David, womido 23, okwa ti: “Oshinima osho sha li shidjuu neenghono eshi handi kulu, okukala ndi na hokwe movanhu voukashike kookanhu wa fa wange. Onda li hai diladila kutya oshinima ashike shopakafimbo, ndele omaliudo oo oku kwete nge fiyo onena.”

David oku li Omukriste oo a hala okuhafifa Kalunga. Mbela ota dulu ngoo okuninga ngaho nopefimbo opo tuu opo oku na omaliudo okukala ta nanenwa koukashike kookanhu wa fa waye? Kalunga oku uditile ngahelipi oushenge?

•  Ombiibeli otai ti ngahelipi?

•  Mbela osho osha hala okutya . . . ?

•  Ongahelipi ngeenge . . . ?

Elihumbato li na sha noushenge ola yoolokafana momaputuko e lili noku lili, ile pomafimbo a yoolokafana. Ashike Ovakriste ihava wilikwa komadiladilo oo e li apeshe ile ‘tu telwaanifwe komhepo nokushikula omahongo opanhu.’ (Ovaefeso 4:14) Ponhele yaasho, ohava kanghamekele etaleko lavo li na sha neenghedi doushenge (ile elihumbato keshe li na sha noshinima osho) komifikamhango dOmbiibeli.

Omifikamhango di na sha nelihumbato loushenge, mOmbiibeli odi li mo da yela. Eendjovo daKalunga oda ti:

• “Ino nangala nomulumenhu ngaashi tashi nangalwa nomukainhu.” — Leviticus 18:22.

• “Molwaashi ova hala okulandula omahalo avo vene, . . . Kalunga okwe va efa va landule omahalo ovo a puka opamilele, onghee ovakainhu vavo ova pingakanifa onghedi yavo yopaushitwe naayo ihe fi yopaushitwe.” — Ovaroma 1:24, 26.

• “Inamu lifufya. Ovahaeli, ovalongeli voikalunga, ovanyoni vohombo, omashenge, ovahaeli vomashenge, eembudi, ovanalwisho, eengholwe, ovasheki novanyeki itava ka fyuulula Ouhamba waKalunga.” — 1 Ovakorinto 6:9, 10.

Paushili wo vene, omifikamhango daKalunga oda nuninwa ovanhu aveshe, kutya nee ove na omahalo oushenge, ile hasho. Oushili ou li apa kutya, keshe umwe oku na okulipangela, ngeenge tashi uya pomahalo okulihumbata monghedi oyo itai hafifa Kalunga. — Ovakolossi 3:5.

Mbela osho osha hala okutya Ombiibeli otai xumifa komesho outondwe womashenge?

Ahowe. Paushili wo vene, Ombiibeli itai xumifa komesho outondwe wokutonda umwe, kutya nee eshenge, ile oye oo ehe fi eshenge. Ponhele yaasho, otai tu lombwele tu “lalakanene ombili novanhu aveshe,” kashi na nee mbudi kutya ove na onghalamwenyo ya tya ngahelipi. (Ovaheberi 12:14) Onghee hano, osha puka okukufa ombinga mokushinda, mokuningila ominyonena, ile okuninga nai kwoludi keshe kwomashenge.

Mbela osho osha hala okutya Ovakriste ove na okukala ve li omhinge neemhango odo tadi popile omashenge?

Ombiibeli otai ulike kutya omifikamhango daKalunga di na sha nohombo, oda pitika ashike omulumenhu nomukainhu ovo va kale pamwe mohombo. (Mateus 19:4-6) Ashike oikundafanwa i na sha neemhango dokuhombolafana kwomashenge oi li oshinima shopapolitika, ndele kashi na sha neenghedi. Ombiibeli oya lombwela Ovakriste vaha kufe ombinga mopolotika. (Johannes 18:36) Onghee hano, ihava popile, ile va pataneke eemhango dopapangelo di na sha nelihumbato lokuhombola kwomashenge.

Ongahelipi ngeenge omunhu oha kufa ombinga moushenge paife? Omunhu a tya ngaho ota dulu ngoo okulundulula?

Heeno. Ovanhu vamwe vomefelemudo lotete ova li va lundulula. Eshi Ombiibeli ya popya kutya omashenge itaa ka fyuulula Ouhamba waKalunga, oya ti yo kutya : “Vamwe vomunyu osho mwa li ngaho.” — 1 Ovakorinto 6:11.

Mbela osho osha hala okutya ovo va efa po oushenge ihava hangwa vali komahalo avo onale? Ahowe. Ombiibeli oya ti: ‘Djaleni omunhu mupe oo a shitululwa a ninge mupe okupitila meshiivo lashili.’ (Ovakolossi 3:10) Okuninga omalunduluko oshinima tashi twikile.

Ndele mbela ongahelipi ngeenge omunhu oo a hala okushikula omifikamhango daKalunga natango oku na omahalo oushenge?

Ngaashi ashike omahalo mai aeshe, omunhu ota dulu okuhoolola aha kale ta diladila kwaasho, ile aha shikule omahalo a tya ngaho. Ngahelipi mbela? Ombiibeli oya ti: ‘Kaleni hamu wilikwa komhepo iyapuki, opo muha wanife vali nandenande omahalo opambelela.’ — Ovagalati 5:16.

Didilika kutya ovelishe inai popya kutya omunhu ita ka kala e na omahalo opambelela. Ponhele yaasho, ngeenge okwe kala e lipyakidila noinima yopamhepo, ngaashi okulesha alushe Ombiibeli nokwiilikana, ota ka mona eenghono dokukondjifa omahalo oo.

David, oo a tumbulwa pehovelo, okwa mona oushili waasho, unene tuu eshi a li a lombwela ovadali vaye Ovakriste kombinga yaasho ta kondjo nasho. Okwa ti: “Onda li nda kufwa omutengi mudjuu, oo nda li nda humbata. Nokuli ngeno onda li nde shi lombwela ovadali vange diva, ngeno onda hafela neenghono omido dange dokamukondapweyu.”

Lwanima, ohatu ka kala twa hafa neenghono, ngeenge otwa kendabala tu kale metwokumwe nomifikamhango daJehova. Otwa tomhwa kutya omalombwelo aJehova “okwa yuka, taa hafifa omutima” nosho yo kutya “moku di diinina otamu di ondjabi.” — Epsalme 19:8, 11.