Josua 5:1-15
5 Diva eshi eehamba adishe dOvaamori, odo da li hadi di kombinga yokouninginino* womulonga waJordan, nosho yo eehamba adishe dOvakaanan, odo da li hadi di popepi nefuta, da uda kutya Jehova okwa pwiininika omeva omomulonga waJordan moipafi yOvaisrael, fiyo ve u tauluka, oda li da mbadapala, nokada li vali di na ouladi nandenande omolwOvaisrael.
2 Pefimbo olo, Jehova okwa lombwela Josua, ta ti: “Liningila eembele domamanya, ndele to kenghe vali ovalumenhu Ovaisrael oshikando oshitivali.”
3 Opo nee Josua okwa ninga eembele domamanya, ndele ta kenghe ovalumenhu vomuIsrael puGibeat-haaralot.*
4 Josua okwe va kengha, molwaashi ovalumenhu aveshe vomovanhu ovo va fiya po Egipiti, ovalumenhu aveshe ovo va wana okuya moita,* ova fila mombuwa mondjila, konima eshi va fiya po Egipiti.
5 Ovanhu aveshe ovo va fiya po Egipiti ova li va kenghwa, ashike ovanhu aveshe ovo va dalelwa mondjila konima eshi va fiya po Egipiti kava li va kenghwa.
6 Ovaisrael ova li va enda oule weedula 40 mombuwa fiyo osheshi oshiwana ashishe sha fya, sha hala okutya, ovalumenhu ovo va li va wana okuya moita, ovo va fiya po Egipiti, ovo inava dulika kondaka yaJehova. Jehova okwa li e va anena kutya ite ke va efa nandenande va mone edu olo Jehova a anena ooxekulululwa kutya ote li tu pe, edu tali kunguluka omashini nomaadi eenyiki.
7 Onghee okwa li e va pingena po novanamati vavo. Josua okwa kengha ovanamati ovo, molwaashi kava li ve va kengha eshi va li molweendo.
8 Eshi va mana okukengha oshiwana ashishe, ova kala ponhele opo va li monhanda fiyo osheshi va veluka.
9 Opo nee Jehova okwa lombwela Josua, ta ti: “Nena onda xulifa po odino yOvaegipiti punye.” Onghee onhele oyo oya kala hai ifanwa Gilgal* fiyo okunena eli.
10 Ovaisrael ova twikila okwoonga onhanda muGilgal, nova dana Opaasa mefiku eti-14 lomwedi oo, konguloshi, momaluhaela aJeriko.
11 Ova li va hovela okulya oilikolomwa yomedu olo, mefiku olo la shikula Opaasa, omungome inau ya efulika noilya ya yofwa, mefiku olo tuu olo.
12 Nomanna kaa li po vali mefiku la shikula ko, eshi va lya oilikolomwa yomedu olo. Kapa li vali pe na omanna Ovaisrael, ashike ova li va hovela okulya oilikolomwa yomedu laKaanan momudo oo.
13 Eshi Josua a li popepi naJeriko, okwa yelula omesho, ndele ta mono omulumenhu a fikama komesho yaye e na eongamukonda meke laye. Josua okwa ya kuye, ndele te mu pula, ta ti: “Ou li kombinga yetu, ile okombinga yovatondi vetu?”
14 Okwa tya: “Ahawe, onde uya ndi li omuwiliki* wetangakwaita laJehova.” Opo nee Josua okwe linyongamena puye oshipala sha twa pedu, ndele ta nangala eombe, nokwa tya kuye: “Omwene wange okwa hala okulombwela shike omupiya waye?”
15 Omuwiliki wetangakwaita laJehova okwa nyamukula Josua, ta ti: “Dula ko eenghaku keemhadi doye, osheshi ponhele apa wa fikama oiyapuki.” Na Josua osho a ninga.
Eshangelo lopedu
^ Eln., “kombinga oko kwa ama efuta.”
^ Tali ti “Oshikulundudu shOipa yokOxulo yOulumenhu.”
^ Ile “ovalumenhu aveshe ovo ve na eedula da hanga okuya metangakwaita.”
^ Tali ti “Okukufa po; Okukufa po Filufilu.”
^ Ile “ondjai.”
