Embo etivali lOvakorinto 2:1-17
2 Inandi hala vali oku mu nyemateka eshi handi uya oku mu talela po oshikando oshitivali.
2 Osheshi ngeenge onde mu nyemateke, olyelye ta ka hafifa nge ehe fi nye ovo nda nyemateka?
3 Onde mu shangela oinima ei, opo eshi handi uya kunye ndiha nyematekwe kunye ovo mu na okuhafifa nge, molwaashi onde lineekela kutya osho tashi etele nge ehafo osho yo tashi mu etele ehafo amushe.
4 Onde mu shangela ndi udite oudjuu, nda nyika oluhodi neenghono nohandi yahama komutima, haku mu nyemateka, ndele oku mu shiivifila kutya ondi mu hole unene.
5 Ngeenge ope na ou e mu nyemateka, hanye amuke a nyemateka, ndele okwa nyemateka nge yo, ashike inandi hala okupopya shihapu kombinga yaasho.
6 Epukululo olo a pewa kuvahapu ola wana;
7 paife mu diminei po nehalo liwa noku mu hekeleka opo aha wililwe po* neenghono koluhodi.
8 Onghee ohandi mu kumaida mu mu shilipaleke kutya omu mu hole.
9 Onde mu shangela yo opo mu ulike kutya ohamu dulika moinima aishe.
10 Ngeenge omwa dimine po umwe, naame ohandi ka dimina po omunhu oo. Ame ngeenge onda dimine po umwe, ohandi shi ningi omolweni nohandi shi ningi koshipala shaKristus,
11 opo tuha pukifwe kuSatana molwaashi otu shii omakoto aye.*
12 Eshi nda fika muTroas ndi udife onghundana iwa kombinga yaKristus, omhito oya li ya yeulukila nge* ndi longe oilonga yOmwene,
13 ashike omwenyo wange owa li wa nyika oluhodi eshi inandi mona omumwatate Titus. Onghee onde va lekela, ndele handi i kuMakedonia.
14 Kalunga na pandulwe oo he tu wilike alushe molweendo lefindano pamwe naKristus, nokwe tu longifa yo tu shiivifile ovanhu keshe pamwe kombinga yaye, naasho oshi li ngaashi edimba liwa.
15 Fye ovo hatu udifa kombinga yaKristus otu li ngaashi edimba liwa koshipala shaKalunga. Edimba olo ohali udika kwaavo tava ka xupifwa nokwaavo tava ka hanaunwa po.
16 Kwaavo tava ka hanaunwa po oli li edimba lefyo tali twala mefyo, ofimbo kwaavo tava ka xupifwa oli li edimba lomwenyo tali twala momwenyo. Oolyelye va wana okulonga oilonga oyo?
17 Ofye, molwaashi fye ihatu shingifa eendjovo daKalunga ngaashi vahapu hava ningi, ndele ohatu popi oshili tu li ovashikuli vaKristus koshipala shaKalunga, ngaashi ovo twa tumwa kuKalunga.
Eshangelo lopedu
^ Ile “aha ponwe po.”
^ Ile “eemwiyo daye.”
^ Eln., “oshivelo osha li sha yeulukila nge.”
