Mũthomi ũmwe wĩtagwo David Cunningham, aandĩkire ũũ ibuku-inĩ rĩake rĩa, Theological Studies: “Tũtirĩ twaiguithanĩria kana hihi Ngai nĩ arĩ rĩĩtwa, na angĩkorũo nĩ arĩ-rĩ, nĩ rĩrĩkũ.”

Ngai oigire ũũ: “Niĩ nĩ niĩ Jehova; rĩu nĩrĩo rĩĩtwa rĩakwa.” (Isaia 42:8) Jehova, nĩ rĩĩtwa rĩa Kĩhibirania rĩrĩa riugĩte, “Nĩ Atũmaga Maũndũ Mekĩke.”

Jehova nĩ endaga tũhũthagĩre rĩĩtwa rĩake. Bibilia yugaga ũũ: ‘Gwetai rĩĩtwa rĩake; umbũrĩrai andũ maũndũ marĩa ekaga, mũkĩmeeraga atĩ rĩĩtwa rĩake nĩ itũũgĩrie mũno.’—Isaia 12:4.

Jesu nĩ aahũthagĩra rĩĩtwa rĩa Ngai. Hĩndĩ ĩmwe akĩhoya eerire Jehova ũũ: ‘Nĩ ndĩmamenyithĩtie [arutwo ake] rĩĩtwa rĩaku, na no ndĩĩmamenyithagia rĩo.’ Nĩ kĩĩ gĩatũmire Jesu amenyithie arutwo ake rĩĩtwa rĩa Ngai? Oigire ũũ: “Nĩ getha wendani ũrĩa [Ngai] ũnyendete naguo ũikarage thĩinĩ wao, o na niĩ njikarage thĩinĩ wao.”—Johana 17:26.

Mũthomi ũmwe wa maũndũ ma ndini, wĩtagwo Walter Lowrie oigire ũũ: “Mũndũ ũĩ Ngai na ndoĩ rĩĩtwa rĩake, ndangĩĩrũo nĩ amũĩ o na ndangĩmwenda angĩkorũo amwonaga ahaana ta kĩhinya o ũguo.”

Mũndũ ũmwe wĩtagwo Victor, nĩ aathiaga kanitha o kiumia, no ndoonaga ta oĩ Ngai. Oigire ũũ: “Na rĩrĩa nderutire atĩ Ngai etagwo Jehova, ndahaanire ta arĩ hĩndĩ ndambĩrĩria kũmũmenya. Ngĩona ta ndacemania na ũrĩa ndatũũraga njiguaga ũhoro Wake. Ngĩambĩrĩria kuona ngumo ciake njega na ngĩgĩa ũrata wa hakuhĩ nake.”

Jehova o nake nĩ akuhagĩrĩria arĩa mahũthagĩra rĩĩtwa rĩake. Ngai erĩire ‘arĩa mecũranagia ũhoro wa rĩĩtwa rĩake,’ ũũ: ‘Ndĩmũcayagĩra o ta ũrĩa mũndũ acayagĩra mũriũ ũrĩa ũmũtungatagĩra.’ (Malaki 3:16, 17) Ningĩ Ngai nĩ arathimaga arĩa makayagĩra rĩĩtwa rĩake. Bibilia yugaga ũũ: “Mũndũ o wothe ũrĩa ũgakaĩra rĩĩtwa rĩa Jehova nĩakahonoka.”—Joeli 2:32.