwĩciria ũhoro wa aarĩ na ariũ a Ithe witũ a kĩũngano kĩao. Oigaga ũũ: “Nĩ njokagĩria Jehova ngatho hingo ciothe nĩ ũndũ wa ũrũmwe wa thĩ yothe wa aarĩ na ariũ a Ithe witũ tondũ o nao nĩ famĩlĩ itũ. Tiga nĩ ũteithio wao, ndingĩhotete gũthiĩ gũtungata kũrĩa kũrĩ na bata mũnene wa ahunjia.”

Kũgĩa na arata. Simon oigire ũũ: “Rĩrĩa mũndũ athiĩ bũrũri ũngĩ, akoraga hakuhĩ maũndũ mothe nĩ ngũrani na kwao. Rĩmwe na rĩmwe nĩ ndĩriragĩria kwaria tũmaũndũ twa mathekania no ngetigĩra andũ matigataũkĩrũo ũũru.” Erica oigaga: “Kĩambĩrĩria-inĩ, ndiarĩ na arata, ĩndĩ ũndũ ũcio nĩ wandeithagia gwĩcũrania muoroto wakwa wa gũthamĩra kũu warĩ ũrĩkũ. Ndiathamĩte nĩgetha ng’unĩke, no ndathamĩte nĩ getha ndungatĩre Jehova makĩria.” Aacokire akiuga ũũ: “Thutha wa ihinda nĩ ndaagĩire na arata ega, arĩa nyonaga marĩ a bata mũno.” Simon nĩ erutanĩirie mũno kwĩruta rũthiomi rwa Palauan, rũrĩa rũtũmaga ahote ‘kũhingũra ngoro yake’ akĩaria na aarĩ na ariũ a Ithe witũ a Palau. (2 Kor. 6:13) Kĩyo gĩake gĩa kwĩruta rũthiomi rũu nĩ gĩatũmire aarĩ na ariũ a Ithe witũ a kũu mamwende mũno. Ma nĩ atĩ, rĩrĩa ahunjia arĩa mathamĩire mabũrũri mangĩ marutithania wĩra na ũrũmwe hamwe na ahunjia a kũrĩa mathamĩire, othe nĩ matũmaga kũgĩe na ũrata mwega thĩinĩ wa kĩũngano. Nĩ irathimo irĩkũ ingĩ arĩa meerutagĩra gũtungatĩra kũndũ kũrĩ na bata mũnene wa ahunjia magĩaga na cio?

Mũtũmwo Paulo aandĩkire ũũ: “Ũrĩa ũkũhanda nyingĩ, nĩwe ũkagetha nyingĩ.” (2 Kor. 9:6) Hatarĩ nganja, ũtaaro ũrĩa ũgwetetwo rĩandĩko-inĩ rĩu nĩ ũhũthĩkaga harĩ arĩa mandandũraga ũtungata wao. ‘Magethaga na ũingĩ’ maũndũ marĩkũ bũrũri-inĩ wa Micronesia?

Bũrũri-inĩ wa Micronesia kũrĩ na mĩeke mĩingĩ ya kũruta andũ Bibilia na kwĩyonera ũrĩa arĩa merutĩte Kiugo kĩa Ngai na magakĩhũthĩra marakũra kĩĩroho. Ningĩ Patrick na Hannah nĩ maahunjirie gacigĩrĩra-inĩ kanini ka Angaur, karĩa gakoragwo na aikari 320. Thutha wa kũhunjia kũu ihinda rĩa mĩeri ĩĩrĩ, nĩ maacemanirie na mũtumia ũmwe ũtaarĩ mũhiku. Mũtumia ũcio nĩ eetĩkĩrire kwĩruta Bibilia o na ihenya, akĩenda ũhoro wa ma mũno na agĩka mogarũrũku manene ũtũũro-inĩ wake. Hannah oigire ũũ: “Hingo ciothe twarĩkia kwĩruta Bibilia nake, twaroranaga tũkĩinũka tũrĩ mĩithikiri-inĩ itũ, tũkoiga ũũ: ‘Nĩ ngatho Jehova.’” Hannah aacokire akiuga ũũ: “Nĩ njũĩ atĩ Jehova nĩ angĩahũthĩrire njĩra ĩngĩ o yothe kũgucia mũtumia ũcio, no nĩ ũndũ wa gũkorũo tũgĩtungata kũrĩa kũrĩ na bata mũnene, nĩ twahotire gũcaria na gũteithia ng’ondu ĩyo ĩmenye Jehova. Ũcio nĩ ũmwe wa maũndũ marĩa manatũrehera gĩkeno mũno ũtũũro-inĩ witũ wothe!” O ta ũrĩa Erica oigire, “rĩrĩa wateithia mũndũ amenye Jehova, ũgĩaga na gĩkeno gĩtangĩgereka!”

Mabũrũri-inĩ maingĩ nĩ kũrĩ na bata mũnene wa ahunjia. Hihi no wĩrutĩre gũthamĩra kũndũ ta kũu? Hoya Jehova ekĩre hinya wendi waku wa kwandandũra ũtungata. Arĩrĩria ũndũ ũcio na athuri a kĩũngano, mũrori wa mũthiũrũrũko, kana na arĩa manatungatĩra bũrũri-inĩ ũrĩ na bata mũnene wa ahunjia. Wambĩrĩria mĩbango ĩyo, andĩkĩra wabici ya rũhonge ĩrĩa ĩrũgamĩrĩire gĩcigo kĩrĩa ũrenda gũthiĩ gũtungata, nĩguo ũhoe ũhoro makĩria. * No kũhoteke o nawe no ũtuĩke ũmwe wa ngiri nyingĩ cia aarĩ na ariũ a Ithe witũ, ethĩ na akũrũ, arĩa marĩ thĩinĩ wa kĩhiko na arĩa matarĩ thĩinĩ wa kĩhiko, arĩa meerutagĩra meyendeire na makagĩa na gĩkeno gĩa ‘kũgetha na ũingĩ.’