“Ino tila, osheshi Ame ondi li pamwe naave. Ino [kala] wa limbililwa, osheshi Aame Kalunga koye. Ame ohandi ku pameke ndele handi ku kwafa yo, Ame ohandi ku yambidida yo neke lolulyo louyuki wange.” — Jesaja 41:10, Ombiibeli yOshikwanyama yomo 2013.

Jehova * okwa shilipaleka ovapiya vaye ovadiinini kutya ote ke va yambidida, kashi na nee mbudi kutya ova taalela omaupyakadi a fa peni.

“Ame ondi li pamwe naave.” Jehova okwa lombwela ovalongeli vaye kutya omolwashike vehe na okukala va tila, molwaashi kave li ovo aveke. Molwaashi oha kala e wete eenghalo odo tava piti mudo nokupwilikina komailikano avo, kungaho okwa fa e li pamwe navo. — Epsalme 34:15; 1 Petrus 3:12.

“Aame Kalunga koye.” Jehova oha kwafele ovapiya vaye va kale va ngungumana kashi na nee mbudi kutya otava piti meenghalo da tya ngahelipi, molwaashi oku li Kalunga kavo nokwa tambula ko onghedi yavo yoku mu longela. Ohava kala ve shii kutya kape na osho tashi dulu okwiimba Kalunga a katuke onghatu ponhele yavo. — Epsalme 118:6; Ovaroma 8:32; Ovaheberi 13:6.

“Ame ohandi ku pameke ndele handi ku kwafa yo, Ame ohandi ku yambidida yo neke lolulyo louyuki wange.” Jehova okwa longifa omautumbulilo atatu opo a yelife ediladilo limwe kutya ota ka yambidida ovapiya vaye. Okwa longifa omupopyofano opo a yelife nghee he linyenge ngeenge oshiwana shaye sha pumbwa ekwafo. Ngeenge umwe a punduka, Jehova ohe mu kwata neke laye lokolulyo opo e mu hambule po. — Jesaja 41:13.

Onghedi imwe ya fimana omo Jehova ha pameke nokuyambidida ovapiya vaye okupitila mEendjovo daye, Ombiibeli. (Josua 1:8; Ovaheberi 4:12) Pashihopaenenwa, Eendjovo daKalunga odi na omayele taa longo oo taa dulu okukwafela ovo va taalela omashongo, ngaashi oluhepo, ouyehame ile va filwa umwe oo ve hole. (Omayeletumbulo 2:6, 7) Kalunga oha longifa yo omhepo iyapuki ile eenghono daye tadi longo opo a kwafele pamaliudo nosho yo pamadiladilo ovapiya vaye ovo ve li momashongo va dule okulididimika. — Jesaja 40:29; Lukas 11:13.

Eendjovo odo oda li da hekeleka Ovajuda ovadiinini ovo va li va twalwa moukwatwa waBabilon. Jehova okwa li a popya eendjovo odo lwopexulilo loukwatwa wOvajuda, molwaashi opa li tapa ka kala eenghundana di na sha nomutondi oo a li ta ka hanauna po oiwana oyo ya li ye va dingilila nokuningila omatilifo Babilon. (Jesaja 41:2-4; 44:1-4) Ofimbo Ovababilon nosho yo oiwana oyo ya li ye va dingilila tai ka kala ya mbadapala keenghundana odo, Ovajuda kava li tave lipula nasha molwaashi ove shii kutya Jehova ote ke va amena. Jehova okwa shilipaleka oshiwana shaye lwoikando itatu kutya “ino kala wa tila.” — Jesaja 41:5, 6, 10, 13, 14.

Nonande pehovelo eendjovo odo oda li da yukifwa kOvajuda ovadiinini ovo va li moukwatwa waBabilon, Jehova Kalunga okwa shilipaleka kutya eendjovo odo daJesaja 41:10 otadi hekeleke ovapiya vaye aveshe. (Jesaja 40:8; Ovaroma 15:4) Ote va kwafele kunena ngaashi ashike a kwafela ovapiya vaye monakudiwa.