Mabũrũri matiganĩte thĩinĩ wa thĩ nĩ megũkorũo na ithuurano ciumia ciũkĩte. Nĩ ũndũ ũcio, andũ nĩ maratua matua ma bata megiĩ nĩ atongoria arĩkũ megũthuura.

 Mawoni ma Bibilia nĩ Marĩkũ?

 Bibilia yonanagia atĩ nĩ harĩ maũndũ atongoria matakoragwo na ũhoti wa gwĩka.

•   “Mũtikaigage mwĩhoko wanyu harĩ anene kana harĩ mũrũ wa mũndũ, o ũcio ũtangĩhota kũrehe ũhonokio. Mĩhũmũ yake yumaga, agacoka tĩri-inĩ; mũthenya o ro ũcio meciria make magathira.”—Thaburi 146:3, 4, kohoro ka magũrũ-inĩ.

 O na atongoria arĩa makoragwo na ũhoti mũnene wa gwĩka maũndũ nĩ macokaga magakua. Makĩria ma ũguo, matingĩkorũo na ma atĩ maũndũ mega marĩa mekĩte nĩ magaatwarithio na mbere nĩ arĩa magaacoka thutha wao.—Kohelethu 2:18, 19.

 Ũrĩa kũrĩ nĩ atĩ, Bibilia yonanagia atĩ andũ matiarĩ metongoragie o ene.

•   “Mũndũ tiwe wagĩrĩirũo o na gũtongoria ikinya rĩake.”—Jeremia 10:23.

 Hihi nĩ harĩ mũtongoria ũngĩtongoria andũ wega mahinda-inĩ maya?

 Bibilia yonanagia atĩ Ngai nĩ athuurĩte mũtongoria ũrĩ na ũhoti mũnene na wa kwĩhokeka: Jesu Kristo. (Thaburi 2:6) Jesu nĩwe Mũthamaki wa Ũthamaki wa Ngai, thirikari ĩrĩa yathanaga kuuma igũrũ.—Mathayo 6:10.

 Hihi nĩ ũgũthuura gwĩtĩkĩra ũtongoria wa Jesu? Bibilia nĩ yonanagia nĩkĩ kĩũria kĩu nĩ kĩa bata.

•   “Tĩai mũriũ [Jesu Kristo], nĩgetha Ngai ndakarakare na inyuĩ mũthire mwehere njĩra-inĩ, tondũ marakara Make marĩrĩmbũkaga na ihenya. Gũkena nĩ arĩa othe moragĩra harĩ We.”—Thaburi 2:12.

 Rĩrĩ nĩrĩo ihinda rĩrĩa wagĩrĩirũo gũtua itua. Ũrathi wa Bibilia wonanagia atĩ Jesu aambĩrĩirie gwathana mwaka wa 1914 na atĩ ica ikuhĩ Ũthamaki wa Ngai nĩ ũkweheria thirikari ciothe cia andũ.—Danieli 2:44.

 Nĩguo wĩrute makĩria igũrũ rĩgiĩ ũrĩa ũngĩnyita mbaru ũtongoria wa Jesu, thoma gĩcunjĩ kĩrĩ na kĩongo “Tua Itua rĩa Kũnyita Mbaru Ũthamaki wa Ngai Rĩu!”