Omafimbo omativali 7:1-22
7 Diva eshi Salomo a mana okwiilikana, meulu omwa dja omundilo, ndele tau xwike po exwikiloyambo nomayambo, neumbo ola li li yadi oshinge shaJehova.
2 Ovapristeri kava li va dula okuya meumbo laJehova, molwaashi eumbo laJehova ola li li yadi oshinge shaJehova.
3 Oshiwana shaIsrael ashishe osha li tashi tale, eshi omundilo we uya, neumbo ola li li yadi oshinge shaJehova, nove linyongamena oipala yavo ya twa pedu pokalupanda, nokunangala eombe tava pandula Jehova, tava ti, “osheshi ye omuwa; ohole yaye i na oudiinini otai kala po fiyo alushe.”
4 Opo nee ohamba noshiwana ashishe ova yamba omayambo koshipala shaJehova.
5 Ohamba Salomo oya yamba omayambo eengobe 22 000 needi 120 000. Kungaho, ohamba noshiwana ashishe ova yapula eumbo laKalunga kashili.
6 Ovapristeri ova li va fikama peenhele davo, opo va li hava longele, nosho yo Ovalevi, ovo va li ve na oishikomwa, oyo ya li hai longifwa mokwiimbila Jehova. (Ohamba David oya li ya ninga oishikomwa oyo, eshi ya li tai tange Kalunga pamwe navo,* opo ovaimbi va pandule Jehova, tava ti, “osheshi ohole yaye i na oudiinini otai kala po fiyo alushe.”) Ovapristeri ova li tava shiki omanghuma mokule ve li komesho yavo, ofimbo Ovaisrael aveshe va li va fikama.
7 Opo nee Salomo okwa yapula oshihale shopokati, osho sha li komesho yeumbo laJehova, osheshi opo a li e na okuyambela omaxwikiloyambo nosho yo oinghene yomayambo oukumwe, molwaashi oaltari yongopolo, oyo Salomo a li a ninga, kaya li tai wana omaxwikiloyambo, eendjayambo noinghene.
8 Pefimbo opo, Salomo okwa li a ninga oshivilo shomafiku aheyali pamwe nOvaisrael aveshe, eongalo linene, okudja kuLebo-hamat* fiyo okEfilu laEgipiti.
9 Ndele mefiku etihetatu,* ova li va ninga oshoongalele shiyapuki, molwaashi ova li ve na eyapulo loaltari oule womafiku aheyali nosho yo oshivilo shomafiku aheyali.
10 Opo nee mefiku eti-23 lomwedi omutiheyali, Salomo okwa lekela ovanhu va ye komaumbo avo nehafo nova tunhukwa komitima omolwouwa oo Jehova a ulikila David, Salomo nosho yo oshiwana shaye, Israel.
11 Onghee Salomo okwa li a manifa okutunga eumbo laJehova, eumbo* lohamba, noinima aishe oyo Salomo a li a diladila momutima waye okuninga i na sha neumbo laJehova nosho yo eumbo laye mwene, okwa li e i wanifa po filufilu.
12 Opo nee Jehova okwe lihololela Salomo oufiku, ndele ta ti kuye: “Onda uda eilikano loye, nonde lihoololela onhele ei, i kale eumbo lokuyambela omayambo.
13 Ngeenge onda ningifa eulu li londe, nodula i kale inai loka, nongeenge onda lombwele oshipaxu shi nyonaune edu nosho yo ngeenge nda tumine oshiwana shange oudu wolutapo,
14 ngeenge oshiwana shange, osho sha lukilwa edina lange oshe lininipike, sha ilikana, sha kongo nge nokweefa po eendjila dasho dii, opo nee ohandi ke shi uda okudja meulu, handi ke shi dimina po omatimba asho nokuningifa edu lasho li kale vali la lyata nawa.
15 Paife omesho ange otaa ka pashuka, nomatwi ange otaa ka pwilikina nelitulemo keilikano monhele ei.
16 Onda hoolola nonda yapula eumbo eli, opo edina lange li fimanekelwe mo alushe, nohandi li pashukile noku li amena efimbo keshe.
17 “Ngeenge owa ende mondjila yange, ngaashi xo, David, a li a ninga, mokuninga keshe osho handi ku lombwele, nokudulika komalombwelo nokomatokolo ange,
18 ohandi ka pameka olukalwapangelo louhamba woye, ngaashi ashike nda li nda ninga ehangano naxo, David, nda ti: ‘Kolukalwapangelo laIsrael otaku ka kala alushe omulumenhu womoludalo loye.’
19 Ashike ngeenge omwa efa po nokuliteeka po eenghedimhango noipango yange, oyo nde mu pa, ndele tamu ka longela ookalunga vamwe noku ve linyongamena,
20 ohandi ka xulifa po Ovaisrael medu olo nde va pa, nokuhanauna po eumbo eli, olo nda yapula omolwedina lange, nohandi ke li ningifa li yolwe* nokushekwa kovanhu aveshe.
21 Eumbo eli otali ka ninga onduba yomakulukuma. Keshe umwe, oo ta ka enda pulo, ote ke li tala a kumwa, ndele ta ti: ‘Omolwashike Jehova a ningila oshilando neumbo eli ngaha?’
22 Opo nee otava ka nyamukula tava ti: ‘Omolwaashi ova efa po Jehova, Kalunga kooxekulululwa, oo e va kufa medu laEgipiti, nova hoolola ookalunga vamwe, ve linyongamena kuvo noku va longela. Nomolwaasho e va etela oudjuu aushe oo.’”
Eshangelo lopedu
^ Tashi dulika tashi ulike kOvalevi.
^ Ile “poshivelo shaHamat.”
^ Efiku olo la shikula oshivilo, ile efiku eti-15.
^ Ile “ombala.”
^ Eln., “oshitevo.”
