“Inamu kala noshisho shefiku lomongula, osheshi nalo otali ka kala noisho yalo. Efiku keshe oli na oudjuu walo.” — Mateus 6:34, Ombiibeli — Etoloko lOunyuni Mupe lOmishangwa dopaKriste dOshigreka.

“Inamu kala noshisho shefiku lomongula. Osheshi lo otali uya li na shalo vene. Okeshe tuu efiku la wana oudjuu walo.” — Mateus 6:34, Ombiibeli yOshikwanyama yomo 2013.

Jesus, oo a popya eendjovo odo, okwa shilipaleka ovapwilikini vaye kutya kave na okukala tave lipula unene, ile ve na oshisho sha pitilila shi na sha nomaupyakadi omonakwiiwa. Ponhele yaasho, otava ka mona ouwa ngeenge ova kala ashike tave lipula noupyakadi wefiku olo.

Jesus ka li a hala okutya otu na okuhenuka okudiladila shi na sha nefiku lomongula ile tu henuke okuninga eemhangela domonakwiiwa. (Omayeletumbulo 21:5) Ponhele yaasho, okwa li te tu kwafele tuha kale hatu lipula unene ile tuha kale noshisho sha pitilila shi na sha naasho tashi dulika shi ke tu ningilwe mongula. Ngeenge otwa kala hatu lipula unene noinima oyo, otashi ke tu kanififa ehafo letu noitatu ka dula vali okuyandja elitulemo kwaasho hatu ningi. Itatu ka kandula po omaupyakadi omonakwiiwa mokukala hatu lipula nao. Luhapu, oinima oyo hatu kala hatu lipula nayo ihai ningwa, ile ngeenge oya ningwa, ihai kala ya naipala ngaashi twa li hatu diladila.

Eendjovo odo daJesus odi li oshitukulwa shEudifo lokOmhunda olo tali hangwa muMateus etukulwa 5-7. Meudifo laye, Jesus okwa yelifa kutya oshisho sha pitilila itashi dulu oku tu etela ehafo ile okulelepeka onghalamwenyo yetu. (Mateus 6:27) Okwa popya yo kutya ngeenge otwa pitifa komesho Kalunga monghalamwenyo yetu, inatu pumbwa okukala hatu lipula shi na sha nefiku lomongula. Kalunga oha file oshisho omiti noinamwenyo, nota ka fila yo oshisho ovo have mu longele. — Mateus 6:25, 26, 28-33.