Samuel wotete 7:1-17
7 Ovalumenhu vokuKiriat-jearim ove uya, ndele tava kufa Oshikefa shaJehova nove shi twala keumbo laAbinadab, koshikulundudu, nova yapula omonamati waye, Eliaser, a kale ta pashukile Oshikefa shaJehova.
2 Okudja eshi Oshikefa she uya kuKiriat-jearim, opa pita oule womido 20, neumbo alishe laIsrael ola hovela okukonga* Jehova.
3 Samuel okwa lombwela eumbo alishe laIsrael a ti: “Ngeenge otamu alukile kuJehova nomutima weni aushe, ekeleishi ookalunga vokoilongo noihongwafano yaAstoret, oyo i li mokati keni, nokulongela Jehova aeke nomutima weni aushe, note ke mu xupifa momake Ovafilisti.”
4 Onghee Ovaisrael ova ekelashi ooBaal noihongwafano yaAstoret, ndele tava longele Jehova aeke.
5 Samuel okwa tya: “Ongeleni Ovaisrael aveshe muMispa, nohandi ka ilikana kuJehova ponhele yeni.”
6 Onghee ova ongala puMispa, ndele tava teke omeva noku a tilashi moipafi yaJehova nove lidilika mefiku olo. Ova tya: “Otwa nyona kuJehova.” Ndele Samuel okwa hovela okulonga e li omutokoli wOvaisrael muMispa.
7 Eshi Ovafilisti va uda kutya Ovaisrael ova li va ongala muMispa, ovapangeli vOvafilisti ova ka lwifa Ovaisrael. Eshi Ovaisrael ve shi uda, ova li va tila Ovafilisti.
8 Onghee Ovaisrael ova lombwela Samuel va ti: “Twikila okwiilikana Jehova Kalunga ketu e tu kwafele noku tu xupife momake Ovafilisti.”
9 Opo nee Samuel okwa kufa okadjona, ndele akeshe te ka yambele po Jehova ke li exwikiloyambo, ndele ta pulile Ovaisrael ekwafo kuJehova, na Jehova okwe mu nyamukula.
10 Eshi Samuel a li ta yambe exwikiloyambo, Ovafilisti ova li ve uya okulwifa Ovaisrael. Mefiku olo Jehova okwa ngungumifa omingungumo dinene mewangadjo, ndele ta ngwangwaneke Ovafilisti, nova li va findwa kOvaisrael.
11 Onghee Ovaisrael ova dja mo muMispa, ndele tava taataa Ovafilisti, noku va dipaa fiyo okolukadi laBet-kar.
12 Opo nee Samuel okwa kufa emanya, ndele te li diki pokati kaMispa naJesana nokwe li luka Eben-eser,* nokwa ti: “Natango Jehova okwe tu kwafela ngaashi ashike nale.”
13 Ovafilisti osho va li va findwa ngaho, noinave uya vali moshitukulwa shOvaisrael, na Jehova okwa twikila okukondjifa Ovafilisti onghalamwenyo aishe yaSamuel.
14 Natango, oilando noitukulwa oyo Ovafilisti va nyeka Ovaisrael, oya shuna vali kOvaisrael, okudja kuEkron fiyo okuGat.
Opa li yo ombili pokati kOvaisrael nOvaamori.
15 Samuel okwa kala omutokoli wOvaisrael onghalamwenyo yaye aishe.
16 Omudo keshe, okwa kala ha i kuBetel, kuGilgal nokuMispa, nokwa kala omutokoli wOvaisrael meenhele adishe odo.
17 Okwa kala ha shuna kuRama, molwaashi oko kwa li ku na eumbo laye, nokwa kala ko yo e li omutokoli wOvaisrael. Naako okwa tungila ko Jehova oaltari.
