Omafimbo omativali 30:1-27
-
Hiskia ta dana Opaasa (1-27)
30 Hiskia okwa tumina Ovaisrael nOvajuda aveshe ondjovo, nokwa shangela nokuli kuEfraim nokuManasse eenhumwafo, opo ve uye keumbo laJehova, muJerusalem, va dane Opaasa omolwaJehova, Kalunga kaIsrael.
2 Ashike ohamba, omalenga ayo nosho yo eongalo alishe muJerusalem ova li va tokola, opo va dane Opaasa momwedi omutivali,
3 molwaashi kava li va dula oku i dana pefimbo opo have i dana shito, shaashi kapa li ovapristeri vahapu ovo ve likoshola, novanhu kava li va ongala muJerusalem.
4 Elongekido olo ola li tali monika la yuka momesho ohamba noyeongalo alishe.
5 Onghee ova li va tokola, opo va shiivife muIsrael ashishe, okudja muBer-seba fiyo okuDan, kutya ovanhu ove na okuuya kuJerusalem, opo va dane Opaasa omolwaJehova, Kalunga kaIsrael, molwaashi inava kala have i dana ve li ongudu, ngaashi sha shangwa.
6 Opo nee ovatumwa* ova endaenda muIsrael nomuJuda ashishe ve na eenhumwafo da dja kohamba nokomalenga ayo, ngaashi ohamba ya yandja elombwelo, ya ti: “Ovanhu vomuIsrael alukileni kuJehova, Kalunga kaAbraham, kaIsak nokaIsrael, opo naye a dule okwaalukila koshixupe, osho sha xupa momake eehamba daAssiria.
7 Inamu kala mwa fa ooxokulululwa nosho yo ovamwanyoko, ovo va kala vehe fi ovadiinini kuJehova, Kalunga kooxekulululwa. Omolwoshinima osho, Kalunga okwe va etela oupyakadi, opo keshe oo ta mono nota udu kombinga yao a kale a tila, ngaashi mu shi wete.
8 Inamu kala mwa kukutika omitima deni, ngaashi ooxokulululwa. Dulikeni kuJehova nokuuya konhele yaye iyapuki, oyo a yapula fiyo alushe, ndele tamu longele Jehova, Kalunga keni, opo aha kale vali e mu handukila neenghono.
9 Ngeenge omwa alukile kuJehova, vamwanyoko novanamati veni otava ka filwa onghenda kwaavo ve va kwata po, notava ka efiwa va alukile kedu eli, molwaashi Jehova, Kalunga keni, omunalukeno* nomunanghenda, noite ke mu fiya po, ngeenge omwa alukile kuye.”
10 Onghee ovatumwa* ova enda oshilando noshilando moshilongo ashishe shaEfraim noshaManasse, nokuli noshaSebulon, ndele ovanhu ova li tave va yolo noku va sheka.
11 Ashike ovanhu vamwe va dja muAsser, muManasse nomuSebulon ove lininipika, ndele tave uya kuJerusalem.
12 Kalunga kashili okwa li yo a kwafela Ovajuda va kale va hangana,* opo va dulike keendjovo daJehova, odo a yandja okupitila mohamba nomomalenga.
13 Eemhunga dovanhu oda li da ongala pamwe muJerusalem, opo va dane Oshivilo shOmingome inadi ya Efulika momwedi omutivali; ova li va ongala mongudu inene.
14 Ova fikama, ndele tava hanauna po eealtari, odo da li muJerusalem, nova kufa po eealtari adishe dokutwimina, ndele tave di ekele mEfilu laKidron.
15 Opo nee ova dipaa eyambo lOpaasa mefiku eti-14 lomwedi omutivali. Ovapristeri nOvalevi ova li va fya ohoni, onghee ove likoshola, ndele tava twala omaxwikiloyambo keumbo laJehova.
16 Ova shuna peenhele davo, opo hava kala, ngaashi sha popiwa mOmhango yaMoses, omupiya waKalunga kashili. Opo nee ovapristeri ova shamina koaltari ohonde, oyo va pewa kOvalevi.
17 Meongalo omwa li vahapu ovo inave likoshola, nOvalevi ova li tava dipaa omayambo Opaasa omolwaaveshe ovo inava koshoka, opo ve va koshole omolwaJehova.
18 Ovanhu vahapu, unene tuu ovo va dja kuEfraim, kuManasse, kuIsaskar nokuSebulon, kava li ve likoshola, ashike ova li va lya Opaasa, nonande kashi li metwokumwe naasho sha shangwa. Ndele Hiskia okwe va ilikanena, ta ti: “Jehova, oo muwa, na dimine po
19 keshe oo e lilongekida momutima waye a longele Kalunga kashili, Jehova, Kalunga kooxekulululwa, nonande ine likoshola metwokumwe nomufikamhango u na sha noinima iyapuki.”
20 Jehova okwa pwilikina kuHiskia nokwa dimina po* ovanhu.
21 Onghee Ovaisrael, ovo va li muJerusalem, ova li va dana nehafo linene Oshivilo shOmingome inadi ya Efulika oule womafiku aheyali. Ovalevi novapristeri ova li tava tange Jehova efiku nefiku, tava shiki oishikomwa yavo mokule omolwaJehova.
22 Kakele kaasho, Hiskia okwa li a popya nokutwa omukumo* Ovalevi aveshe, ovo va li va katuka pandunge, eshi tava longele Jehova. Ova li va lya oikulya yoshivilo oule womafiku aheyali, va yamba omayambo oukumwe nokupandula Jehova, Kalunga kooxekulululwa.
23 Eongalo alishe ola li la tokola, opo li dane vali oshivilo osho oule womafiku aheyali, onghee ove shi dana omafiku aheyali a wedwa po.
24 Hiskia, ohamba yaJuda, okwa li a yandja keongalo eengobe deemhedi 1 000 needi 7 000, nomalenga okwa li a yandja keongalo eengobe deemhedi 1 000 nosho yo eedi 10 000; ovapristeri vahapu ova li ve likoshola.
25 Ovanhu aveshe ovo va dja muJuda, ovapristeri, Ovalevi naaveshe ovo va dja kuIsrael, novanailongo ovo va dja kedu laIsrael, naavo va li muJuda ova twikila okukala va hafa.
26 MuJerusalem omwa li ehafo linene, olo inali kala mo nande onale okudja pefimbo laSalomo, omonamati waDavid, ohamba yaIsrael.
27 Xuuninwa, ovapristeri Ovalevi ova li va fikama, ndele tava nangeke noupuna ovanhu; Kalunga okwa li a uda ondaka yavo, neilikano lavo ola li la fika kolukalwa laye liyapuki meulu.
Eshangelo lopedu
^ Eln., “eenhondoki.”
^ Ile “oku na olune.”
^ Eln., “eenhondoki.”
^ Eln., “e va pa omutima umwe.”
^ Eln., “velula.”
^ Eln., “a popya nomitima.”
