Josua 13:1-33
13 Josua okwa li a kulupa nokwa li e li pokufya. Onghee Jehova okwa tya kuye: “Ove owa kulupa, ku na ko vali efimbo lihapu, ashike natango oku na oshitukulwa shihapu shedu inashi nangalwa.*
2 Edu eli la xupa ko olo ngaha: oitukulwa aishe yOvafilisti noshitukulwa ashishe shOvagesur,
3 (okudja kokamumulonga oko ka dja momulonga waNil,* oko ke li koushilo* waEgipiti fiyo okongaba yaEkron kombinga yokolundume, osho sha li sha talika ko shi li oshitukulwa shOvakaanan) mwa kwatelwa oshitukulwa shovapangeli vatano vOvafilisti, Ovagasa, Ovaasdod, Ovaaskelon, Ovagat nOvaekron, oshitukulwa shaAvim,
4 fiyo okolukadi; edu alishe lOvakaanan, Meara shOvasidon fiyo okuAfek nosho yo fiyo okeengaba dOvaamori.
5 Edu lOvagebal naLibanon ashishe kombinga yokoushilo, okudja kuBaal-gad, pefina lomhunda yaHermon fiyo okuLebo-hamat;*
6 ovakalimo aveshe vomoshitukulwa shokeemhunda, okudja kuLibanon fiyo okuMisrefot-maim, nOvasidon aveshe. Ohandi ke va taataa mo* moipafi yOvaisrael. Ou na ashike oku shi pa Ovaisrael shi li efyuululo, ngaashi ashike nde ku lombwela.
7 Edu olo ou na oku li tukula li li efyuululo, to li tukulile omapata omuwoi, netata lepata laManasse.”
8 Etata likwao lepata laManasse, Ovaruben nOvagad, ova kufa efyuululo lavo olo Moses e va pa kombinga yokoushilo womulonga waJordan, ngaashi ashike Moses, omupiya waJehova, e va pa:
9 okudja kuAroer, osho shi li komunghulo wEfilu laArnon, nosho yo oshilando, osho shi li pokati kefilu, neemhunda adishe da lalakana daMedeba fiyo okuDibon;
10 oilando aishe yaSihon, ohamba yOvaamori, oo a pangela muHesbon, fiyo okeengaba dOvaammoni;
11 Gilead noshitukulwa shOvagesur nosho yo shOvamaakati, nomhunda yaHermon aishe nosho yo Basan ashishe fiyo okuSalka
12 nouhamba aushe waOg muBasan, oo a pangela muAstarot nomuEdrei. (Oye a li umwe womwaavo vaxuuninwa muRefaim.) Moses okwe va finda, ndele te va te mo.*
13 Ashike Ovaisrael inava taataa mo* Ovagesur nOvamaakati, osheshi Ovagesur nOvamaakati ova kala hava di mokati kOvaisrael fiyo okunena.
14 Epata lOvalevi olo ashike ina pa efyuululo. Omayambo oo a yambelwa Jehova, Kalunga kaIsrael, okupitila momundilo oo efyuululo lavo, ngaashi ashike e va udanekela.
15 Moses okwa yandja efyuululo kepata lOvaruben pamaludi avo,
16 noshitukulwa shavo osha dja kuAroer, osho shi li komunghulo wEfilu laArnon, noshilando, osho shi li pokati kefilu, nosho yo eemhunda adishe da lalakana daMedeba.
17 Hesbon needoolopa dasho adishe, odo di li komhunda ya lalakana, Dibon, Bamot-baal, Bet-baal-meon,
18 Jahas, Kedemot, Mefat,
19 Kiriataim, Sibma naSeret-hassahar, osho shi li komhunda oyo i li popepi nefilu,
20 Bet-peor, omalufilu aPisga, Bet-jesimot,
21 oilando aishe yokomhunda ya lalakana nomauhamba aeshe aSihon, ohamba yOvaamori, oo a pangela muHesbon. Moses okwe mu finda nosho yo omalenga Ovamidian, Evi, Rekem, Sur, Hur naReba, ovo va li tava pangelwa kuSihon, nova li hava di moshitukulwa osho.
22 Bileam, omonamati waBeor, omunyanekeli, okwa dipawa kOvaisrael neongamukonda pamwe naavo va dipawa.
23 Ongaba yOvaruben oya li omulonga waJordan, noshitukulwa eshi osha li efyuululo lOvaruben, pamaludi avo, pamwe noilando nosho yo omikunda davo.
24 Natango, Moses okwa yandja efyuululo kepata laGad, Ovagad pamaludi avo,
25 noshitukulwa shavo osha kwatela mo Jaser noilando aishe yaGilead netata ledu lOvaammoni, fiyo okuAroer, osho shi li popepi naRabba;
26 nokudja puHesbon fiyo okuRamat-mispe nokuBetonim nosho yo okudja kuMahanaim fiyo okeengaba daDebir;
27 nomefilu, Bet-haram, Bet-nimra, Sukkot naSafon, oshitukulwa shimwe shouhamba waSihon, ohamba yaHesbon; eengaba davo oda li koushilo womulonga waJordan fiyo opopo pa xulila efuta laKinneret.*
28 Olo ola li efyuululo lOvagad, pamaludi avo nosho yo oilando nomikunda davo.
29 Moses okwa yandja natango efyuululo ketata lepata laManasse, ketata lepata laManasse pamaludi avo.
30 Oshitukulwa shavo osha dja kuMahanaim, ndele tashi kwata ko Basan ashishe, ouhamba aushe waOg, ohamba Basan, noumukunda aveshe vanini vaJair, muBasan, eedoolopa 60.
31 Etata laGilead nosho yo Astarot naEdrei, oilando yomouhamba waOg, muBasan, oya pewa ovanamati vaMakir, omonamati waManasse, sha hala okutya, etata lovanamati vaMakir pamaludi avo.
32 Oo omafyuululo oo Moses e va pa, eshi va li momaluhaela aMoab, koushilo womulonga waJordan, muJeriko.
33 Ndele epata lOvalevi, Moses ine li pa efyuululo. Jehova, Kalunga kaIsrael, oye efyuululo lalo, ngaashi ashike e va udanekela.
Eshangelo lopedu
^ Ile “kwatwa ko.”
^ Ile “okudja kuSihor.”
^ Eln., “komesho.”
^ Ile “poshivelo shaHamat.”
^ Ile “yeleka mo.”
^ Ile “te va yeleke mo.”
^ Ile “inava yeleka mo.”
^ Sha hala okutya, etale laGennesaret, ile Efuta laGalilea.
