Nahum 3:1-19
3 Woo koshilando oshidipai,*
Oshi yadi filufilu oipupulu noumbudi.
Ihashi kala shihe na oihakanwa.
2 Oku na omalinyengo eengola nomaweelelo omalola,Omalinyengo omakondo eenghambe nomakolokoto omatemba.
3 Omulondinghambe e li konghambe, eongamukonda tali taima neonga tali vema,Ovanhu vahapu va dipawa nonduba yoimhu— Keshe pamwe ope na oimhu.
Ova kala nokweenda kombada yoimhu.
4 Osho osha kala tashi ningwa omolwoilonga youmbwada ihapu yombwada,Oyo iwa noi na osheeta, omukainhu oo a pyokoka moulodi,Oo a yula oiwana omolwoumbwada waye nomaukwaneumbo omolwoulodi waye.
5 Jehova womatangakwaita okwa ti: “Tala, ondi li omhinge naave,”*“Ohandi ka penuna eefulukweva doye di uvike oshipala shoye;Nokuningifa oiwana i tale ohoni yoye,Nomauhamba otaa ka mona okufifwa ohoni kwoye.
6 Ohandi ke ku etela oinima ii,Nohandi ke ku fifa ohoni,Nohandi ka ningifa ovanhu ve ku yole.
7 Keshe ou te ke ku mona, ote ke ku faduka po nota ka tya,‘Ninive osha hanaunwa po.
Olyelye te ke ku udila oukwao wananghali?’
Openi handi ke ku kongela ovahekeleki?
8 Mbela ou dule No-amon,* osho sha li pomulonga waNil?
Osha li sha dingililwa komeva;Oupuna washo owa li efuta, nekuma lasho ola li efuta.
9 Etiopia naEgipiti ovo va li odjo yeenghono dasho dinene.
Puti naLibia ovo va li ekwafo loye.
10 Ashike nokuli naye okwa ya moupongekwa;Nokwa ninga onghwate.
Ovana vaye navo ova li va tetaulwa moinhimbu meekolonela depandavanda keshe.
Ova umbila ovafimanekwa vaye oshihoololifo,Novanhu vaye aveshe ovo va fimana ova li va mangwa nomalyenge.
11 Oto ka kolwa yo;Oto ka hondama.
Oto ka konga ekwafo kovatondi.
12 Omakuma oye aeshe a pama, oo a dingilila oilando, okwa fa omikwiyu da pya oiimati yado yotete;Ngeenge oda shikwa ko, otadi ka wila momakanya aavo tave di li po.
13 Tala, ovakwaita voye ova fa ovakainhu ve li mokati koye.
Omivelo doshilando shoye otadi ka kala da yeulukila ovatondi voye.
Omundilo otau ka xwika po oihakifo yomivelo doye.
14 Teka omeva nokulilongekidila okukondekwa.
Pameka omakuma oye.
Inda monhata u ke i lunge.Foloma eedopi.
15 Omundilo otau ke ku xwika po.
Eongamukonda otali ke ku tetaula po.
Otali ke ku hanauna po, ngaashi oshipaxu.*
Hapupaleni ngaashi oshipaxu!
Hapupaleni ngaashi oshipaxu!
16 Owa hapupalifa ovashingifi voye ve dule eenyofi dokeulu.
Oshipaxu ohashi lipuununa, ndele tashi tuka po.
17 Ovanangeli voye ova fa oshipaxu,Novanambelewa voye ova fa oshihomo shoshipaxu.
Ova onga onhanda momakuma a tungwa nomamanya mefiku loutalala,Ashike ngeenge etango la piti, ohava tuka po;Nokape na ou e shi shii kutya ohava i peni.
18 Akutu ohamba yaAsiria, ovafita voye otava nyongila;Omalenga oye oku li momaumbo ao.
Ovanhu voye ove lihanena keemhunda,Nokape na ou te va ongele pamwe.
19 Ito ka tulumukwa koudjuu woye.
Oipute yoye itai veluka.
Aveshe ovo tava udu onghundana kombinga yoye otava ka pandula omake,Molwaashi olyelye a kala ita mono oixuna omolwonyanya yoye?”
Eshangelo lopedu
^ Eln., “shohonde.”
^ Sha hala okutya, Ninive.
^ Sha hala okutya, Tebes.
^ Ile “oshipaxu inashi kola.”
