Omunyasha wedina Will okwa ti: “Ombiibeli ohai monika ya fa i fifa ounye ngeenge ku shii nghee u na oku i lesha.”

Mbela owa hala okushiiva oshiholekwa shi na sha nanghee to dulu okuhafela elesho lOmbiibeli loye? Oshitukulwa eshi otashi ke ku kwafela.

•  Mwenyopaleka Omishangwa

•  Ninga omapekapeko

•  Osho oomakula voye tava ti

Kala to yandje elitulemo kwaasho to lesha. Oto dulu okuninga ngaha:

1. Hoolola ehokololo lopaMbiibeli olo wa hala okukonakona. Oto dulu okuhoolola oshiningwanima shopaMbiibeli ile etumwalaka mOmavaengeli, ile u hoolole ehokololo limwe melesho lOmbiibeli la kwatwa momawi olo tali hangwa ko-jw.org.

2. Lesha ehokololo. Oto dulu oku li lesha oove auke, ile u li leshe mokule nookaume koye ile noilyo youkwaneumbo weni. Umwe na leshe e li omuhokololi, ofimbo vakwao tava kalele po ovanhu ovo tava kufa ombinga mehokololo olo.

3. Kendabala u shikule limwe, ile amwe omomaetepo aa:

   • Faneka omafano e na sha nehokololo olo. Ile u faneke oiningwanima palandulafano. Longifa oupalanyole opo u yelife osho tashi ningwa mefano keshe.

   • Faneka omafano. Pashihopaenenwa, ngeenge oto lesha kombinga yomupiya waKalunga umwe oo a li omudiinini, shanga omaukwatya nosho yo eenghatu odo a li a katuka opo a mone omanangeko noupuna.

   • Lundululila ehokololo olo mehokololo limwe. Li hokolola meenghedi dihapu, mwa kwatelwa okupulapula ovanyandi ovo tava dana onghandangala nosho yo eembangi.

   • Ngeenge umwe womovanyandi ovo va tumbulwa mehokololo okwa ninga etokolo lihe li pandunge, diladila yo nghee a katuka pexulilo. Pashihopaenenwa, diladila nghee Petrus a li e likala Jesus. (Markus 14:66-72) Mbela Petrus okwa li e na okulinyenga ngahelipi kefininiko olo?

   • Ngeenge ou li enyakwa, kendabala okuninga oshinyandwa shoye mwene sha kanghamena kehololo lopaMbiibeli. Kwatela mo yo oilihongomwa oyo tai hangwa mehokololo olo. — Ovaroma 15:4.

Ngeenge owa konakona ehokololo noukeka, oto ka mona ouyelele wa fimana wehokololo olo. Omafimbo amwe, oshitya ashike shimwe, ile ivali i li mehokololo lopaMbiibeli tai dana onghandangala ya fimana.

Pashihopaenenwa, yelekanifa Mateus 28:7 naMarkus 16:7.

•  Omolwashike Markus a popya kutya Jesus ota ka holokela diva ovahongwa vaye “naPetrus”?

• Oku shi popya pauxupi: Markus kali po poiningwanima oyo, ashike ouyelele oo okwe u lombwelwa kuPetrus.

• Ouyelele wa futama: Omolwashike Petrus a li a hafa eshi a uda kutya Jesus okwa hala oku mu mona natango? (Markus 14:66-72) Jesus okwa ulika ngahelipi kutya oku li kaume kashili kaPetrus? Ongahelipi to dulu okuhopaenena Jesus nokuulika kutya ou li kaume kashili kuvamwe?

Ngeenge owa kala ho mwenyopaleke Omishangwa nokuninga omapekapeko, oto ka tyapula neenghono elesho loye lOmbiibeli.