Omafimbo omativali 26:1-23
26 Ovanhu aveshe vomuJuda ova kufa Ussia, oo a li e na eedula 16, ndele tave mu ningi ohamba ponhele yaxe, Amasia.
2 Okwa tungulula Elot, ndele te shi shunifa kuJuda, konima eshi ohamba* ya nangekwa pooxekulululwa.
3 Ussia okwa li e na eedula 16, eshi a ninga ohamba, nokwa pangela muJerusalem oule weedula 52. Edina laina oJekolia womuJerusalem.
4 Okwa twikila okulonga osho sha yuka momesho aJehova, ngaashi ashike xe, Amasia, a li a ninga.
5 Okwa twikila okulongela Kalunga pefimbo laSakaria, oo e mu honga okukala ha tila Kalunga kashili. Pefimbo olo a li ta longele Jehova, Kalunga kashili, okwe mu kwafela a pondole.
6 Okwa ya a ka lwife Ovafilisti nokwa mbonyauna po ekuma laGat, ekuma laJabne nekuma laAsdod. Konima yaasho, okwa tunga oilando popepi naAsdod nomoitukulwa aishe yOvafilisti.
7 Kalunga kashili okwe mu kwafela a lwife Ovafilisti, a lwife Ovaarabia, ovo va li hava di muGurbaal noku lwife Ovameunim.
8 Ovaammoni ova hovela okufuta eemhale* kuUssia. Efimano laye ola li la shiivika fiyo okuEgipiti, molwaashi okwa li a ninga omunaenghono unene.
9 Natango, Ussia okwa tunga eeshungongulu muJerusalem pOshivelo shomOhuke, pOshivelo shEfilu nopongudimanya, ndele te di pameke.
10 Okwa tunga vali eeshungongulu mombuwa nokwa xupa* eendungu dihapu (molwaashi okwa li e na oufita munene woimuna); osho yo a ninga muShefela nomefilu.* Okwa li e na ovafita novalongi vomoikunino keemhunda nomuKarmel, molwaashi okwa li e hole ounamapya.
11 Natango, Ussia okwa li e na etangakwaita le lilongekidila oita. Ova li hava i moikonga youkwaita, va unganekwa meengudu. Ova li va valulwa nova shangwa kuhamushanga Jeiel nokomukulunhu wetangakwaita Maasea, koshi yewiliko laHanania, umwe womomalenga ohamba.
12 Omuvalu aushe womitwe domaukwaneumbo omapata, odo da li tadi pashukile etangakwaita enaenghono, owa li 2 600.
13 Omatangakwaita a homatela olwoodi koshi yewiliko lavo omwa li ovalumenhu 307 500 ve lilongekidila oita, etangakwaita enaenghono tali amene ohamba komutondi.
14 Ussia okwa li a homateka etangakwaita alishe noikelelifo, omaonga, omambale, oundjafa vovakwaita, omauta noyuumbifo youmanya.
15 Natango, muJerusalem okwa li a longela mo omashina* oita, a longwa kovalumenhu ovanawino; okwa li a tulwa keeshungongulu nomeehuke dekuma nokwa li haa umbu oikuti nomamanya manene. Onghee efimano laye ola li la tandavela fiyo okokule, molwaashi okwa li a mona ekwafo linene nokwa li a ninga omunaenghono.
16 Ashike diva eshi a nghonopala, okwa li e linenepeka momutima waye, fiyo osheshi e lietela oupyakadi, nokwa nyona kuJehova, Kalunga kaye, eshi a ya motembeli yaJehova a ka xwikile oitwiminifo koaltari yomatwimino.
17 Omupristeri Asaria novapristeri vakwao vaJehova ovaladi 80 ove mu shikulila mo diva.
18 Ova hanyena ohamba Ussia, ndele tava ti kuyo: “Inashi yuka kwoove Ussia okuxwikila Jehova oitwiminifo! Ovapristeri ovo aveke ve na okuxwika oitwiminifo, molwaashi vo ove li oludalo laAron, ovo va kosholwa. Dja mo monhele iyapuki, molwaashi owa katuka shihe li pandunge, na Jehova Kalunga ite ke ku pa efimano omolwoshinima eshi.”
19 Ashike Ussia, oo a li e na oshikwatelwa shomundilo meke laye shokuxwikila oitwiminifo, okwa li a fula onya. Ofimbo a li a handukila ovapristeri, okwa li a kwatwa koudu woshilundu mombaba yoshipala shaye moipafi yovapristeri, meumbo laJehova popepi noaltari yomatwimino.
20 Eshi omupristeri omukulunhu Asaria novapristeri aveshe va piluka ve mu tale, ova mona kutya okwa kwatwa koudu woshilundu mombaba yoshipala shaye. Onghee ova endelela ve mu twale pondje, naye mwene okwa endelela a dje mo, molwaashi Jehova okwe mu denga.
21 Ohamba Ussia oya kala omunashilundu, fiyo omefiku omo ya fya. Oya twikila okukala meumbo li li lile, i li omunashilundu, molwaashi oya li ya kufwa mo meumbo laJehova. Jotam, omonamati wayo, oye a li ta pashukile eumbo* lohamba, ta tokola ovanhu vomoshilongo.
22 Ondjokonona aishe yaUssia, okudja pehovelo fiyo opexulilo, oya shangwa komuprofeti Jesaja, omonamati waAmos.
23 Opo nee Ussia okwa nangekwa pooxekulululwa, nove mu paka pooxekulululwa, ashike okwa pakwa mepya leehamba,* molwaashi ova ti: “Ye omunashilundu.” Omonamati waye, Jotam, okwa ninga ohamba ponhele yaye.
Eshangelo lopedu
^ Sha hala okutya, xe Amasia.
^ Ile “oifutomwa oyo ya li hai pewa eehamba.”
^ Ile “hoka,” tashi dulika momamanya.
^ Ile “komhunda ya lalakana.”
^ Ile “oilwifo.”
^ Ile “ombala.”
^ Tashi dulika epya olo la li popepi nomaendo eehamba.
