WATHOMA mawoni ma andũ acio erĩ-rĩ, nĩ marĩkũ waigua mahaanaine na maku? Andũ aingĩ nĩ monaga ciugo cia Saulu wa Tariso, ũrĩa ningĩ wetagwo mũtũmwo Paulo, irĩ cia kũũmĩrĩria na cia kũgucĩrĩria. (Atũmwo 17:26, 27) Bibilia nĩ ĩkoragwo na maũndũ mangĩ ma gũtũũmĩrĩria ta ũcio. Kwa ngerekano, Jesu aahoire ihoya rĩtũheaga ũũma atĩ arũmĩrĩri ake no mamenye Ngai na magĩe na irathimo ciake.—Johana 17:3.

No rĩrĩ, athomi ta Philo maarĩ na mawoni ngũrani. Mooigaga atĩ tũtingĩmenya Ngai o na hanini tondũ tũtingĩhota gũtaũkĩrũo nĩ ũrĩa atariĩ. Hihi ũũma nĩ ũrĩkũ?

Bibilia nĩ yonanagia wega atĩ nĩ kũrĩ maũndũ megiĩ Ngai makoragwo marĩ maritũ harĩ andũ gũtaũkĩrũo. Kwa ngerekano, ihinda rĩrĩa Mũũmbi akoretwo kuo, ũhoti wa meciria make, ũũgĩ wake mũingĩ, maũndũ macio matingĩthimĩka, matingĩtarĩka, o na tũtingĩhota gũtaũkĩrũo nĩmo. Nĩ makĩrĩte ũhoti wa andũ wa gwĩciria. O na kũrĩ ũguo, maũndũ macio matingĩgiria tũmũmenye. O na tũngĩĩcũrania igũrũ rĩa maũndũ macio no matũteithie ‘gũkuhĩrĩria Ngai.’ (Jakubu 4:8) Reke twĩcirie ngerekano nini cia maũndũ macio tũtangĩhota gũtaũkĩrũo. Thutha ũcio tũrore maũndũ megiĩ Ngai marĩa tũngĩhota gũtaũkĩrũo.

NGAI GŨKORŨO KUO TENE NA TENE: Bibilia ĩrutanaga atĩ Ngai akoretwo kuo “kuuma o tene na nginya tene.” (Thaburi 90:2) Ũguo nĩ kuuga, Ngai ndaarĩ na kĩambĩrĩria o na ndagaakorũo na mũthia. Kũringana na mawoni maitũ, “mĩaka yake ndĩngĩtuĩrĩka ũrĩa ĩigana.”—Ayubu 36:26.

Ũrĩa wee ũgunĩkaga: Ngai nĩ akwĩragĩra muoyo wa tene na tene ũngĩmũmenya wega. (Johana 17:3) Korũo Ngai ndatũũraga tene na tene-rĩ, hihi kĩĩranĩro kĩu no gĩkorũo kĩrĩ gĩa kwĩhokeka? “Mũthamaki ũrĩa ũtũũraga tene na tene” nowe ũngĩhota kũhingia kĩĩranĩro ta kĩu.—1 Timotheo 1:17.

MECIRIA MA NGAI: Bibilia ĩrutanaga atĩ “ũhoro wake wa ũrĩa amenyaga maũndũ ndũngĩtuĩrĩka,” tondũ meciria make nĩ maraihanĩrĩirie mũno na maitũ. (Isaia 40:28; 55:9) Nĩ ũndũ ũcio-rĩ, Bibilia yũragia kĩũria gĩkĩ: “Nĩ mũndũ ũrĩkũ wanamenya meciria ma Mwathani, nĩguo ahote kũmũtaara?”—1 Akorintho 2:16.

Ũrĩa wee ũgunĩkaga: Ngai nĩ ahotaga gũthikĩrĩria mahoya ma andũ milioni nyingĩ ihinda-inĩ rĩmwe. (Thaburi 65:2) Gũtirĩ kanyoni o na kamwe kangĩgwa thĩ na age kũmenya. Hihi nĩ kũrĩ hĩndĩ meciria ma Ngai magaakorũo na maũndũ maingĩ mũno, magirie akuone kana athikĩrĩrie mahoya maku? Aca, tondũ meciria make matirĩ mĩhaka. Makĩria ma ũguo, maitho-inĩ make ũrĩ wa “bata gũkĩra tũnyoni tũingĩ.”—Mathayo 10:29, 31.

NJĨRA CIA NGAI: Bibilia ĩrutanaga atĩ mũndũ ndangĩmenya “wĩra ũrĩa Ngai aanaruta kuuma o kĩambĩrĩria nginya o ithirĩro.” (Kohelethu 3:11) Kwoguo, gũtirĩ hĩndĩ tũkaamenya maũndũ mothe megiĩ Ngai. Ũũgĩ wa njĩra cia Ngai ‘ndũngĩtuĩrĩka.’ (Aroma 11:33) O na kũrĩ ũguo, Ngai nĩ akoragwo na wendi wa kũguũria njĩra ciake kũrĩ arĩa mendaga kũmũkenia.—Amosi 3:7.

Ũrĩa wee ũgunĩkaga: Ũngĩthomaga na ũkeruta Bibilia, gũtirĩ hĩndĩ ũgatiga kwĩruta maũndũ merũ megiĩ Ngai na njĩra ciake. Ũguo nĩ kuuga atĩ no tũtũũre tũthiaga na mbere gũkuhĩrĩria Ithe witũ wa igũrũ tene na tene.

Gũtuĩka atĩ tũtingĩhota gũtaũkĩrũo wega nĩ maũndũ mamwe megiĩ Ngai ti kuuga atĩ tũtingĩhota kũmũmenya o na hanini. Bibilia nĩ ĩkoragwo na ũhoro mũingĩ ũtũteithagia kũmenya Ngai wega. Reke tũrore ngerekano cigana ũna:

RĨĨTWA RĨA NGAI: Bibilia ĩrutanaga atĩ Ngai nĩ eheete rĩĩtwa. Oigĩte ũũ: “Niĩ nĩ niĩ Jehova; rĩu nĩrĩo rĩĩtwa rĩakwa.” Rĩĩtwa rĩa Ngai rĩonekaga maita ta 7,000 thĩinĩ wa Bibilia, maita maingĩ gũkĩra rĩĩtwa rĩngĩ o rĩothe.—Isaia 42:8.

Ũrĩa wee ũgunĩkaga: Jesu oigire ũũ ihoya-inĩ rĩake rĩa kĩonereria: “Ithe witũ wĩ Igũrũ, Rĩĩtwa rĩaku nĩrĩamũrũo.” (Mathayo 6:9) Githĩ o nawe to ũhũthagĩre rĩĩtwa rĩa Ngai ũkĩhoya? Jehova nĩ ehaarĩirie kũhonokia mũndũ o wothe ũheete rĩĩtwa rĩake gĩtĩo kĩrĩa kĩagĩrĩire.—Aroma 10:13.

GĨIKARO KĨA NGAI: Bibilia ĩrutanaga atĩ kũrĩ “cikaro” igĩrĩ—gĩikaro kĩa roho kũrĩa ciũmbe cia roho iria ikoragwo na mĩĩrĩ ya roho cikaraga, na gĩikaro kĩrĩa gĩkoragwo na indo ta thĩ, njata, mweri, riũa, na indo ingĩ. (Johana 8:23; 1 Akorintho 15:44) Thĩinĩ wa Bibilia, kiugo “igũrũ” kaingĩ kĩrũgamagĩrĩra gĩikaro kĩa roho. ‘Harĩa Mũũmbi atũũraga’ kana gĩikaro gĩake, nĩ kũu “igũrũ.”—1 Athamaki 8:43.

 Ũrĩa wee ũgunĩkaga: Nĩ ũgĩaga na mbica njega ya Ngai. Mũũmbi ndakoragwo arĩ o hinya tu ũkoragwo kũndũ guothe na indo-inĩ ciothe. Jehova nĩ Ngai wa biũ na nĩ arĩ kũrĩa aikaraga. O na kũrĩ ũguo, “gũtirĩ kĩndũ o gĩothe kĩũmbe gĩtonekete mbere yake.”—Ahibirania 4:13.

NGUMO CIA NGAI: Bibilia ĩrutanaga atĩ Jehova arĩ ngumo cia kwendeka. “Ngai nĩwe wendani.” (1 Johana 4:8) Gũtirĩ hĩndĩ aheenanagia. (Tito 1:2) Ndarĩ mũthutũkanio, nĩ arĩ tha, na ndarakaraga na ihenya. (Thama 34:6; Atũmwo 10:34) Ũndũ ũngĩ ũngĩgegia andũ aingĩ nĩ atĩ, Mũũmbi nĩ endaga gũkorũo “ndundu” kana na ũrata wa hakuhĩ na andũ arĩa mamũheete gĩtĩo.—Thaburi 25:14.

Ũrĩa wee ũgunĩkaga: No ũtuĩke mũrata wa Jehova. (Jakubu 2:23) Na o ũrĩa ũrathiĩ na mbere kũmenya ngumo cia Jehova, no ũtaũkĩrũo makĩria nĩ maũndũ marĩa marĩ thĩinĩ wa Bibilia.

Bibilia nĩ ĩtaaragĩria Jehova Ngai na njĩra njega. No ũtaũkĩrũo nĩ ũrĩa Mũũmbi atariĩ, na nĩ endaga ũmũmenye. Kiugo gĩake gĩtwĩragĩra ũũ: “Ũngĩkorũo nĩũrĩmũrongoragia-rĩ [nĩ ũrĩmũcaragia], nĩarĩkwĩonithagia.” (1 Maũndũ ma Matukũ ma Tene 28:9) Na githĩ to wĩrutanĩrie kũmenya Ngai na njĩra ya gũthoma na gwĩcũrania maũndũ marĩa marĩ thĩinĩ wa Bibilia? Ũngĩka ũguo, Bibilia yugaga atĩ Ngai ‘nĩ arĩgũkuhagĩrĩria.’—Jakubu 4:8.

O na kũrĩ ũguo, wahota kwĩyũria ũũ, ‘Angĩkorũo ndingĩhota gũtaũkĩrũo nĩ maũndũ mothe megiĩ Mũũmbi-rĩ, ingĩtuĩka mũrata wake atĩa?’ Ta wĩcirie ũndũ ũyũ: Hihi no mũhaka mũrata ũrĩa mũnene wa ndagĩtarĩ o nake akorũo athomeire ũndagĩtarĩ? Aca! Mũrata wa ndagĩtarĩ ũcio no akorũo athomeire ũndũ ũngĩ ngũrani mũno. O na kũrĩ ũguo, no magĩe na ũrata mũnene. Ũndũ ũrĩa wa bata nĩ mũndũ ũcio akorũo oĩ ngumo cia ndagĩtarĩ ũcio, amenye maũndũ marĩa endete na marĩa athũire. O ta ũguo, no wĩrute ngumo cia Jehova thĩinĩ wa Bibilia, na icio nĩcio ũrabatara kũmenya nĩguo ũgĩe na ũrata nake.

Bibilia ndĩtwĩraga o tũmaũndũ tũnini tu twĩgiĩ Mũũmbi, ĩkoragwo na ũhoro ũrĩa tũrabatara nĩguo tũmenye Ngai. Hihi no wende kwĩruta ũhoro makĩria wĩgiĩ Jehova Ngai? Aira a Jehova nĩ makoragwo na mũbango wa kwĩruta Bibilia na andũ hatarĩ marĩhi. Tũrakũũria waranĩrie na Aira a Jehova a kwanyu kana ũhingũre website itũ, www.pr2711.com/ki.