Onghundana ii: Eehoni otadi dulu okukwiimba uha pange oukaume novanhu nouha kale u na oimoniwa.

Onghundana iwa: Eehoni haalushe hadi kala dii. Otadi dulu oku ku kwafela u kale ho diladila ofimbo ino popya, u kale ho konenene nokupwilikina nawa.

Onghundana i li xwepo: Ngeenge ou na eehoni inashi hala okutya osho ashike to kala ngaho fiyo alushe. Oto dulu oku di pangela. Oshitukulwa eshi otashi ke ku kwafela nghee to dulu oku shi ninga.

•  Shiiva osho hashi ku etele oumbada

•  Kala ho tula moilonga eemhangela doye

•  Osho oomakula voye tava ti

Eehoni otadi dulu oku ku ningifa u kale u na oumbada wokupopya novanhu oshipala noshipala. Naasho otashi dulu oku ku ningifa u litongole ko kuvakweni, wa fa u li momilaulu oove auke. Osho oshinima shitilifa. Ashike ngeenge owa findi oumbada oo u ku kwete, oto ka mona kutya ino pumbwa okukala wa tila. Natu ka taleni koihopaenenwa itatu.

• Oumbada #1: “Kandi shii kutya nandi popye kombinga yashike.”

  Oshili: Ovanhu haalushe hava dimbuluka osho wa popya, ndele unene oshosho we va ningila. Oto dulu okufinda oumbada mokukala ho pwilikine nawa nokukala u na ohokwe mwaasho tashi popiwa.

  Diladila kwaashi: Mbela owa hala okukala nakaume a tya ngahelipi, oye oo ha kala alushe ta popi, ile oyou ha pwilikine nawa?

• Oumbada #2: “Ovanhu otava ka diladila kutya onda fila eedi.”

  Oshili: Ovanhu ove na okukala tave ku popi, kutya nee ou na eehoni, ile hasho. Oto dulu okufinda oumbada mokukala ho popi omaliudo oye, naasho otashi ka kwafela ovanhu va mone kutya ove omunhu a tya naanaa ngahelipi.

  Diladila kwaashi: Ngeenge oho diladila kutya ovanhu aveshe ohava ungaunga naave nai, otashi dulika oove u na etaleko lii, to diladila kutya kave ku hole.

• Oumbada #3: “Ohandi ka kala nda fya ohoni ngeenge onda popi oshinima sha puka.”

  Oshili: Osho ohashi ningilwa keshe umwe omafimbo nomafimbo. Oto dulu okufinda oumbada mokutala ko omapuko oye e li omhito yokuulika kutya ino wanenena.

  Diladila kwaashi: Mbela iho kala wa hafa ngeenge u li novanhu ovo ve shii kutya inava wanenena?

Owe shi shiiva tuu? Ovanhu vahapu ohava diladila kutya kave na eehoni, molwaashi ohava tumu omatumwalaka mahapu. Ashike oshipu okumona ookaume kashili ngeenge ohamu popi navo oshipala noshipala. Sherry Turkle, omuxungimwenyo nomunawino mouteknologi, okwa ti: “Ohatu nanenwa komunhu ngeenge otwe mu mono moshipala nongeenge otwa udu ondaka yaye.” *

• Henuka okuliyelekanifa navamwe. Ino kala u na ounhwa. Ponhele yaasho, ngeenge owe litulile po elalakano oto ka dula okufinda eehoni, to ka panga oukaume navamwe noto ka kala u na oimoniwa.

  Alicia okwa ti: “Eenghundafana inadi pumbwa okukala diledile, ndele shimha ashike ho ti mo mbofo. Kala ho lombwele ovo vape edina loye, ile u pule omapulo manini e li paunafangwa.”

  Efinamhango lopaMbiibeli: “Keshe umwe na konakone oilonga yaye mwene kutya oya tya ngahelipi opo e i litangele, ndele hakuliyelekanifa navamwe.” — Ovagalati 6:4.

• Kala ho konenene. Tala nghee ovanhu hava endafana, nanghee hava popi. Oshike va hafela? Oshike inava hafela? Openi wa pumbwa okuxwepopala?

  Aaron okwa ti: “Konenena nokulihonga kovanhu ovo hava pange diva oukaume novanhu. Tala nghee hava katuka nanghee hava popi ngeenge opo va shakeneke omunhu oshikando shotete.”

  Efinamhango lopaMbiibeli: “Oshivela tashi upike oshivela, nosho yo omunhu ta upike mukwao.” — Omayeletumbulo 27:17.

• Pula omapulo. Ovanhu luhapu ove hole okupopya omataleko avo e na sha noinima, onghee okupula omapulo noukeka oku li onghedi ya denga mbada yokuhovela eenghundafana navo. Ohashi ningifa yo ovanhu vaha yandje unene elitulemo kwoove.

  Alana okwa ti: “Okulilongekida komesho yefimbo ohashi ku kwafele uha kale noshisho. Oto dulu okudiladila koikundafanwa inini, ile komapulo onhumba ofimbo ino kwatafana novanhu, opo ngeenge owa ka shakena novanhu vape shihe ku wilile po.”

  Efinamhango lopaMbiibeli: “Inamu lalakanena ashike ouwa weni vene, ndele lalakaneneni yo ouwa wavakweni.” — Ovafilippi 2:4.