Bibilia ndĩheanaga mũthenya ũrĩa Jesu aaciarirũo, o na ndiugĩte atĩ nĩ twagĩrĩirũo nĩ gũkũngũĩra gũciarũo gwake. O ta ũrĩa ibuku rĩrĩa rĩandĩkĩtwo nĩ McClintock and Strong rĩa gũtaarĩria maũndũ ma ndini riugĩte, “gũkũngũĩra Krismasi ti ũndũ uumanĩte na Ngai na o na gũtigwetetwo Maandĩko-inĩ ma Kĩngiriki.”

 Handũ ha ũguo, ũngĩtuĩria historĩ ya Krismasi no wone atĩ yumanĩte na ikũngũĩro cia ndini cia maheeni. Bibilia yonanagia atĩ Ngai ndakenaga tũngĩgeria kũmũthathaiya na njĩra ĩrĩa atetĩkĩrĩtie.—Thama 32:5-7.

1.   Gũkũngũĩra gũciarũo kwa Jesu: Ibuku rĩa The World Book Encyclopedia riugaga atĩ, “Akristiano a mahinda ma tene matiakũngũyagĩra gũciarũo [kwa Jesu], tondũ moonaga gũkũngũĩra gũciarũo kwa mũndũ o wothe arĩ mũtugo wa athathaiya a ndini cia maheeni.”

2.   Dicemba 25: Gũtirĩ ũndũ wonanagia atĩ Jesu aaciarirũo mũthenya ũcio. No kũhoteke atongoria a ndini maathurire mũthenya ũcio nĩguo ũringane na hĩndĩ ya gĩkũngũĩro kĩa athathaiya a ndini cia maheeni, kĩrĩa gĩekagwo hĩndĩ ĩrĩa ũtukũ ũkoragwo ũrĩ mũraihu kũrĩ mũthenya ihinda-inĩ rĩa heho.

3.   Kũheana iheo, ndĩa na ikeno: Ibuku rĩa The Encyclopedia Americana riugaga ũũ: “Mĩtugo mĩingĩ ĩgiĩ ikeno cia hĩndĩ ya Krismasi, yarutirũo kuuma harĩ Saturnalia, thigũkũ ya Kĩĩroma ĩrĩa yakũngũyagĩrũo gatagatĩ-inĩ ka mweri wa Dicemba. Kwa ngerekano, gĩkũngũĩro-inĩ kĩu nĩkuo andũ maarutire mĩtugo ya ndĩa nene, kũheana iheo na gwakia mĩcumaa.” Ibuku rĩa Encyclopædia Britannica riugaga atĩ “mawĩra mothe hamwe na biacara nĩ ciahingagwo” hĩndĩ ya Saturnalia.

4.   Matawa ma hĩndĩ ya Krismasi: Kũringana na ibuku rĩa The Encyclopedia of Religion, andũ a Rũraya maagemagia nyũmba ciao “na matawa na mĩmera ya mĩthemba yothe ĩrĩa ĩtũũraga ĩrĩ ya ngirini” nĩguo makũngũĩre hĩndĩ ĩrĩa ũtukũ ũkoragwo ũrĩ mũraihu kũrĩ mũthenya ihinda-inĩ rĩa heho, na megitĩre kuumana na maroho moru.

5.   Kĩeha na mũthumara: “Ĩno nĩ mĩmera ĩhũthĩkaga kaingĩ kũgemia hĩndĩ ya Krismasi. Atongoria a ndini moonaga mũmera ũcio wĩtagwo kĩeha ta wakoragwo na hinya wa kũringa kĩama. Naguo mũmera wa mũthumara ũrĩa ũtũũraga ũrĩ wa ngirini nĩ wathathayagio ũrĩ ta kĩĩranĩro gĩa gũcoka kwa riũa.”—The Encyclopedia Americana.

6.   Mũtĩ wa Krismasi: “Ũthathaiya wa mĩtĩ, ũrĩa warũmagĩrĩrũo mũno nĩ athathaiya a ndini cia maheeni a Rũraya, no wathiire na mbere o na thutha wao gũtuĩka Akristiano.” Njĩra ĩmwe ĩrĩa ũthathaiya wa mĩtĩ watwarithirio na mbere nĩ kũgerera mũtugo wa “kũiga mũtĩ wa Krismasi mũromo-inĩ kana thĩinĩ wa nyũmba hĩndĩ ya thigũkũ cia ihinda rĩa heho.”​—Encyclopædia Britannica