Jairo aaciarirũo arĩ na mũrimũ wa spastic quadriplegia ũrĩa nĩ mũthemba wa cerebral palsy. * Nĩ ũndũ ũcio, ndakoragwo na ũhoti wa kũhũthĩra ciĩga ciake ciothe ũrĩa angĩenda. Tombo wake ndũtũmaga ũhoro kũrĩ ciĩga ciake na njĩra ĩrĩa ũbatiĩ, nĩ ũndũ ũcio moko na magũrũ make nĩ mehiũragia na magethiora ũndũ atangĩhota kwĩgirĩrĩria. Rĩmwe na rĩmwe, kwĩikia gwa ciĩga ciake atekwenda nĩ gũtũmaga egurarie. O na andũ arĩa marĩ hakuhĩ nake mangĩaga kwĩmenyerera no amagurarie. Ũndũ wa kĩeha nĩ atĩ, no mũhaka magũrũ na moko make mohererũo gakaari-inĩ karĩa aikaragĩra ga gũtindĩkwo nĩguo ndakegurarie.

Jairo akũrĩte na ruo rũingĩ mũno. Arĩ na mĩeri ĩtatũ, nĩ aambĩrĩirie kũnyitagwo nĩ kĩbaba. Maita maingĩ, Mami aamũkuuaga amũrũmĩtie, akamũteng’eria thibitarĩ ecirĩtie atĩ nĩ mũkuũ.

Nĩ ũndũ wa kũrũmagio mũno na kũrwaraga kaingĩ-rĩ, mahĩndĩ ma Jairo nĩ maakinyire handũ makĩonja. Arĩ na mĩaka 16, mahĩndĩ ma njohero yake nĩ maahĩngĩcanire, kwoguo nĩ aabataraga gũthĩnjwo kĩero, na njohero-inĩ. No ndirikanaga ũrĩa Jairo aarĩraga ũtukũ nĩ ũndũ wa ruo rĩrĩa aahonaga.

Mũrimũ ũcio wa Jairo ũtũmaga abatare gũteithĩrĩrio gwĩka maũndũ ta kũrĩa, kwĩhumba, na kũhaica ũrĩrĩ. Baba na Mami nĩo kaingĩ mamũteithagĩrĩria maũndũ-inĩ macio. O na akorũo Jairo nĩ abataraga gũteithio hingo ciothe, kaingĩ aciari aitũ nĩ mamũririkanagia atĩ ũtũũro wake wĩhocetie harĩ Ngai, to harĩ andũ tu.

Aciari aitũ nĩ Aira a Jehova, na makoretwo magĩthomera Jairo ng’ano cia Bibilia kuuma arĩ o mwana. Nĩ matũũrĩte moĩ atĩ, nĩguo mũndũ akorũo na ũtũũro ũrĩ na muoroto, no mũhaka akorũo na ũrata hamwe na Ngai. O na gũtuĩka Jairo aarĩ na mathĩna maingĩ ma mwĩrĩ, nĩ angĩahotire kũgĩa na mwĩhoko mũrũmu wĩgiĩ mahinda mega marĩa me mbere. O na kũrĩ ũguo, nĩ maarigagwo kana hihi Jairo no anyite ũndũ kuuma Bibilia-inĩ.

Hĩndĩ ĩmwe, rĩrĩa Jairo aarĩ mwana, Baba nĩ aamũũririe ũũ: “Jairo, no ũnjarĩrie?” Agĩcoka akĩongerera, “Angĩkorũo nĩ ũnyendete, nĩ ũkũnjarĩria!” Rĩrĩa Baba aamũthaithaga oige na arĩ kiugo kĩmwe,  Jairo agĩkengeria maithori. O na gũtuĩka nĩ aageririe kuonania ũrĩa araigua kũgerera kwaria, aarutaga o mũgambo ũtarataũkĩka. Baba nĩ aiguire ũru nĩ gũtũma Jairo arĩre. No ũguo Jairo eekire, nĩ kuonanirie atĩ nĩ aataũkĩirũo nĩ ũrĩa Baba aamwĩrĩte. Thĩna warĩ atĩ ndaahotaga kwaria.

Thutha wa kahinda, aciari aitũ nĩ monire atĩ rĩmwe Jairo nĩ aceeraceeragia maitho na ihenya akĩgeria kuonania ũrĩa areciria na ũrĩa araigua. Rĩmwe Jairo nĩ aakuaga ngoro nĩ kuona atĩ ndarahota kwĩra andũ ũrĩa araigua. No rĩrĩa aciari akwa maahotire gũtaũkĩrũo nĩ njĩra yake ya kwaria na maitho, na kũmũhingĩria ũrĩa arenda, ũthiũ wake nĩ wonanagia gĩkeno, ĩrĩ njĩra yake ya kuuga nĩ ngatho.

Ndagĩtarĩ ũmwe wa wathe wa kwaria aatwĩrire atĩ, nĩguo twaranagĩrie wega, no tuoyage moko merĩ na igũrũ rĩrĩa tũramũũria kĩũria kĩrĩa ekũbatara gũcokia ĩĩ kana aca. Guoko kwa ũrĩo gũkarũgamĩrĩra ĩĩ, nakuo kwa ũmotho gũkarũgamĩrĩra aca. Kwoguo nĩ angĩonanirie ũrĩa arenda na njĩra ya kũrora guoko kũrĩa kwagĩrĩire.

Aira a Jehova nĩ makoragwo na igomano maita matatũ o mwaka, kũrĩa andũ marutagwo ũhoro wa Bibilia marĩ aingĩ. Jairo nĩ aakenagĩra mũno ũhoro uumĩte Bibilia-inĩ ũrĩa waheagwo arĩa marenda kũbatithio. Mũthenya ũmwe, Jairo arĩ na mĩaka 16, Baba nĩ aamũũririe ũũ: “Jairo, no wende kũbatithio?” O rĩmwe, ũrĩa aarorire guoko kwa ũrĩo kwa Baba nĩ kuonanirie wendi wake wa kuoya ikinya rĩu. Baba agĩcoka akĩmũũria, “Hihi nĩ ũhoete ũkeera Ngai atĩ nĩ ũrenda kũmũtungatĩra tene na tene?” O rĩngĩ, Jairo akĩrora guoko gwa Baba kwa ũrĩo. Ũndũ ũcio ũkĩonania atĩ, hatarĩ nganja Jairo nĩ eeyamũrĩire gũtungatĩra Jehova.

Thutha wa kwarĩrĩria maũndũ maigana ũna megiĩ Bibilia, Jairo nĩ onanirie atĩ nĩ aataũkagĩrũo nĩ ũrĩa kũbatithanio gwa Gĩkristiano kuugĩte. Nĩ ũndũ ũcio, mwaka wa 2004 nĩ aacokirie kĩũria gĩkĩ kĩa bata mũno, “Nĩ wĩyamũrĩire Ngai nĩ getha wĩke wendi wake?” Jairo aacokirie kĩũria kĩu na njĩra ya kũroria maitho make na igũrũ. Ĩyo nĩyo yarĩ njĩra ĩrĩa aabangĩirũo kabere ya kuuga ĩĩ. Kwoguo, arĩ na mĩaka 17 akĩbatithio arĩ Mũira wa Jehova.

Mwaka-inĩ wa 2011, Jairo nĩ aagĩire na njĩra njerũ ya kwaria akĩhũthĩra kompiuta ĩrutithagio wĩra na maitho. Kompiuta ĩyo ĩthomaga harĩa maitho make marorete thĩinĩ wayo ĩkahahingũra. Kũrora mũno handũ hana thĩinĩ wa kompiuta kana kũbucia aharorete no ta ũrĩa mũndũ angĩhahihinya na guoko nĩguo ahingũre. Nĩ aathondekeirũo tũbica tũgĩĩkĩrũo thĩinĩ wa kompiuta yake nĩguo tũmũteithagie kuuga ũrĩa arenda. Angĩbucia arorete kabica kamwe ga  tuo, programu ĩrĩ thĩinĩ wa kompiuta ĩyo nĩ ĩgarũraga maũndũ marĩa maandĩke kabica-inĩ kau magatuĩka mũgambo.

O ũrĩa ũtaũku wa Jairo wĩgiĩ Bibilia wongererekaga, noguo wendi wake wa gũteithia andũ kĩĩroho wongererekaga. Rĩrĩa tũrathoma Bibilia twĩ ta famĩlĩ o kiumia, aikaraga akĩndoraga na akarora kompiuta yake. Agĩka ũguo, akoragwo akĩndirikania atĩ nĩ njagĩrĩirũo kwandĩka maũndũ marĩa aratanya gũkoiga hĩndĩ ya ciũria na macokio, mĩcemanio-inĩ iitũ ya Gĩkristiano.

Tũrĩ mĩcemanio-inĩ, aroraga kompiuta yake nĩguo athuure kabica karĩa arenda nĩguo akahingũre, na eka ũguo, kompiuta ĩkaruta mũgambo ũraiguĩka nĩ andũ othe. Hĩndĩ ĩrĩa macokio make mekĩra andũ ngoro nĩ akenaga mũno. Mwanake ũmwe mũnini wĩtagwo Alex, mũrata wa Jairo, oigire ũũ: “Rĩrĩa ndaigua Jairo akĩaria kaũndũ kegiĩ Bibilia, nĩ ngenagio nĩ ũndũ ũcio mũno.”

Ningĩ Jairo nĩ ahũthagĩra maitho make kwaria na andũ angĩ igũrũ rĩgiĩ wĩtĩkio wake. Njĩra ĩmwe ekaga ũguo nĩ kũrora kabica kamwe karonania nyamũ na andũ a mĩthemba yothe magĩikara kũndũ kũhorerete. Rĩrĩa eka ũguo, mũgambo wa kompiuta ũkoiga ũũ: “Mwĩhoko ũrĩa Bibilia ĩtũheaga nĩ atĩ, thĩ nĩ ĩgaatuĩka paradiso kũrĩa gũtagakorũo na mĩrimũ na gĩkuũ, Kũguũrĩrio 21:4.” Rĩrĩa mũndũ ũrĩa ũrathikĩrĩria onania nĩ arakenio nĩ ũhoro ũcio, Jairo akarora kabica kangĩ, nayo kompiuta ĩkoiga, “No wende kwĩruta Bibilia hamwe na niĩ?” Ũndũ wa magegania nĩ atĩ, guuka witũ nĩ eetĩkĩrire kwĩruta Bibilia. Nĩ ũndũ wa gũcanjamũra mũno kuona Jairo akĩruta Guuka Bibilia kahora kahora, agĩteithĩrĩrio nĩ Mũira ũngĩ wa Jehova! Na ũhoro wa gĩkeno nĩ atĩ, Guuka nĩ aabatithirio thĩinĩ wa kĩgomano gĩa thikũ ithatũ kĩrĩa kĩarĩ Madrid, mweri wa Agosti mwaka wa 2014.

Wĩyamũrĩri wa Jairo harĩ Ngai nĩ wonekaga nginya nĩ arutani ake. Rosario, ũmwe wa arĩa mamũrutaga kwaria oigire ũũ: “Ingĩgeciria gũtuĩka mũndũ wa ndini, ngaatuĩka Mũira wa Jehova. Nĩ nyonete ũrĩa wĩtĩkio wa Jairo ũtũmĩte agĩe na muoroto wa ma ũtũũro-inĩ o na arĩ na mathĩna.”

Maitho ma Jairo nĩ makengaga rĩrĩa ndamũthomera kĩĩranĩro gĩkĩ kĩa Bibilia: “Hĩndĩ ĩo mũndũ ũrĩa ũthuaga agacimbicaga o ta thwariga, o naruo rũrĩmĩ rũa ũrĩa ũtahotaga kwaria nĩ kũina rũkaina.” (Isaia 35:6) O na gũtuĩka rĩmwe na rĩmwe nĩ akuaga ngoro, kaingĩ akoragwo arĩ mũndũ mũkenu. Ũndũ ũcio ũhotekaga tondũ mũtũũrĩre wake ũkoragwo maũndũ-inĩ megiĩ Ngai, na harĩ arata ake Akristiano. Gĩkeno gĩake, na wĩtĩkio wake mũrũmu nĩ ũira mũiganu wa kuonania atĩ gũtungatĩra Jehova nĩ gũtũmaga mũndũ akenere mũtũũrĩre o na maũndũ maaritũha.