Josua 6:1-27
6 Jeriko osha li sha idilwa filufilu omolwOvaisrael; kape na oo a li ta di mo, nokape na oo a li te uya mo.
2 Opo nee Jehova okwa tya kuJosua: “Tala, onde ku pa Jeriko, ohamba yasho nosho yo ovakwaita ovanaenghono vasho.
3 Ovakwaita amushe omu na okudingilila oshilando, tamu shi dingilile lumwe. Osho osho mu na okuninga oule womafiku ahamano.
4 Omu na okukala mu li pamwe novapristeri vaheyali va humbata omanghuma aheyali eembinga deedi deendume, ve li komesho yOshikefa. Ashike mefiku etiheyali omu na okudingilila oshilando luheyali, novapristeri ove na okushika omanghuma.
5 Ngeenge enghuma loluvinga lodi yondume ola shikwa, diva ngeenge mwa udu ewi* lenghuma, ovanhu aveshe ove na okwiingida mokule ngaashi ovanhu ve li moita. Opo nee ekuma loshilando otali ka teka po, novanhu ove na okuya mo, keshe umwe a yukilila moshilando.”
6 Josua, omonamati waNun, okwa ongela ovapristeri, ndele te va lombwele, ta ti: “Kufeni oshikefa shehangano, novapristeri vaheyali ove na okuhumbata omanghuma aheyali eembinga deedi deendume, ve li komesho yOshikefa shaJehova.”
7 Opo nee okwa lombwela ovanhu, ta ti: “Indeni, ndele tamu dingilile oshilando, nomatangakwaita a homata oku na okutetekela Oshikefa shaJehova.”
8 Ndele ngaashi ashike Josua a lombwela ovanhu, ovapristeri vaheyali va humbata omanghuma aheyali eembinga deedi deendume moipafi yaJehova ova tetekela komesho, ndele tava shiki omanghuma, noshikefa shehangano laJehova osha li she va shikula.
9 Omatangakwaita a homata okwa tetekela komesho ovapristeri ovo va li tava shiki omanghuma, netangakwaita likwao ola li la shikula Oshikefa, eshi omanghuma taa shikwa nopehe na olufuwo.
10 Opo nee Josua okwa lombwela ovanhu, ta ti: “Inamu ingida, neendaka deni inadi udika. Momakanya eni inamu dja nande ondjovo fiyo efiku olo handi mu lombwele kutya, ‘Ingideni,’ opo nee omu na okwiingida.”
11 Oshikefa shaJehova okwe shi dingonokifa oshilando lumwe, nokonima ova shuna monhanda, ndele tava kala mo oufiku aushe.
12 Efiku la shikula ko, Josua okwa penduka ongula inene, novapristeri ova kufa Oshikefa shaJehova,
13 novapristeri vaheyali va humbata omanghuma aheyali eembinga deedi deendume, ova li tava ende ve li komesho yOshikefa shaJehova, tava shiki omanghuma nopehe na olufuwo. Omatangakwaita a homata okwa li taa ende e li komesho yavo, ofimbo etangakwaita likwao la li la shikula Oshikefa shaJehova, eshi omanghuma a li taa shikwa nopehe na olufuwo.
14 Mefiku etivali, ova dingilila oshilando lumwe, nokonima ova shuna konhanda. Osho ova kala tave shi ningi oule womafiku ahamano.
15 Mefiku etiheyali, ova penduka ongula inene, diva ashike eshi eluwa la tenda, nova dingilila oshilando monghedi ya faafana lwoikando iheyali. Mefiku olo omo ashike va dingilila oshilando lwoikando iheyali.
16 Ndele oshikando oshitiheyali, ovapristeri ova shika omanghuma, ndele Josua ta lombwele ovanhu, ta ti: “Ingideni, molwaashi Jehova okwe mu pa oshilando!
17 Oshilando noinima aishe, oyo i li mo, oya tokolelwa ehanauno, noshilando ashishe oshaJehova. Ombwada, Rahab, oyo ashike tai kala nomwenyo, yo naaveshe ovo ve li nayo meumbo, molwaashi oya li ya holeka ovatumwa ovo twa tumine.
18 Omu na okukala kokule naasho sha tokolelwa ehanauno, opo muha kale mwa hala oinima oyo ya tokolelwa ehanauno, noku i kufa, mu ningife onhanda yOvaisrael oshinima sha tokolelwa ehanauno, mokweetifa mo oshiponga.*
19 Ashike oshisilveri, oshingoli, oinima oyo ya longwa mongopolo, oshivela shilaula, aishe oiyapuki kuJehova. Oi na okutuvikilwa meemhungulilo domamona aJehova.”
20 Opo nee omanghuma eshi a shikwa, ovanhu ova ingida. Diva eshi ovanhu va uda enghuma la shikwa, ndele tava ingida mokule, ngaashi ovanhu ve li moita, ekuma ola teka po. Konima yaasho, ovanhu ova ya va yukilila moshilando, ndele tave shi kwata ko.
21 Oinima aishe oyo ya li moshilando ove i hanauna po neongamukonda, ovalumenhu novakainhu, ounona novakulunhu, eengobe, eedi nosho yo eendongi.
22 Josua okwa lombwela ovalumenhu vavali ovo va li va ka ndaada edu, a ti: “Indeni meumbo lombwada, ndele tamu i eta mo naaveshe ovo ve li nayo, ngaashi ashike mwe i anena.”
23 Onghee eendadi* oda ya mo, ndele tadi kufa mo Rahab pamwe naxe, ina, ovamwainamati novanhu vaye aveshe; oda kufa mo ovaneumbo vaye aveshe, node va twala ponhele ya amenwa kondje yonhanda yOvaisrael.
24 Opo nee ova xwika po oshilando nosho yo oinima aishe oyo ya li mo. Ashike oshisilveri, oshingoli, oinima oyo ya longwa mongopolo noshivela shilaula, ove i twala keemhungulilo domamona omeumbo laJehova.
25 Ombwada Rahab, oukwaneumbo waxe nosho yo aveshe ovo hava di pamwe naRahab, ovo ashike va li va xupifwa kuJosua. Rahab oha di muIsrael fiyo okunena, molwaashi okwa li a holeka ovatumwa ovo Josua a li a tuma va ka ndaade Jeriko.
26 Pefimbo opo, Josua okwa ninga eano eli:* “Jehova na finge omunhu oo ta tungulula oshilando Jeriko. Ngeenge okwa diki po ekanghameno lasho, ota ka filwa omonamati waye woshiveli, nongeenge okwa tula po omivelo dasho, ota ka filwa onghelo yaye.”
27 Onghee Jehova okwa kala pamwe naJosua, na Josua okwa li a fimanekwa* kombada yedu alishe.
Eshangelo lopedu
^ Ile “ewi tali twaalele.”
^ Ile “oupyakadi; okweetela umwe oupyakadi.”
^ Eln., “ovalumenhu ovanyasha ovo va li va ka ndaada.”
^ Ile tashi dulika, “a ningifa ovanhu va ane eano eli.”
^ Ile tashi dulika, “tashi ulike kefimano laJehova.”
