Aca. Bibilia yonanagia atĩ twagĩrĩirũo kũhoya Ngai wiki, kũgerera rĩĩtwa-inĩ rĩa Jesu. Jesu eerire arutwo ake ũũ: “Inyuĩ hoyagai ũũ: Ithe witũ wĩ Igũrũ, Rĩĩtwa rĩaku nĩrĩamũrũo.” (Mathayo 6:9, The Bible in Gikũyũ) Gũtirĩ hĩndĩ eerire arutwo ake mahoyage atheru, araika, kana mũndũ ũngĩ tiga Ngai.

 Ningĩ Jesu eerire arũmĩrĩri ake ũũ: “Nĩ niĩ njĩra, na nĩ niĩ ũhoro-ũrĩa-wa-ma, na nĩ niĩ muoyo; gũtirĩ mũndũ ũkinyaga gwĩ Ithe witũ, atokĩire harĩ niĩ.” (Johana 14:6, The Bible in Gikũyũ) Jesu nowe tu wathĩtwo nĩ Ngai atũthaithanagĩrĩre.—Ahibirania 7:25.

Ĩ angĩkorũo ndĩrahoya Ngai na ngahoya atheru?

 Ngai oigire ũũ thĩinĩ wa Maathani Ikũmi: “Niĩ Jehova Ngai waku ndĩ Ngai wĩ ũiru.” (Thama 20:5, The Bible in Gikũyũ) Thĩinĩ wa New World Translation mũhari ũyũ ugaga “kwĩyamũrĩra kuuma ngoro.” Ngai endaga ũndũ o wothe ũrahutania na ũthathaiya, nginya mahoya, ũrutwo kũrĩ we na ngoro yothe.—Isaia 48:11.

 Nĩ tũrakaragia Ngai rĩrĩa tũkũhoya mũndũ ũngĩ o wothe, nginya atheru kana araika. Hĩndĩ ĩrĩa mũtũmwo Johana eendaga gũthathaiya mũraika, mũraika ũcio nĩ aamũkanirie na akĩmwĩra: “Menya wĩke ũguo; niĩ na niĩ ndĩ o ndungata hamwe nawe, o na hamwe na ariũ a Thoguo arĩa magwatĩirie ũira wa Jesu. Thathaiya Ngai arĩ we.”—Kũguũrĩrio 19:10, The Bible in Gikũyũ.