Omafimbo otete 29:1-30
29 Ohamba David oya lombwela eongalo alishe, ya ti: “Omumwange Salomo, oo a hoololwa kuKalunga, omunyasha noke na owino,* noilonga oihapu, molwaashi otembeli* kai fi yovanhu, ndele oyaJehova Kalunga.
2 Onda kendabala okuninga omalongekido e na sha neumbo laKalunga kange, nda longekida oshingoli shoinima oyo hai longwa moshingoli, oshisilveri shoinima oyo hai longwa moshisilveri, ongopolo yoinima oyo hai longwa mongopolo, oshivela shilaula shoinima oyo hai longwa moshivela shilaula, omiti doinima oya hai longwa momiti, oumanya vaoniks, omamanya okutulwa ko nomunoko, oumanya vanini vokufeweka, omamanya ondilo oludi keshe nosho yo omamanya mapu mahapu neenghono.
3 Natango, molwaashi onda hokwa eumbo laKalunga kange, ope na yo omamona ange opaumwene oshingoli noshisilveri, oo handi yandje omolweumbo laKalunga kange, a wedwa kwaaishe oyo nda longekidila eumbo liyapuki,
4 mwa kwatelwa oitalenti* yoshingoli 3 000 ya dja kuOfir nosho yo oitalenti yoshisilveri elela 7 000 yokukolonga omakuma eenduda,
5 oshingoli shoinima oyo hai longwa moshingoli noshisilveri shoinima oyo hai longwa moshisilveri, noilonga aishe oi na okulongwa kovahambwidi. Olyelye e lilongekida nena okweetela Jehova eeshali?”
6 Onghee omalenga omaukwaneumbo omapata, omalenga omapata aIsrael, omalenga taa pashukile omayovi nomafele nomalenga oilonga yohamba okwe uya komesho nehalo liwa.
7 Ova yandja oinima ei omolwoilonga yeumbo laKalunga kashili: oitalenti yoshingoli 5 000, eedariki* 10 000, oitalenti yoshisilveri 10 000, oitalenti yongopolo 18 000 noitalenti yoshivela shilaula 100 000.
8 Keshe oo a li e na omamanya ondilo okwe a yandja keemhungulilo deumbo laJehova, koshi yewiliko laJehiel, Omugerson.
9 Ovanhu ova li va hafa, eshi tava yandje omayambo oo nehalo liwa, molwaashi ova yandja omayambo nehalo liwa kuJehova nomutima aushe, nohamba David oya li yo ya hafa neenghono.
10 Opo nee David okwa tanga Jehova moipafi yeongalo alishe. David okwa ti: “Jehova, Kalunga kaIsrael, tate yetu, tangwa fiyo alushe.*
11 Jehova, ounene, eenghono, ewapalo, etumbalo nefimano oyoye, molwaashi oinima aishe, oyo i li meulu naayo i li kombada yedu, oyoye. Jehova, ouhamba owoye. Oove to litumbaleke u li omutwe kombada yoinima aishe.
12 Oupuna nefimano oya dja kwoove, oto pangele oinima aishe, meke loye omu na omafa neenghono dinene, neke loye otali dulu okunenepeka nokuyandja eenghono kwaaishe.
13 Paife, Kalunga ketu, ohatu pandula nokutanga edina loye liwa.
14 “Natango, aame lyelye novanhu vange ovo oolyelye, opo tu dule okuyandja eeshali nehalo liwa ngaashi edi? Osheshi oinima aishe oya dja kwoove, notwe ku pa osho sha dja meke loye.
15 Osheshi fye ovanailongo novaidililwa momesho oye, ngaashi ashike ootatekulululwa aveshe. Nomolwaashi omafiku etu okukala kombada yedu oku li ngaashi omudidimbe, tuhe na eteelelo.
16 Jehova, Kalunga ketu, omamona aeshe, aa twa longekida okutungifa eumbo loye omolwedina loye liyapuki, okwa dja meke loye, naaeshe ooye.
17 Kalunga kange, ondi shi shii nawa kutya oho konakona omutima nou hole oudiinini.* Omolwouyuki womutima wange, onda yandja nehalo liwa oinima aishe oyo, nonda hafa neenghono okumona ovanhu voye, ovo ve li apa, tava yandje eeshali nehalo liwa.
18 Jehova, Kalunga kaAbraham, kaIsak nokaIsrael, ootatekulululwa, kaleka omahalo nomadiladilo aa momitima dovanhu voye fiyo alushe, nokuyukifa omitima davo kwoove.
19 Kwafela omonamati wange, Salomo, a dulike nomutima aushe* koipango yoye, komadimbulukifo oye nokomaufomhango oye nosho yo a longe oinima aishe oyo, noku tunge otembeli* oyo nda ningila omalongekido.”
20 Opo nee David okwa lombwela eongalo alishe, a ti: “Paife, tangeni Jehova, Kalunga keni.” Eongalo alishe ola tanga Jehova, Kalunga kooxekulululwa, nole linyongamena pedu nokunangala eombe koshipala shaJehova noshohamba.
21 Ova twikila okuyambela Jehova omayambo nosho yo okuyambela Jehova omaxwikiloyambo mefiku la shikula ko, eendumetana 1 000, eedi deendume 1 000, eedjona deendume 1 000 noikunwayambo yado; ova yamba omayambo momuvalu munene ponhele yOvaisrael aveshe.
22 Mefiku olo, ova twikila okulya nokunwa koshipala shaJehova va hafa neenghono, nova ninga Salomo, omonamati waDavid, ohamba oshikando oshitivali, nove mu vaeka koshipala shaJehova, e li omuwiliki, nosho yo Sadok e li omupristeri.
23 Salomo okwa kala omutumba kolukalwapangelo laJehova e li ohamba ponhele yaxe, David, nokwa kala ha pondola, nOvaisrael aveshe ova li hava dulika kuye.
24 Omalenga aeshe, ovakwaita aveshe ovanaenghono nosho yo ovanamati aveshe vohamba David ova li ve liyandja kohamba Salomo.
25 Jehova okwa pa Salomo efimano linene moipafi yOvaisrael aveshe nokwe mu pa eenghono da shiya ko, nokapa li nale ohamba muIsrael ya li i di na.
26 David, omonamati waIsai, osho a pangela ngaho muIsrael ashishe,
27 nefimbo* olo a pangela muIsrael ola li eedula 40. Okwa pangela muHebron oule weedula 7, nokwa pangela muJerusalem oule weedula 33.
28 Okwa fya moukulupe, a hafela omwenyo mule,* oupuna nefimano; omonamati waye, Salomo, okwa ninga ohamba ponhele yaye.
29 Ondjokonona yohamba David, okudja pehovelo fiyo opexulilo, oya shangwa momahokololo aSamuel, omumonikokule, omuprofeti Natan noomumonikokule Gad,
30 mwa kwatelwa oinima aishe oyo ya ningwa pefimbo lokupangela kwaye, eenghono daye nosho yo oiningwanima oyo ye mu ningilwa nosho yo Israel nomauhamba aeshe oo e mu dingilila.
Eshangelo lopedu
^ Ile “omunini.”
^ Ile “oshilando sha dingililwa komakuma; ombala.”
^ Oshitalenti shimwe oshi fike peekilograma 34,2. Tala Oshiwedelwako B14.
^ Odariki oya li oshimaliwa shoshingoli shokuPersia. Tala Oshiwedelwako B14.
^ Ile “okudja nale fiyo alushe.”
^ Ile “ouyuki.”
^ Ile “e liufe filufilu.”
^ Ile “oshilando sha dingililwa komakuma; ombala.”
^ Eln., “nomafiku.”
^ Eln., “omafiku.”
