Mũthia-inĩ, arũme acio atatũ magĩkira ki! No kũhoteke mũgambo ũrĩa tu waiguĩkaga nĩ wa rũhuho rũrĩ na ũrugarĩ, rwa kuuma werũ-inĩ wa Arabia. Ayubu ndaarĩ na ũndũ ũngĩ wa kuuga tondũ aarĩ mũnogu kuumana na ndeereti ndaihu ĩrĩa maakoretwo nayo. No tũhũũre mbica akũũrĩire athuri acio atatũ maitho nĩo Elifazu, Bilidadi, na Zofaru ta arameera mathiĩ na mbere kwaria. No o matingĩahotire nginya kũmũrora tondũ mĩario yao ya wara, ciugo ciao “itariĩ ta rũhuho,” na igenyo iria maaigĩrĩire Ayubu nĩ ciaringĩte ihiga. (Ayubu 16:3, kohoro ka magũrũ-inĩ) No Ayubu nĩ eehotorete o na makĩria gũtetera wĩkindĩru wake.

 No kũhoteke atĩ ũndũ ũrĩa Ayubu oonaga atigĩtwo naguo no wĩkindĩru wake. Nĩ oorĩtwo nĩ ũtonga wake, ciana ciake ciothe ikũmi, akorũo nĩ ũteithio na gĩtĩo kĩrĩa aahetwo nĩ arata na andũ arĩa aaikaranagia nao, na mũthia-inĩ akorũo nĩ ũgima wake mwega wa mwĩrĩ. Ngothi yake nĩ yairĩte nĩ ũndũ wa mũrimũ, na mwĩrĩ wake waiyũirũo nĩ ngũũcĩ na igunyũ. O na mĩhũmũ ya kanua gake nĩ yanungaga. (Ayubu 7:5; 19:17; 30:30) O na kũrĩ ũguo, tharĩkĩro cia arũme acio atatũ nĩ ciatũmĩte Ayubu aigue arakarĩte mũno. Nĩ aatuĩte itua rĩa kuonania atĩ we ndaarĩ mũndũ mungumania ta ũrĩa mooigaga. Mĩario ĩrĩa Ayubu aarĩkĩrĩirie nayo nĩ yakoretwo yamakiria. Ciugo ciao nyingĩ cia gũtuurithia nĩ ciathirĩte. O na kũrĩ ũguo, ruo rwa Ayubu rũtiathirĩte. No aabataraga ũteithio nĩ ũndũ wa ũndũ mũritũ ũrĩa aageragĩra.

 No tũtaũkĩrũo kĩrĩa gĩatũmaga Ayubu age gũkorũo na mawoni mega megiĩ maũndũ marĩa aageragĩra. Nĩ aabataraga ũtaaro na kũrũngwo. Ningĩ nĩ aabataraga mũndũ wa kũmũhooreria na kũmũmĩrĩria, maũndũ marĩa maabatiĩ gwĩkwo nĩ arata ake atatũ no matiekire. Hihi nĩ ũrĩ waigua ũkĩbatara mũno gũtaarũo na kũmĩrĩrio? Hihi nĩ ũrĩ waigua ũragĩtwo ngoro nĩ andũ arĩa weciragia atĩ nĩ arata aku? Kwĩruta ũrĩa Jehova Ngai aateithirie Ayubu ndungata yake, na ũrĩa Ayubu aamũkĩrire ũndũ ũcio no gũtũme o nawe ũgĩe na kĩĩrĩgĩrĩro na ũmenye maũndũ marĩa ũngĩka.

 Harĩ ũndũ ũngĩ tũtangĩrĩgĩrĩra wekĩkire ũhoro-inĩ wĩgiĩ Ayubu. Harĩ mũndũ ũngĩ mwĩthĩ wetagwo Elihu, waikarĩte hau hakuhĩ. Hĩndĩ ĩyo yothe aaikarĩte hau agĩthikĩrĩria akirĩte athuri acio akũrũ makĩaranĩria. No ndaakenetio o na hanini nĩ maũndũ marĩa aaiguĩte.

 Elihu nĩ aarakarĩte nĩ ũndũ wa Ayubu. Nĩ aarakarĩte nĩ ũndũ wa kuona Ayubu ũrĩa warĩ mũthingu akĩgeria “kuonania atĩ we nĩ mwagĩrĩru handũ ha Ngai.” O na kũrĩ ũguo, Elihu nĩ aacayagĩra Ayubu mũno, nĩ oonaga atĩ Ayubu aarĩ na ruo, aaragia kuuma ngoro, na nĩ aabataraga mũno ũtaaro wa wendo na kũmĩrĩrio. Nĩkĩo Elihu aaremirũo gũthiĩ na mbere gũkirĩrĩria arũme acio atatũ meetuaga atĩ nĩ Ayubu maromĩrĩria. Nĩ aamaiguĩte magĩtharĩkĩra Ayubu, magĩtharĩkĩra wĩtĩkio, gĩtĩo, na wĩkindĩru wake. Gũthũkia mũno, maaririe ciugo cia maheeni iria ciatũmire Ngai oneke arĩ mũũru. Elihu aaiguaga akĩhĩahĩa kwaria!​—Ayubu 32:2-4, 18.

 Ooigire ũũ: “Niĩ ndĩ mũnyinyi na inyuĩ mũrĩ akũrũ. Nĩkĩo ndĩgirĩrĩirie kwaria nĩ ũndũ wa gĩtĩo, na ndetigĩra kũmwĩra maũndũ marĩa njũĩ.” No ndangĩahotire gũthiĩ na mbere gũikara akirĩte. Aacokire akiuga ũũ: “Matukũ maingĩ to mo matũmaga mũndũ akorũo arĩ mũũgĩ, ningĩ to athuri arĩa akũrũ moĩ maũndũ marĩa magĩrĩire.” (Ayubu 32:6, 9) Elihu agĩcoka akĩruta mĩario yarĩ mĩraihu na akĩonania atĩ ciugo icio nĩ cia ma. Aarĩirie Ayubu na njĩra yarĩ ngũrani mũno na ĩrĩa yahũthĩrĩtwo nĩ Elifazu, Bilidadi, na Zofaru. Elihu nĩ eerire Ayubu atĩ ndangĩaririe mĩario ya kũmũnyararithia kana ya kũmuongerera ruo rũrĩa aarĩ naruo. Ningĩ nĩ oonirie Ayubu gĩtĩo na njĩra ya kũhũthĩra rĩĩtwa rĩake akĩmwarĩria, na kuonania atĩ arũme acio atatũ nĩ maamwagĩire gĩtĩo. * Ooigire ũũ arĩ na gĩtĩo: “Rĩu Ayubu-rĩ, ta igua ciugo ciakwa.”​—Ayubu 33:1, 7; 34:7.

 Elihu nĩ aaheire Ayubu ũtaaro ũyũ wa ĩmwe kwa ĩmwe: “Wee nĩ warĩtie ngĩiguaga, . . . ‘Niĩ ndĩ mũtheru, ndirĩ na mehia; ndĩ mũtheru, ndirĩ na mahĩtia. No Ngai nĩ onete itũmi cia kũnjũkĩrĩra.’” Elihu nĩ oonanirie thĩna wa Ayubu warĩ ũrĩkũ kũna akĩũria: “Hihi ũrĩ na ma biũ atĩ ndũhĩtĩtie nginya ũkoiga, ‘Ndĩ mũthingu gũkĩra Ngai’?” Elihu ndangĩetĩkĩririe Ayubu athiĩ na mbere gwĩciria na njĩra ĩyo. Elihu ũcio warĩ mwĩthĩ eerire Ayubu ũũ: “Nĩ ũhĩtĩtie nĩ kuuga ũguo.” (Ayubu 33:8-12; 35:2) Elihu nĩ aamenyaga atĩ Ayubu aarĩ mũrakaru nĩ ũndũ wa indo iria oorĩtwo nĩcio na maũndũ marĩa eekĩtwo matarĩ ma kĩhooto nĩ arata ake a maheeni. No Elihu eerire Ayubu ũũ: “Wĩmenyerere nĩgetha marakara matigatũme wĩke maũndũ ma kũnyũrũria.”​—Ayubu 36:18.

 Ũndũ wa bata makĩria, Elihu oonanirie atĩ hingo ciothe Jehova ekaga maũndũ marĩa magĩrĩire. Nĩ aatĩtĩrithirie ũndũ wa bata akĩhũthĩra ciugo ici nguhĩ na irĩ na ũritũ. “Gũtingĩhoteka Ngai ũrĩa wa ma eke maũndũ ma waganu, kana Mwene-Hinya-Wothe eke maũndũ moru! . . . Mwene-Hinya-Wothe ndogomagia kĩhooto.” (Ayubu 34:10, 12) Elihu akĩenda kuonia Ayubu ũhoro wĩgiĩ tha na kĩhooto kĩa Jehova, nĩ aaririkanirie Ayubu atĩ Jehova ndaamũherithirie nĩ ũndũ wa kwaria ciugo atecirĩtie na itarĩ cia gĩtĩo. (Ayubu 35:13-15) Ningĩ handũ ha gwĩtua atĩ aarĩ na macokio mothe ma ciũria, Elihu ooigire ũũ arĩ na wĩnyihia, “Ngai nĩ mũnene gũkĩra ũrĩa tũngĩĩcirĩria.”​—Ayubu 36:26.

 O na gũtuĩka ũtaaro wa Elihu warĩ wa ĩmwe kwa ĩmwe, hingo ciothe aaragia na njĩra ya ũtugi. Nĩ aaririe ũhoro wa kĩĩranĩro kĩa magegania, atĩ mũthenya ũmwe Jehova nĩ angĩgacokeria Ayubu ũgima mwega wa mwĩrĩ. Ngai angĩkeera ndungata yake njĩhokeku ũũ: “Nyama cia mwĩrĩ wake nĩ ciĩthĩhe gũkĩra rĩrĩa aarĩ mũndũ mwĩthĩ; nĩ acokererũo nĩ matukũ marĩa aarĩ na hinya wa wĩthĩ.” Ũndũ ũngĩ woonanirie atĩ Elihu aarĩ na ũtugi nĩ atĩ nĩ eerire Ayubu eyarie handũ ha kũmwĩra o ũrĩa aagĩrĩirũo gwĩka. Aamwĩrire ũũ: “Aria, tondũ nĩ ndĩrenda kuonania atĩ ndũhĩtĩtie.” (Ayubu 33:25, 32) No Ayubu ndaamũcokeirie. No gũkorũo oonire atĩ ndaagĩrĩirũo gwĩtetera thutha wa Elihu kũmũhe ũtaaro ũcio wa ũtugi na wa kũmwĩkĩra ngoro. No kũhoteke nĩ kũrĩra aarĩrire ona atĩ Elihu nĩ aamũrũmbũyagia.

 No twĩrute maũndũ ma bata kuumana na arũme acio erĩ ehokeku. No twĩrute na Elihu ũrĩa tũbataire gũtaara na kũũmĩrĩria andũ arĩa marabatara maũndũ macio. Mũrata wa ma ndetigagĩra gũkwĩra angĩona ũgĩka ũndũ ũtarĩ mwega kana werekeire gwĩka ũndũ ũtagĩrĩire. (Thimo 27:6) No twende gũkoragwo tũrĩ arata a ma harĩ andũ arĩa angĩ, hingo ciothe tũgakoragwo na ũtugi na tũkamomĩrĩria, o na rĩrĩa maaria ciugo matecirĩtie nĩ ũndũ wa marakara. Na rĩrĩa tũrabatara kũheo ũtaaro, kĩonereria kĩa Ayubu nĩ kĩratũririkania atĩ, twagĩrĩirũo gũthikĩrĩria tũkĩheo ũtaaro tũrĩ na wĩnyihia handũ ha kũũhũthia. Ithuothe nĩ tũbataraga gũtaarũo na kũrũngwo. Gwĩtĩkĩra gũtaarũo na kũrũngwo no kũhonokie mĩoyo itũ.​—Thimo 4:13.

 Elihu akĩaria, kaingĩ nĩ aagwetaga rũhuho, matu, marurumĩ, na rũheni. Ooigire ũũ igũrũ rĩgiĩ Jehova: “Thikĩrĩria na kinyi mũraramo wa mũgambo wake.” Kahinda kanini thutha ũcio, Elihu nĩ aaririe ũhoro wa “rũhuho rũnene.” (Ayubu 37:2, 9) No kũhoteke atĩ rĩrĩa Elihu aaragia na Ayubu nĩ harĩ kĩhuhũkanio kĩeyũmbaga na gĩathiaga o gĩkĩnenehaga. Mũthia-inĩ gĩgĩtuĩka kĩhuhũkanio kĩnene mũno. Thutha ũcio gũgĩkĩka ũndũ wa magegania o na makĩria. Jehova akĩaria!​—Ayubu 38:1.

 Rĩrĩa tũrathoma ibuku rĩa Ayubu, nĩ tũkenaga twambĩrĩria gũthoma mĩrango ĩrĩ na ũhoro wa mwanya wa Jehova akĩarĩria Ayubu. Ũhoro ũcio wake watariĩ ta kĩhuhũkanio kĩa ũhoro wa ma kĩrĩa kĩahurutaga gĩkeheria mĩario yothe ya tũhũ, ciugo ciothe cia maheeni cia Elifazu, Bilidadi, na Zofaru. Jehova o na ndambire kwaria na arũme acio, aacokire kũmaarĩria thutha mũtheri. Eerekeirie meciria make harĩ Ayubu wiki, akĩaria na ndungata ĩyo yake eendete o ta ũrĩa mũthuri arũngaga mũriũ.

 Jehova nĩ aamenyaga ruo rwa Ayubu. Ningĩ nĩ aaiguagĩra Ayubu tha, o ta ũrĩa aiguagĩra ciana ciake tha hingo ciothe rĩrĩa iranyamarĩka. (Isaia 63:9; Zekaria 2:8) No ningĩ nĩ aamenyaga atĩ Ayubu nĩ aaragia “atarĩ na ũmenyo” agatũma maũndũ make mathũke makĩria. Na kwoguo Jehova akĩrũnga Ayubu na njĩra ya kũmũũria ciũria nyingĩ cia gũtũma ecirie. Aambĩrĩirie na kũmũũria ũũ: “Wee-rĩ, warĩ kũ rĩrĩa ndakire mĩthingi ya thĩ? Njĩĩra angĩkorũo nĩ ũrona ta ũngĩmenya.” Rĩrĩa Ngai aambagĩrĩria kũũmba indo, “njata cia rũcinĩ,” nĩcio famĩlĩ ya Ngai ya araika nĩ cianĩrĩire ikenete nĩ ũndũ wa ũũmbi wake wa magegania. (Ayubu 38:2, 4, 7) Ũrĩa kũrĩ nĩ atĩ, Ayubu ndangĩacokirie o na hanini tondũ ndoĩ maũndũ macio.

 Jehova nĩ aathiire na mbere kwaria ũhoro wĩgiĩ ũũmbi wake. No tuuge atĩ nĩ aataarĩirie Ayubu na njĩra nguhĩ sayansi ĩrĩa andũ ũmũthĩ metaga sayansi ya maũndũ ma ndũire (natural sciences) ĩgiĩ maũndũ ta gĩthomo kĩgiĩ njata na indo iria irĩ igũrũ (astronomy), gĩthomo kĩgiĩ indo iria irĩ muoyo (biology), gĩthomo kĩgiĩ thĩ (geology), na gĩthomo kĩgiĩ ũrĩa ũtheri na indo ingĩ ta icio irutaga wĩra (physics). Jehova o na nĩ aagwetire nyamũ cigana ũna ciatũũraga kuo hĩndĩ ya Ayubu, nyamũ ta mũrũthi, ihuru, mbũri cia irĩma-inĩ, ndigiri ya gĩthaka, ndegwa ya gĩthaka, nyaga, mbarathi, rwĩgĩ, nderi, Behemothi (no kũhoteke nĩ nguũ), na mũthia-inĩ akĩgweta Leviathani (no kũhoteke nĩ kĩng’ang’i). Ta hũũra mbica ũrĩ na mweke wa gũthikĩrĩria mĩario ĩgiĩ ũũmbi, ĩrarutwo nĩ Mũũmbi wa igũrũ na thĩ! *

 Nĩ kĩĩ gĩatũmire Jehova orie Ayubu ciũria nyingĩ ũguo? Ayubu nĩ aabataraga gũkorũo arĩ na wĩnyihia o na makĩria. Ayubu nĩ aatetaga akoiga atĩ Jehova nĩ amwĩkĩte maũndũ matarĩ ma kĩhooto. Gwĩka ũguo nĩ gwatũmaga athũkie ũrata wake hamwe na Ithe ũrĩ wendo na ũndũ ũcio ũgatũma maũndũ make mathũke makĩria. Nĩ ũndũ ũcio Jehova akĩũria Ayubu rĩngĩ na rĩngĩ kũrĩa aarĩ rĩrĩa oombire indo icio cia magegania na akĩmũũria kana no ahote kũhe irio na gũtongoria indo icio oombĩte. Angĩkorũo Ayubu ndangĩahotire o na gũtongoria indo iria Jehova oombĩte-rĩ, nĩ kĩĩ kĩngĩatũmire one ta arĩ na kĩhooto gĩa kwĩra Mũũmbi ũrĩa agĩrĩirũo gwĩka? Na githĩ njĩra na meciria ma Jehova itiarĩ cia gĩkĩro kĩa igũrũ mũno gũkĩra cia Ayubu?

 Maũndũ marĩa mothe Jehova ooigire, nĩ moonanirie atĩ aarĩ na wendo mũnene harĩ Ayubu. Nĩ ta Jehova eeraga Ayubu ũũ: ‘Mũrũ wakwa, angĩkorũo no hote kũũmba na kũrũmbũiya indo icio ciothe-rĩ, nĩ ũgwĩciria no nemwo nĩ gũkũrũmbũiya? Nĩ ũkuona ta ingĩgũtiganĩria ngũniinĩre ciana ciaku, indo ciaku, na ũgima waku wa mwĩrĩ? Na githĩ to niĩ tu ingĩhota gũgũcokeria indo iria ũrĩtwo nĩcio na ngũhonie ruo rũnene rũrĩa ũrĩ naruo?’

 Hĩndĩ ĩyo Jehova ooragia Ayubu ciũria, Ayubu aaririe o maita merĩ tu. Ayubu ndaakararirie, agĩĩtetera, o na kana akĩruta ciĩgwatio. Nĩ eetĩkĩrire arĩ na wĩnyihia atĩ oĩ o tũmaũndũ tũnini, na agĩcũnga mũhera nĩ ũndũ wa kwaria atecirĩtie. (Ayubu 40:4, 5; 42:1-6) Ũndũ ũcio nĩ ũratũteithia kuona atĩ Ayubu aarĩ na wĩtĩkio mũnene. O na thutha wa maũndũ mothe maritũ marĩa aagereire, aathiire o na mbere gũkorũo na wĩtĩkio mũrũmu. Nĩ eetĩkĩrire kũrũngwo nĩ Jehova, na agĩcenjia mwerekera wake. O na ithuĩ no tũtindĩkwo kwĩyũria kĩũria gĩkĩ kĩa bata, ‘Hihi ndĩ mwĩnyihia ũndũ ingĩtĩkĩra kũrũngwo na kũheo ũtaaro?’ Ithuothe nĩ tũbataraga kũrũngwo na gũtaarũo. Rĩrĩa twetĩkĩra kũrũngwo na gũtaarũo tũkoragwo tũkĩĩgerekania na wĩtĩkio wa Ayubu.

 Jehova nĩ ooire ikinya rĩa kũũmĩrĩria Ayubu nĩ ũndũ wa ruo rũrĩa aarĩ naruo. Jehova akĩaria na Elifazu, ũrĩa no kũhoteke nĩwe warĩ mũkũrũ harĩ arũme acio atatũ metuaga nĩ Ayubu maromĩrĩria ooigire ũũ: “Nĩ ndakarĩte mũno nĩ ũndũ waku na arata acio aku erĩ, tondũ mũtiarĩtie ũhoro wa ma ũngoniĩ ta ũrĩa Ayubu ndungata yakwa ekĩte.” (Ayubu 42:7) Ta wĩcirie ũhoro wĩgiĩ ciugo icio. Hihi Jehova eendaga kuuga atĩ maũndũ marĩa mothe arũme acio atatũ maarĩtie maarĩ ma maheeni, kana atĩ ciugo iria ciothe Ayubu aarĩtie ciarĩ cia ma? Aca. * O na kũrĩ ũguo, haarĩ na ngũrani nene gatagatĩ ka Ayubu na arũme acio atatũ. Ayubu nĩ aathuthĩkĩte ngoro mũno, akaiyũrũo nĩ kĩeha, na agakua ngoro nĩ ũndũ wa kũigĩrĩrũo maũndũ ma maheeni. Nĩkĩo no tũtaũkĩrũo kĩrĩa gĩatũmaga rĩmwe na rĩmwe arie atecirĩtie. O na kũrĩ ũguo, Elifazu na arũme acio angĩ erĩ matiahĩtũkagĩra maũndũ ta macio maritũ. Maaririe maũndũ moru makĩendaga tondũ maarĩ na mwĩtĩo na matiarĩ na wĩtĩkio mũrũmu harĩ Ngai. Maatharĩkĩire mũndũ ũtaarĩ na mahĩtia, na gũthũkia mũno makiuga ũrĩa gũtarĩ igũrũ rĩgiĩ Jehova we mwene, magĩtũma oneke arĩ Ngai mũũru ũtarĩ tha!

 Ũndũ ũcio nĩguo watũmire Jehova ere arũme acio marute igongona rĩa goro. Maagĩrĩirũo kũruta igongona rĩa ndegwa mũgwanja na ndũrũme mũgwanja, na igongona rĩu rĩarĩ rĩa goro tondũ thutha ũcio Watho wa Musa woonanirie atĩ ndegwa nĩyo Mũthĩnjĩri-Ngai Ũrĩa Mũnene aagĩrĩirũo kũruta nĩ ũndũ wa mahĩtia marĩa mehia make mangĩareheire rũrĩrĩ. (Maũndũ ma Alawii 4:3) Harĩ nyamũ iria ciarutagwo magongona rungu rwa Watho ũcio, ndegwa nĩyo nyamũ ĩrĩa yarĩ ya goro mũno. Makĩria ma ũguo, Jehova ooigire atĩ ndangĩetĩkĩrire igongona rĩa arũme acio maathitangaga Ayubu, o tiga Ayubu ambire kũmahoera. * (Ayubu 42:8) No mũhaka Ayubu akorũo nĩ aakenire kuona Ngai wake akĩmũtetera na kuona Jehova akĩmwĩkĩra maũndũ ma kĩhooto!

 Jehova aarĩ na ma atĩ Ayubu nĩ aangĩekire ũguo aamwĩrĩte, ohere arũme acio arĩa maamũturithĩtie mũno. Ayubu ndaaconorithirie Ithe. (Ayubu 42:9) Wathĩki wake nĩ woonanirie na njĩra nene o na gũkĩra ciugo ciake atĩ aarĩ na wĩkindĩru. Ningĩ wathĩki ũcio nĩ watũmire arathimwo na njĩra nene.

 Jehova nĩ oonirie Ayubu ‘wendo muororo mũno na akĩmũiguĩra tha.’ (Jakubu 5:11) Na njĩra ĩrĩkũ? Jehova nĩ aacokeirie Ayubu ũgima wake wa mwĩrĩ. Ta hũũra mbica gĩkeno kĩrĩa Ayubu aarĩ nakĩo rĩrĩa aarorire nyama cia mwĩrĩ wake akĩona “ciĩthĩhe gũkĩra rĩrĩa aarĩ mũndũ mwĩthĩ” o ta ũrĩa Elihu ooigĩte. Andũ a famĩlĩ na arata nao makĩambĩrĩria kũmũnyita mbaru, kũmuonia tha, na kũmũrehera iheo. Jehova nĩ aacokeirie Ayubu ũtonga wake, akĩmũhe indo maita merĩ ma iria aarĩ nacio hau mbere. Ĩ naguo ũhoro ũrĩa watuurithirie Ayubu mũno wa gũkuĩrũo nĩ ciana ciake? Ayubu na mũtumia wake no mũhaka akorũo nĩ meekĩrirũo ngoro mũno tondũ nĩ maagĩire na ciana ingĩ ikũmi. Ningĩ Jehova nĩ aatũmire Ayubu atũũre matukũ maingĩ. Ayubu aaikarire mĩaka ĩngĩ 140, nginya akĩona njiarũa inya cia ciana ciake. Bibilia yugaga ũũ: “Mũthia-inĩ, Ayubu agĩkua thutha wa gũtũũra ihinda iraya na akaiganĩra.” (Ayubu 42:10-17) Thĩinĩ wa Paradiso, Ayubu na mũtumia wake nĩ magaacokanwo rĩngĩ na famĩlĩ yao na nginya ciana ciao ikũmi iria ciakuire kuumana na tharĩkĩro ya Shaitani.​—Johana 5:28, 29.

 Jehova aarathimire Ayubu na njĩra nene ũguo nĩkĩ? Bibilia yugĩte ũũ: “Nĩ mũiguĩte ũhoro wa ũkirĩrĩria wa Ayubu.” (Jakubu 5:11) Ayubu nĩ aacemanirie na maũndũ maritũ o na gũkĩra marĩa ithuĩ tũngĩĩcirĩria. Kiugo “ũkirĩrĩria,” kĩratũririkania atĩ Ayubu to kũhĩtũkĩra aahĩtũkĩire magerio-inĩ macio. Nĩ aakirĩrĩirie, na wĩtĩkio na wendo wake harĩ Jehova igĩkorũo irĩ o na hinya. Handũ ha gũtoorio nĩ marakara na marũrũ, nĩ eehaarĩirie kuohera nginya andũ arĩa maamũtuurithirie makĩendaga. Ningĩ ndaarekire orũo nĩ kĩĩrĩgĩrĩro gĩake kĩa bata kana kĩndũ kĩa goro kĩrĩa aarĩ nakĩo, na nĩkĩo wĩkindĩru wake.​—Ayubu 27:5.

 Ithuothe nĩ tũrabatara gũkirĩrĩria. Tũrĩ na ma atĩ Shaitani nĩ arĩgeragia gũtũũraga ngoro, o ta ũrĩa eekire harĩ Ayubu. No tũngĩthiĩ na mbere gũkirĩrĩria tũrũmĩtie wĩtĩkio witũ, tũkorũo tũrĩ enyihia, tũkorũo twĩhaarĩirie kuohera andũ arĩa angĩ, na tũkorũo tũtuĩte itua rĩa gũtũũria wĩkindĩru witũ, no tũkorũo na ma atĩ o na ithuĩ nĩ tũkoona kĩĩrĩgĩrĩro gitũ. (Ahibirania 10:36) Tũngĩĩgerekania na wĩtĩkio wa Ayubu, nĩ tũrĩtũmaga Shaitani akarakara na tũgakenia Jehova mũno!