Omuudifi 7:1-29
7 Edina liwa oli dule omaadi mawa, nefiku lokufya oli dule efiku lokudalwa.
2 Oshixwepo okuya keumbo ku na eefya, shi dulife okuya keumbo ku na oshivilo, molwaashi olo olo exulilo lomunhu keshe, naavo ve na omwenyo ove na oku shi kaleka momadiladilo.
3 Oluhodi oli li xwepo li dulife okuyola, molwaashi oshipala sha nyika oluhodi ohashi ningifa omunhu a kale e udite xwepo komutima.
4 Omutima womunaendunge ou li meumbo mu na eefya, ndele omutima welai ou li meumbo mu na ehafo.*
5 Oshixwepo okupwilikina kehanyeno lomunaendunge shi dulife okupwilikina keimbilo lomalai.
6 Osheshi ngaashi omakiya taa topa pediko koshi yombiya, okuyola kwelai nako osho ku li; naashi yo oshongaho elela.
7 Ashike omafininiko otaa dulu okuningifa omunaendunge a kale a fa omupwidi, nombubo ohai nyono po omutima.
8 Exulilo loshinima oli li xwepo li dule ehovelo lasho. Oshixwepo okulididimika shi dulife okukala nomhepo yelinenepeko.
9 Ino endelela* okuhanduka, osheshi ehandu otali kala monhulo yomalai.*
10 Ino tya, “Omolwashike omafiku onale a li mawa e dule opaife?” osheshi okupula ngaho otashi ulike kutya ku na ounongo.
11 Ounongo pamwe nefyuululo oshinima shiwa nohai etele ouwa ovo hava mono ouyelele wefiku.*
12 Osheshi ounongo oo eameno, ngaashi ashike oimaliwa i li eameno, ashike ouwa weshiivo oyou: Ounongo ohau xupifa omwenyo waao e u na.
13 Konakona oilonga yaKalunga kashili, osheshi olyelye ta dulu okuyukililifa osho a endameka?
14 Mefiku liwa, longa yo ouwa, ndele mefiku loudjuu,* dimbuluka kutya Kalunga oye e li efa li kale po nosho yo likwao, opo ovanhu vaha shiive* keshe osho tashi ke va ningilwa monakwiiwa.
15 Mokukalamwenyo kwange kwongaho, onda mona aishe, okudja komuyuki, oo ta file ouyuki waye, fiyo okomukolokoshi, oo ta kala po efimbo lile, nonande oha longo owii.
16 Ino kala unene u lishii ouyuki, noino litala ko umunaendunge unene. Omolwashike wa hala okulinyona po ove mwene?
17 Ino kala unene omukolokoshi, ile elai. Omolwashike u na okufya efimbo loye inali fika?
18 Oshiwa okutambula ko elondwelo limwe nopehe na okulipwililikila makwao, osheshi omunhu oo ha tila Kalunga ota ka dulika kuo aeshe.
19 Ounongo ohau ningifa omunhu omunaendunge a kale e na eenghono dihapu e dule ovalumenhu omulongo ovanaenghono ve li moshilando.
20 Osheshi kombada yedu kaku na omunhu omuyuki, oo ha longo alushe ouwa, ndele iha nyono.
21 Natango, ino tula ondjovo keshe komutima woye, oyo ovanhu va popya, ngeenge owa ningi ngaho, oto ka uda omupiya woye te ku ula nai;*
22 osheshi ou shi shii nawa momutima woye kutya oikando ihapu naave owa ula nai vamwe.
23 Moinima aishe oyo, onda yeleka ounongo, ndele handi ti: “Ohandi ka ninga omunaendunge.” Ashike osho osha li shidjuu unene kwaame.
24 Oinima aishe oyo ya ningwa itai dulu okuudiwa ko; oya ya moule mwii. Olyelye ta dulu oku i uda ko?
25 Onda tokola momutima wange okushiiva, okukonakona nokukonga ounongo, nonokutya omolwashike oinima hai ningilwa nosho yo okuuda ko oukolokoshi womalai noulai wovapwidi.
26 Opo nee onda didilika oshinima eshi: Oshinima shii unene shi dulife efyo osho omukainhu oo e li ngaashi onete yomukongo, oo omutima waye u li ngaashi onete yokukwata eeshi, nomake aye oku li ngaashi omalyenge odolongo. Omunhu oo ha kendabala okuhafifa Kalunga kashili ote ke mu henuka, ndele omukolokoshi ota ka kwatwa ko kuye.
27 Omuudifi okwa ti: “Tala, eshi osho nda mona. Onda kala nokukonakona oinima, opo ndi fike pexulifodiladilo lange,
28 ndele osho nda* kala handi kongo, inandi shi mona. Movanhu eyovi, onda mona mo omulumenhu* umwe, ndele mokati kavo inandi mona mo omukainhu.
29 Eshi osho ashike nda mona: Kalunga kashili okwa shita ovanhu ovayuki, ndele vo ova ya neendjila davo.”*
Eshangelo lopedu
^ Ile “omalihafifo.”
^ Eln., “Ino endelela momhepo yoye.”
^ Ile tashi dulika, “oli li edidiliko lelai.”
^ Sha hala okutya, ovo ve na omwenyo.
^ Ile “loshiponga.”
^ Ile “vaha mone.”
^ Eln., “fingi.”
^ Ile “omwenyo wange.”
^ Ile “omuyuki.”
^ Ile “ova pangela eemhangela dihapu.”
