KUUMA NGOTHI-INĨ | NO ŨTAŨKĨRŨO NĨ BIBILIA
Wagĩrĩirũo Gũtaũkĩrũo nĩ Bibilia Nĩkĩ?
“Bibilia nĩ ibuku rĩa ndini rĩũĩkaine mũno. No nĩ ibuku rĩa andũ angĩ na rĩtingĩteithia andũ a bũrũri wa China.”—LIN, CHINA.
“Niĩ o na nditaũkagĩrũo nĩ mabuku matheru ma ndini yakwa ya Kĩĩhĩndĩ. Ingĩgĩtaũkĩrũo nĩ Bibilia atĩa?”—AMIT, INDIA.
“Nĩ heete Bibilia gĩtĩo tondũ nĩ ibuku rĩa tene, na nĩ njiguĩte atĩ nĩ ĩgũragwo mũno. No niĩ kaĩ ndirĩ ndamĩona-ĩ!”—YUMIKO, JAPAN.
Andũ aingĩ thĩinĩ wa thĩ nĩ matĩĩte Bibilia mũno. O na kũrĩ ũguo, no kũhoteke moĩ o maũndũ manini tu marĩa marĩ Bibilia-inĩ. Ũcio nĩ ũndũ wa ma harĩ andũ milioni nyingĩ mabũrũri-inĩ ma Asia, o na gũtuĩka noguo kũrĩ mabũrũri-inĩ marĩa andũ aingĩ makoragwo na Bibilia.
O na kũrĩ ũguo, no wĩyũrie ũũ: ‘Njagĩrĩirũo gũtaũkĩrũo nĩ Bibilia nĩkĩ?’ Gũtaũkĩrũo nĩ ũrĩa ibuku rĩu itheru riugĩte no gũgũteithie maũndũ-inĩ maya:
-
Kũgĩa na gĩkeno na kũiganĩra
-
Kũhiũrania na mathĩna thĩinĩ wa famĩlĩ
-
Kũhiũrania na mĩtangĩko
-
Kwagĩria ũrata witũ na andũ angĩ
-
Kũhũthĩra mbeca wega
Ta wĩcirie ũhoro wa Yoshiko kuuma Japan. Nĩ eeyũragia ũrĩa Bibilia yugaga na agĩtua itua rĩa kũmĩthoma. Moimĩrĩro maarĩ marĩkũ? Oigire ũũ: “Bibilia nĩ ĩndeithĩtie kũgĩa na muoroto ũtũũro-ini na kĩĩrĩgĩrĩro kĩa ihinda rĩũkĩte. Rĩu nĩ njiguaga ndĩ na gĩkeno.” Amit, ũrĩa ũkũgwetetwo hau kabere, nĩ aatuire itua rĩa gũthoma Bibilia. Oigaga ũũ: “Nĩ ndaagegire mũno nĩ kuona ũrĩa Bibilia ĩkoragwo na maũndũ ma bata ma kũguna andũ othe.”
Bibilia nĩ ĩteithĩtie andũ milioni nyingĩ na njĩra nene mũno. Na githĩ o nawe to ũmĩthome nĩguo wĩyonere ũrĩa ĩngĩkũguna!
