KUUMA NGOTHI-INĨ | MAHEENI MAMWE MARUTANAGWO MEGIĨ NGAI
Maheeni ma Atĩ Ngai Ndarĩ Tha
ŨRĨA ANDŨ AINGĨ METĨKĨTIE Ibuku rĩa Catechism of the Catholic Church riugaga ũũ: “Andũ arĩa mekĩte mehia moru mũno maarĩkia gũkua, mĩoyo yao ĩthiaga icua-inĩ, kũrĩa ĩherithagio ‘mwaki-inĩ wa tene na tene.’” Nao atongoria amwe a ndini moigaga atĩ, icua nĩ ũhoro wa gũkorũo mũndũ amũranĩtio biũ na Ngai.
ŨRĨA BIBILIA ĨRUTANAGA
‘Roho [“muoyo,” NW] ũrĩa wĩhagia nĩguo ũgakua.’ (Ezekieli 18:4) Arĩa makuĩte “matirĩ ũndũ moĩ.” (Kohelethu 9:5) Angĩkorũo muoyo nĩ ũkuaga na gũtirĩ ũndũ mũndũ mũkuũ amenyaga-rĩ, angĩherithio atĩa “mwaki-inĩ wa tene na tene” kana aigue ruo rwa kwamũranio biũ na Ngai?
Thĩinĩ wa Bibilia, ciugo cia Kĩhibirania na Kĩngiriki iria kaingĩ itaũragwo “kwa ngoma,” ciugĩte mbĩrĩra ĩrĩa andũ othe mathiaga. Kwa ngerekano, Ayubu aahoire ũũ rĩrĩa arĩ na ndwari njũru mũno: “Na arĩ korũo nĩ kũ’hitha wetĩkĩra kũ’hitha kwa ngoma.” (Ayubu 14:13) Ayubu aahoyaga ahurũkio mbĩrĩra-inĩ, no ti icua-inĩ rĩa mwaki kana kwamũranio na Ngai.
BATA WA KŨMENYA MA
Angĩkorũo Ngai ndarĩ tha, tũtingĩenda kũmũkuhĩrĩria no tũmũraihĩrĩirie. Rocío, ũrĩa ũikaraga bũrũri-inĩ wa Mexiko oigire ũũ: “Kuuma ndĩ mũnini ndaarutĩtwo atĩ nĩ kũrĩ mwaki wa tene na tene. Ũndũ ũcio nĩ watũmaga ndĩtigĩre Ngai mũno ngona ta atarĩ ngumo o na ĩmwe njega. Ndonaga ta arĩ wa marakara na ũtendete andũ.”
Rocío, nĩ aacenjirie mawoni make megiĩ Ngai, amenya ũrĩa Bibilia yugĩte ũhoro-inĩ wĩgiĩ matuĩro ma Ngai na kũrĩa andũ mathiaga makua. Oigire ũũ: “Ndaiguire ndakena ta ndehererio mũrigo mũnene. Ngĩambĩrĩria kuona atĩ Ngai atwendagĩra maũndũ mega, nĩ atwendete, na atĩ no hote kũmwenda. Ahaana o ta ithe wa mwana ũrĩa ũnyitaga ciana ciake moko na ũciendagĩra maũndũ mega.”—Isaia 41:13.
Andũ aingĩ nĩ merutanagĩria kwenda Ngai nĩguo matikanaikio icua-inĩ, ĩndĩ Ngai ndendaga ũmũtungatĩre tondũ nĩ ũramwĩtigĩra. Ithenya rĩa ũguo, Jesu oigire ũũ: ‘Enda Mwathani [Jehova] Ngai waku.’ (Mariko 12:29, 30) Makĩria ma ũguo, rĩrĩa twamenya atĩ Ngai ekaga maũndũ ma kĩhooto, no tũkorũo na ma atĩ noguo ageeka mahinda-inĩ mokĩte. O ta mũrata wa Ayubu wetagwo Elihu, no tũgĩe na ũũma ũyũ: “Mũrungu ndarĩ hingo angĩĩka waganu, we Mwene-Hinya ndangĩhong’ora cira.”—Ayubu 34:12.
