•  Omuhongi ha monika e na onyanya

•  Osho tashi dulu oku ku kwafela

•  Nghee u na okupopya nomuhongi woye

•  Osho oomakula voye tava ti

Konyala omunafikola keshe oha kala a nyematela omuhongi wonhumba, oo ha monika a fa iha ungaunga nawa novanafikola, ile e hole sha komangelwa.

• Luis womido 21, okwa ti: “Omuhongi wetu umwe okwa li ha ula nai ovahongwa vaye noine va fimaneka. Okwa li e li pokupendjelwa, nokwa li e na elineekelo kutya ita tewa mo moilonga omolwelihumbato laye.”

• Melanie womido 25, okwa popya kutya opa li omuhongi umwe oo a li ha ungaunga naye nai shi dulife ounona vakwao. Okwa ti: “Okwa li ha ungaunga naame nai, molwaashi nghi li oshilyo shelongelokalunga limwe lomwaao a fimanekwa. Okwa popya kutya onda pumbwa okwiikilila onghedi oyo ha ungaunga naame.”

Ngeenge ope na omuhongi umwe ihamu udafana naye, owa pumbwa okuninga oinima yonhumba opo shiha ye moshipala ehongo loye. Kendabala omaetepo taa shikula.

• Tambula ko onghalo. Ovahongi ohava kala va teelela ovanafikola va ninge oinima yonhumba. Kendabala okumona kutya oshike omuhongi a teelela u ninge, nokulonga noudiinini ngaashi to dulu.

  Efinamhango lopaMbiibeli: “Omunongo na pwilikine opo a hapupalife eendunge.” — Omayeletumbulo 1:5.

  Christopher okwa ti: “Onda mona kutya onda pumbwa ashike okutambula ko onghalo yomuhongi wange, onghee onda kendabala ngaashi handi dulu opo ndi kale handi ningi oinima monghedi omo a hala. Osho oshe shi ningifa shipu tu kale hatu tu kumwe naye.”

• Kala u na efimaneko. Kala ho popi nonghenda novahongi voye. Ino kala ho va nyamukula nai, nonande ovo ve na epuko. Dimbuluka kutya ove ku tala ko u li omunafikola, ndele ku fi makula wavo.

  Efinamhango lopaMbiibeli: “Eendjovo deni nadi kale alushe donghenda, da fingala omongwa, opo mu kale mu shii nghee mu na okunyamukula keshe umwe.” — Ovakolossi 4:6.

  Ciara okwa ti: “Ovanafikola haalushe hava ungaunga novahongi nefimaneko, onghee ngeenge owa kala ho va fimaneke otava ka ungaunga naave monghedi ya yooloka ko kwaayo hava ungaunga navakweni.”

• Uda ko onghalo. Ovahongi navo ovanhu ngaashi fye. Osho osha hala okutya navo ohava kala ve na omalipulo nosho yo oisho, ngaashi ovanhu aveshe. Onghee ino fika pexulifodiladilo kutya, ‘Omuhongi wetu oku na eenghedi dii,’ ile ‘Omuhongi wetu oku tonde nge.’

  Efinamhango lopaMbiibeli: “Atusheni ohatu ningi omapuko.” — Jakob 3:2.

  Alexis okwa ti: “Ovahongi ohava longo noudiinini. Diladila ashike to kwafele ounona aveshe va kale ve na eenghedi diwa noku va honga. Alushe ohandi ningi eenghendabala opo ndiha wede ko komutengi wavo novaha kale tave lipula unene.”

•  Popya novadali voye. Ovadali voye ove li ekwafo linene kwoove. Ova hala u pondole mofikola, nomayele oo tave ku pe otae ku kwafele u kale ho udafana novahongi ovo hava ungaunga naave nai.

  Efinamhango lopaMbiibeli: “Apa pehe nomapukululo, eemhangela tadi nyonauka.” — Omayeletumbulo 15:22.

  Olivia okwa ti: “Ovadali ove na owino muhapu u na sha nokupongolola po omaupyakadi ve dule ovanyasha. Onghee hano, kala ho pwilikine komayele avo. Otae ku kwafele u pondole.”

Peemhito dimwe, owa pumbwa okupopya nomuhongi woye opo mu pongolole po oupyakadi oo u li pokati keni. Ngeenge owa tila oku ka popya naye, dimbuluka kutya itamu ka tanguna. Otamu ka kundafana, notashi dulika nokuli shi ka ende nawa nokweeta oidjemo iwa.

Efinamhango lopaMbiibeli: “Natu lalakanene oinima oyo tai eta ombili.” — Ovaroma 14:19.

Juliana okwa ti: “Ngeenge omuhongi ota monika a fa ashike ha ungaunga naave nai, mu pula ngeenge owa ninga sha sha puka. Osho te ke ku lombwela otashi ke ku kwafela u mone opo wa pumbwa okuxwepopala.”

Benjamin okwa ti: “Oshiwa okuyelifila omuhongi woye nombili mu li po onye amuke, opo u mu yelifile nghee u uditile onghalo yonhumba ofimbo eetundi inadi hovela, ile konima yado. Otashi dulika a ka kale a fimaneka onghedi omo we shi ninga.”

EHOKOLOLO LOSHILI

Maria okwa ti: “Onda li handi mono oitwa i li pedu, nomuhongi wange okwa li ta monika a fa ehe na ko nasha. Onda li nda hala okweefa po ofikola, molwaashi osha li sha djuupalela nge.

“Onda li nda ka pula omayele komuhongi umwe. Omuhongi oo okwa lombwela nge a ti: ‘Amushe nomuhongi oo kape na oo e shii mukwao lelalela. Owa pumbwa ashike oku mu lombwela kutya ou na oupyakadi. Otashi dulika u ka kwafele ovanafikola ovo yo hava kala va tila okupopya naye.’

“Kanda li nda hala okupopya nomuhongi wange! Ashike onda li nda diladila moule kwaasho omuhongi mukwao a lombwelwa nge, nonda mona kutya oku li mondjila. Ngeenge onda hala oinima i lunduluke, aame nda pumbwa okukatuka onghatu tete.

“Ngomongula, onda li nda ya ko komuhongi wange, ndele handi mu lombwele nefimaneko kutya ohandi pandula eshi he tu hongo nonokutya onda hala okukala handi shi endifa nawa. Onde mu lombwela kutya ohandi nyengwa nokandi shii kutya nandi ninge po shike. Okwa li a pa nge omaetepo nokwa kala ha kwafele nge konima yeetundi ile pae-mail.

“Onda li nda kumwa! Eenghundafana odo oda kwafela nge ndi teye po einda olo la li pokati kange nomuhongi nosha kwafela nge ndi kale ndi hole ofikola.”

Eetepo: Ngeenge ou na oupyakadi nomuhongi woye, shi tala ko kutya otashi ku longekidile oukulunhu. Katie womido 22, okwa ti: “Nokuli nokonima eshi wa mana ofikola, oto ka shakeneka ovanhu ovo ve na eendodo mepangelo, ovo tava monika vehe na ohole. Ngeenge ou shii okuungaunga nomuhongi oo e na oupyakadi naave, otashi ke ku kwafela monakwiiwa u ka dule okuungaunga novanhu ovo ve na oupyakadi naave.”