Josua 1:1-18
1 Konima eshi omupiya waJehova, Moses, a fya, Jehova okwa lombwela Josua,* omonamati waNun, oo a kala ta yakula Moses, a ti:
2 “Omupiya wange, Moses, okwa fya. Inda, ndele to tauluka omulonga waJordan, ove noshiwana ashishe eshi, ndele tamu i medu olo handi ka pa Ovaisrael.
3 Ohandi ke mu pa onhele keshe omo tamu ka enda, ngaashi ashike nda udanekela Moses.
4 Oshitukulwa shoye otashi ka dja kombuwa fiyo okuLibanon, nokomulonga munene, Eufrat, edu alishe lOvaheti nafiyo okEfuta Linene* kouninginino.*
5 Kape na oo ta ka dula oku ku finda ofimbo u li momwenyo. Ngaashi ashike nda li pamwe naMoses, ohandi ka kala yo pamwe naave. Itandi ku efa noitandi ku fiye po.
6 Kala u na ouladi nowa pama, osheshi oove to ka wilika oshiwana eshi, eshi tashi ka fyuulula edu olo nda anena ooxekulululwa kutya ohandi ke va pa.
7 “Kala u na ouladi nowa pamenena, nokudiinina filufilu Omhango aishe oyo omupiya wange, Moses, e ku lombwela. Ino yapuka mo muyo u ye kolulyo, ile kolumosho, opo u katuke pandunge mukeshe osho to ningi.
8 Embo eli lOmhango inali dja mo mokanya koye, nou na oku li lesha nondaka yopedu* omutenya noufiku, opo u diinine ashishe osho sha shangwa mo, nokungaho, oto ka pondola mwaashishe osho to ningi, noto ka katuka pandunge.
9 Mbela inandi ku lombwela kutya: Kala u na ouladi nowa pama? Ino tila, ile u mbadapale, osheshi Jehova, Kalunga koye, oku li pamwe naave keshe apa to i.”
10 Opo nee Josua okwa lombwela ovaleli aveshe voshiwana, ta ti:
11 “Endeni monhanda aishe, ndele tamu lombwele ovanhu eendjovo edi: ‘Longekideni oikulya, molwaashi otamu ka tauluka omulonga waJordan konima yomafiku atatu nokuya mu ka kale medu olo Jehova, Kalunga keni, te mu pe mu ka kale mo.’”
12 Josua okwa lombwela epata laRuben, laGad netata lepata laManasse, a ti:
13 “Dimbulukeni osho Moses, omupiya waJehova, e mu lombwela, a ti: ‘Jehova, Kalunga keni, ote ke mu pa etulumuko, note ke mu pa edu eli.
14 Ovakulukadi veni, ounona veni nosho yo oimuna yeni, otai ka kala medu olo Moses e mu pa kombinga ei* yomulonga waJordan, ashike ovakwaita nye ovanaenghono amushe omu na okutetekela ovamwaxo mokutauluka omulonga waJordan, mwa unganekelwa olwoodi. Omu na okukwafela ovamwaxo
15 fiyo osheshi Jehova e va pa etulumuko, ngaashi ashike e li mu pa, opo navo yo va kale medu olo Jehova, Kalunga keni, te ke va pa. Opo nee omu na okushuna kedu olo mwa pewa mu kwate ko nokukala mo, edu olo Moses, omupiya waJehova, e mu pa kombinga yokoushilo womulonga waJordan.’”
16 Ova nyamukula Josua, va ti: “Ohatu ka ninga ashishe osho we tu lombwela, nohatu ka ya keshe opo to tu tumu.
17 Ngaashi ashike twa pwilikina kwaashishe osho Moses a popya, ohatu ka pwilikina yo kwoove. Ndele Jehova, Kalunga koye, na kale pamwe naave, ngaashi ashike a li pamwe naMoses.
18 Omunhu keshe oo ita pwilikine kwoove noita dulika kukeshe elombwelo olo we mu pa, oku na okudipawa. Ashike kala u na ouladi nowa pama.”
Eshangelo lopedu
^ Ile “Jehosua,” tali ti “Jehova Exupifo.”
^ Sha hala okutya, Mediterranean.
^ Ile “oko haku ningine etango.”
^ Ile “okudilonga kuyo.”
^ Sha hala okutya, kombinga yokoushilo.
