Ahowe, Ombiibeli inai popya kutya Edu ola lalakana. a Ombiibeli kai fi embo lounongononi. Ashike nande ongaho, itai kondjifafana nounongononi. Osho Ombiibeli ya popya otashi “kalelele fiyo alushe.” — Epsalme 111:8.

•  Ombiibeli oya hala okutya ngahelipi eshi ya ti “kominghulo nhee dedu”?

•  Ongahelipi kombinga yomayeleko oo Satana a yeleka nao Jesus?

 Omautumbulilo oo a longifwa kOmbiibeli ‘ominghulo nhee dedu’ nosho yo ‘ominghulo dedu,’ inaa hala okutya edu oli na eehuke ile ominghulo. (Jesaja 11:12; Job 37:3) Ponhele yaasho, omautumbulilo oo okwa longifwa meityo lopafaneko, notaa ulike kombada yedu alishe. Ombiibeli oya longifa eembinga nhee domhepo meityo la faafana. — Lukas 13:29.

 Oshitya shOshiheberi osho sha tolokwa ‘ominghulo’ osha popilwa meyeletumbulo tashi ulike “komavava.” O-The International Standard Bible Encyclopedia oya ti kutya “molwaashi okadila ohaka tuvikile oudilona vako nomavava, [oshitya osho shOshigreka] otashi ulike koshinima keshe hashi tamunuka mo.” Natango odjo oyo oya popya shi na sha naJob 37:3 nosho yo Jesaja 11:12 ya ti kutya “outumbulilo oo otau ulike kefuta, keengaba ile kombada yedu kwoovenevene.” b

 Ombiibeli oya ti: “Satana okwe mu kufa ko vali [Jesus] a ya naye komhunda ile unene, ndele te mu ulikile omauhamba aeshe omounyuni nefimano lao.” (Mateus 4:8) Ovanhu vamwe ohava ti kutya ehokololo olo otali hongo kutya ounyuni aushe otau dulu okumonika ngeenge owa kala ponhele yonhumba molwaashi edu ola lalakana. Kakele kaasho, ‘omhunda ile unene’ oyo ya longifwa mehokololo eli oyopafaneko, ndele kai fi omhunda yovenevene. Natu ka taleni komatomheno amwe oo e tu ningifa tu fike pexulifodiladilo la tya ngaho.

•   Kape na nande omhunda imwe kombada yedu oko ovanhu tava dulu okulonda opo va mone omauhamba aeshe omounyuni.

•   Satana ina ulikila ashike Jesus omauhamba aeshe, ndele okwe mu ulikila yo “nefimano lao.” Oinima ya tya ngaho ihai dulu okumonikila kokule, osha fa shi li ngaha kutya Satana okwa li a longifa emoniko opo a ulikile Jesus oinima oyo. Osho osha faafana nomunhu ta longifa oprojekita nosikilina opo a ulikile ovanhu omafano okoitukulwa i lili noku lili.

•   Ehokololo la faafana olo tali hangwa muLukas 4:5 ola popya kutya Satana okwa ulikila Jesus “oilongo aishe yomounyuni mepakumo limwe alike,” osho itashi shiiva nandenande kovanhu okutala oinima aishe mepakumo leisho. Osho otashi ulike kutya Satana okwa li ta yeleke Jesus monghedi omo ovanhu itava dulu okumona nomesho okomutwe.