Omafimbo omativali 29:1-36
29 Hiskia okwa ninga ohamba, eshi a li e na eedula 25, nokwa pangela muJerusalem oule weedula 29. Edina laina oAbia, omonakadona waSakaria.
2 Okwa kala ta longo osho sha yuka momesho aJehova, ngaashi ashike xekulululwa, David, a li a ninga.
3 Momwedi wotete, momudo wotete wepangelo laye, okwa yeulula omivelo domeumbo laJehova nokwe di wapekulula.
4 Opo nee okwa kufa ovapristeri nOvalevi, ndele te va ongaleke pehalandjadja kombinga yokoushilo woshilando.
5 Okwe va lombwela, a ti: “Pwilikineni kwaame, nye Ovalevi. Likosholeni paife, ndele tamu yapula eumbo laJehova, Kalunga kooxokulululwa, nokukufa mo osho inashi koshoka monhele iyapuki.
6 Ootate inava kala ovadiinini nova ninga osho shii momesho aJehova, Kalunga ketu. Ove mu efa po nova alula ko omesho* avo ketwalihangano laJehova nove mu pilamena.
7 Ova idila yo omivelo dokalupale kokufikila nova dima eelamba. Ova efa po okuxwika oitwiminifo nokuyamba omaxwikiloyambo monhele iyapuki yaKalunga kaIsrael.
8 Onghee Jehova okwa li a handukila Juda naJerusalem, nokwe i etela oupyakadi, opo keshe oo ta mono nokuuda kombinga yayo ota kala a tila, a kumwa noku i sheka, ngaashi mu shi wete nomesho eni.
9 Ootatekulululwa ova fya keongamukonda, novanamati vetu, ovanakadona vetu novakulukadi vetu ova ya moukwatwa omolwoshinima osho.
10 Onghee onda halelela momutima wange okuninga ehangano naJehova, Kalunga kaIsrael, opo aha kale vali e tu handukila neenghono.
11 Ovamwange, eli halo efimbo lokwoongaonga,* molwaashi Jehova okwe mu hoolola mu fikame koshipala shaye, opo mu longe mu li ovayakuli vaye, nomu twime omatwiminoyambo.”
12 Opo nee Ovalevi ova fikama: Mahat, omonamati waAmasai, naJoel, omonamati waAsaria, vomoludalo lOvakohat; mOvamerari, oKish, omonamati waAbdi, naAsaria, omonamati waJehallelel; mOvagerson, oJoa, omonamati waSimma, naEden, omonamati waJoa;
13 movanamati vaElisafan, oSimri naJehuel; movanamati vaAsaf, oSakaria naMattania;
14 movanamati vaHeman, oJehiel naSimei; movanamati vaJedutun, oShemaia naUsiel.
15 Opo nee ova ongaleka ovamwaxe nove likoshola, ndele tava i, ngaashi ohamba ya popya paendjovo daJehova di na sha nokukoshola eumbo laJehova.
16 Ovapristeri ova ya meumbo laJehova va ka koshole nokukufa mo oinima aishe oyo inai koshoka, oyo va hanga meumbo laJehova, ndele tave i twala moshihale sheumbo laJehova. Ovalevi ove i kufa mo, ndele tave i twala pondje kEfilu laKidron.
17 Ova hovela okukoshola mefiku lotete lomwedi wotete, nomefiku etihetatu lomwedi oo, ova fika pokalupale kokufikila kaJehova. Ova koshola eumbo laJehova oule womafiku ahetatu, nova manifa mefiku eti-16 lomwedi wotete.
18 Konima yaasho, ova ya kohamba Hiskia, ndele tava ti: “Otwa koshola eumbo alishe laJehova, oaltari yomaxwikiloyambo noilongifo yayo aishe nosho yo oshitaafula shomingome dokutalika noilongifo yasho aishe.
19 Oilongifo aishe oyo ohamba Ahas ye i litulila pefimbo lokupangela kwayo, eshi ya li ya katuka shihe li pandunge, otwe i longekida notwe i koshola. Oi li komesho yoaltari yaJehova.”
20 Ohamba Hiskia oya fikama ongula inene noya ongaleka omalenga omoshilando, ndele tava i keumbo laJehova.
21 Ova eta eengobe deemhedi heyali, eedi deendume heyali, eedjona deendume heyali noikombo yoindume iheyali, i li etimbayambo omolwouhamba, omolwonhele iyapuki nomolwOvajuda. Onghee okwa lombwela ovapristeri, ovo ve li oludalo laAron, ve i yambele koaltari yaJehova.
22 Opo nee ova dipaa eengobe, ndele ovapristeri tava kufa ohonde noku i shamina koaltari; natango ova dipaa eedi deendume, ndele tava shamine ohonde koaltari, nova dipaa yo eedjona deendume, ndele tava shamine ohonde koaltari.
23 Ova twala oikombo yoindume yetimbayambo kohamba nokeongalo, ndele tava tenheke omake avo kuyo.
24 Ovapristeri ove i dipaa nove i yamba i li etimbayambo. Ova tula ohonde yayo koaltari, va koshole Ovaisrael aveshe, molwaashi ohamba oya ti kutya exwikiloyambo netimbayambo oli na okukala lOvaisrael aveshe.
25 Lwanima, okwa ka lombwela Ovalevi va fikame peumbo laJehova ve na omayaxa, oishikomwa yeengodi nouxumbafeta palombwelo laDavid nolaGad, omumonikokule wohamba, nosho yo lomuprofeti Natan, molwaashi oshipango osho osha li sha dja kuJehova, okupitila movaprofeti vaye.
26 Onghee Ovalevi ova li va fikama ve na oishikomwa yaDavid, novapristeri ova li ve na omanghuma.
27 Opo nee ohamba Hiskia oya yandja elombwelo kutya exwikiloyambo oli na okuyambelwa koaltari. Eshi kwa hovelwa okuyambwa exwikiloyambo, eimbilo laJehova ola hovela nosho yo omanghuma, taku shikulwa ewiliko loishikomwa yaDavid, ohamba yaIsrael.
28 Eongalo alishe ole linyongamena pedu, ofimbo eimbilo la li tali imbwa, nomanghuma a li taa shikwa. Osho sha kala ngaho, fiyo osheshi exwikiloyambo la pwa okuyambwa.
29 Diva eshi va mana okuyamba eyambo, ohamba novanhu aveshe, ovo va li pamwe nayo, ove linyongamena pedu, ndele tava nangala eombe.
30 Ohamba Hiskia nomalenga ova lombwela Ovalevi va hambelele Jehova neendjovo daDavid nodaAsaf, omumonikokule. Onghee ova imba omaimbilohambelelo va hafa unene, nova twa eengolo nokulinyongamena pedu.
31 Opo nee ohamba Hiskia oya tya: “Molwaashi omwe likalekelwa* omolwaJehova, ileni mu yandje omayambo nomapanduloyambo keumbo laJehova.” Onghee eongalo ola hovela okuyandja omayambo nomapanduloyambo, nakeshe umwe okwa yandja omaxwikiloyambo tashi di komutima.
32 Omuvalu womaxwikiloyambo oo eongalo la yandja owa li eengobe 70, eedi deendume 100 needjona deendume 200, aishe oyo oi li omaxwikiloyambo aJehova.
33 Omayambo mayapuki okwa li eengobe 600 needi 3 000.
34 Ashike kapa li ovapristeri va wana okuyuva omaxwikiloyambo aeshe, onghee ovamwaina, Ovalevi, ove va kwafela, fiyo osheshi va manifa oilonga oyo nosho yo fiyo osheshi ovapristeri ve likoshola, molwaashi Ovalevi ova li ovadiinini unene,* ngeenge tashi uya pokulikoshola ve dule ovapristeri.
35 Natango, opa li omaxwikiloyambo mahapu nosho yo oinghene yomayambo oukumwe noikunwayambo yomaxwikiloyambo. Eumbo laJehova osho la tungululwa* ngaho.
36 Onghee Hiskia novanhu aveshe ova li va hafa omolwoshinima osho Kalunga kashili a ningila ovanhu, molwaashi ashishe osho osha ningwa mepakumo leisho.
Eshangelo lopedu
^ Eln., “oipala.”
^ Ile “lokufuwa po.”
^ Eln., “paife omwa yadifa omake eni.”
^ Eln., “ouyuki wokomutima.”
^ Ile “longekidwa.”
