Aca, tũtikoragwo tũbangĩirũo hĩndĩ ĩrĩa tũgaakua. Handũ ha kũnyita mbaru wĩtĩkio wa atĩ ũtũũro witũ ũkoragwo ũrĩ mũbange, Bibilia yonanagia atĩ kaingĩ gĩkuũ kiumanaga na “maũndũ materĩgĩrĩirũo.”—Kohelethu 9:11, New World Translation.

Githĩ Bibilia ndiugaga atĩ nĩ kũrĩ “hĩndĩ ya gũkua”?

 Ĩĩ, rĩandĩko rĩa Kohelethu 3:2 riugaga atĩ nĩ “kũrĩ hĩndĩ ya gũciarũo, o na hĩndĩ ya gũkua; hĩndĩ ya kũhanda, o na hĩndĩ ya kũmunya kĩrĩa kĩhande.” O na kũrĩ ũguo, mĩhari ĩrĩa ĩthiũrũrũkĩirie mũhari ũcio yonanagia atĩ thĩinĩ wa rĩandĩko rĩu, Bibilia ĩkoragwo ĩkĩarĩrĩria maũndũ marĩa mekĩkaga ũtũũro-inĩ. (Kohelethu 3:1-8) Ngai ndakoragwo abangĩte ihinda rĩa o mũndũ rĩa gũkua, o ta ũrĩa atatindĩkagĩrĩria mũrĩmi kũhanda ihinda rĩna. Handũ ha ũguo, ũndũ ũrĩa mũnene nĩ atĩ tũtiagĩrĩirũo kwĩingĩrania mũno na maũndũ ma gũkũ thĩ nginya tũtiganĩrie Mũũmbi witũ.—Kohelethu 3:11; 12:1, 13.

Ũtũũro no wongongererũo

 O na gũtuĩka tũtimenyaga kĩrĩa gĩkũhaanĩka ũtũũro-inĩ, no tũtũũre ihinda iraya tũngĩtua matua ma ũũgĩ. Bibilia yugaga ũũ: “Kĩrĩra kĩa mũndũ mũũgĩ nĩ gĩthima kĩa muoyo, nĩ gĩa gũtũma gũthengagwo mĩtego-inĩ ya gĩkuũ.” (Thimo 13:14) Ũndũ ũmwe na ũcio, Musa eerire Aisiraeli atĩ ‘matukũ mao nĩ mangĩaingĩhirio,’ mangĩathĩkĩire maathani ma Ngai. (Gũcokerithia Maathani 6:2) No ngũrani na ũguo, no tũkuhĩhie ũtũũro witũ tũngĩka ciĩko njũru kana itarĩ cia ũũgĩ.—Kohelethu 7:17.

 O na tũngĩkorũo tũrĩ ogĩ atĩa, o na kana tũgerie kwĩmenyerera atĩa, tũtingĩĩthema gĩkuũ. (Aroma 5:12) No ũndũ ũcio nĩ ũkagarũrũka tondũ Bibilia nĩ ĩranĩire hĩndĩ “gĩkuũ [gĩtagacoka] gũkorũo kuo rĩngĩ.”—Kũguũrĩrio 21:4.