Omafimbo omativali 35:1-27
35 Josia okwa danena Opaasa muJerusalem omolwaJehova, nova dipaa eyambo lOpaasa mefiku eti-14 lomwedi wotete.
2 Ovapristeri okwe va pa oinakuwanifwa yavo, nokwe va ladipika va wanife po oilonga yavo meumbo laJehova.
3 Opo nee okwa lombwela Ovalevi, ovahongi vOvaisrael aveshe, ovo vayapuki kuJehova, a ti: “Tuleni Oshikefa shiyapuki meumbo, olo Salomo, omonamati waDavid, ohamba yaIsrael, a tunga; itamu shi humbata vali komapepe eni. Longeleni Jehova, Kalunga keni, noshiwana shaye shaIsrael.
4 Lilongekideni pamaukwaneumbmo omapata eni she likolelela keengudu deni, tamu shikula osho sha shangwa kuDavid, ohamba yaIsrael, nokuSalomo, omonamati waye.
5 Kaleni ofika ponhele iyapuki, mwe litukula meengudu domaukwaneumbo omapata ovamwanyoko, ovanhu aveshe* she likolelela kongudu youkwaneumbo wepata lOvalevi.
6 Dipaeni eyambo lOpaasa nokulikoshola, ndele tamu longekida ovamwanyoko va wanife po ondjovo yaJehova, oyo ya yandjwa okupitila muMoses.”
7 Josia okwa yandja oufita weedjona deendume nowoukombo voupedi kovanhu, i li omayambo Opaasa aaveshe ovo va li po, aishe kumwe 30 000 nosho yo eengobe 3 000. Oinima oyo oya dja moinima yohamba.
8 Omalenga aye nao okwa yandja omayambidido e li eyambo lehalo liwa kovanhu, kovapristeri nokOvalevi. Hilkia, Sakaria naJehiel, ovawiliki vomeumbo laKalunga kashili, ova yandja kovapristeri omayambo Opaasa 2 600 neengobe 300.
9 Konania novamwaina, Shemaia naNetanel, pamwe naHashabia, Jeiel naJosabad, omalenga Ovalevi, ova yandja omayambidido kOvalevi, omayambo Opaasa 5 000 neengobe 500.
10 Omalongekido okwa li a pwa, novapristeri ova li va fikama peenhele davo nOvalevi opaengudu davo, ngaashi ohamba ya popya.
11 Ova dipaa omayambo Opaasa, novapristeri ova shamina koaltari ohonde, oyo va pewa kOvalevi, ovo va li tava yuvu oinamwenyo.
12 Natango, ova longekida omaxwikiloyambo ve a tukulile ovanhu aveshe, ovo va li meengudu pamaukwaneumbo omapata, opo va dule oku a yandja kuJehova, ngaashi sha shangwa membo laMoses. Ova ninga sha faafana shi na sha neengobe.
13 Ova teleka* eyambo lOpaasa pomundilo ngaashi hava ningi shito. Ova teleka omayambo mayapuki meembiya dedu, meembiya doshivela* nomoipana, nokonima yaasho, ove a twala diva kovanhu aveshe.
14 Opo nee ova longekida omayambo avo Opaasa noovapristeri, molwaashi ovapristeri, oludalo laAron, ova li tava yambe omaxwikiloyambo noinghene fiyo okonguloshi, onghee Ovalevi ova longekida omayambo avo Opaasa noovapristeri, oludalo laAron.
15 Ovaimbi, ovanamati vaAsaf, ova li peenhele davo palombwelo laDavid, laAsaf, laHeman nolaJedutun, omumonikokule wohamba. Ovapashukili vopoivelo ova li poivelo ya yoolokafana. Kava li va pumbwa okufiya po oilonga yavo, molwaashi ovamwaina Ovalevi ove va longekidila omayambo Opaasa.
16 Onghee oilonga aishe yaJehova oya li ya unganekwa mefiku olo, opo ku danwe Opaasa noku yambwe omaxwikiloyambo koaltari yaJehova, she likolelela kelombwelo lohamba Josia.
17 Ovaisrael, ovo va li po, ova dana Opaasa pefimbo olo nosho yo Oshivilo shOmingome inadi ya Efulika oule womafiku aheyali.
18 MuIsrael inamu danwa nale Opaasa ngaashi oyo okudja pefimbo lomuprofeti Samuel. Meehamba daIsrael kamwa li ohamba ya dana Opaasa ngaashi oyo ya danwa kuJosia, kovapristeri, kOvalevi, kOvajuda aveshe nokOvaisrael, ovo va li po, nosho yo kovakalimo vomuJerusalem.
19 Opaasa oyo oya li ya danwa momudo omuti-18 wepangelo laJosia.
20 Konima yoinima aishe ei, eshi Josia a tungulula otembeli,* Neko, ohamba yaEgipiti, okwa ya a ka lwe puKarkemis, puEufrat. Opo nee Josia okwa ya e ke i lwife.
21 Onghee Neko okwe mu tumina ovatumwa, a ti: “Akutu ohamba yaJuda, eshi oshi na shike naave? Ame itandi uya oku ku lwifa nena, ndele ohandi ka lwifa eumbo limwe, na Kalunga okwa ti ondi na oku shi ninga diva. Omolwouwa woye, efa po okupataneka Kalunga, oo e li pamwe naame, ngeenge hasho, ote ke ku hanauna po.”
22 Ashike Josia ka li a aluka ko kuye. Okwa li a djala oikutu imwe, opo aha didilikwe mo, ndele ta i e ke mu lwife noka li a pwilikina keendjovo daNeko, odo da dja mokanya kaKalunga. Onghee okwa ya e ke mu lwife pefilu laMegiddo.
23 Ovaumbi ova yasha ohamba Josia, nohamba oya lombwela ovapiya vayo, ya ti: “Kufei nge po apa, osheshi onda ehamekwa unene.”
24 Onghee ovapiya vayo ove mu kufa mo metemba nove mu londeka metemba laye loita etivali, ndele tave mu twala kuJerusalem. Okwa fya nokwa pakwa mombila yooxekulululwa, nOvajuda nosho yo Ovajerusalem aveshe ova lila Josia.
25 Jeremia okwa imba omaimbilo eefya omolwaJosia, novaimbi aveshe, ovalumenhu novakainhu, ova twikila okwiimba shi na sha naJosia momaimbilo* avo fiyo okunena. Opa li pa ningwa etokolo kutya omaimbilo oo oku na okwiimbwa muIsrael, nokwa shangwa momaimbilo.
26 Ondjokonona aishe yaJosia noilonga oyo a longa omolwohole yaye i na oudiinini, mokudiinina osho sha shangwa mOmhango yaJehova,
27 naasho a ninga, okudja pehovelo fiyo opexulilo, oya shangwa mEmbo lEehamba daIsrael nodaJuda.
Eshangelo lopedu
^ Eln., “ovanamati vovanhu.”
^ Ile tashi dulika, “yofa.”
^ Ile “dakashitenda.”
^ Eln., “eumbo.”
^ Ile “momaimbilo oluhodi.”
